Julia Jones

Bod yn benderfynol wnaeth fy arwain at astudio addysgu 

Nid mynd yn syth o'r ysgol i swydd oedd y llwybr yr oedd Julia Jones eisiau ei gymryd - roedd hi eisiau parhau i astudio, gwneud ei Lefel A a mynd ymlaen i ennill gradd.  

Mae’r fam o Ben-y-bont ar Ogwr – sydd ar hyn o bryd yn warchodwr plant hunangyflogedig, yn ysgrifennu’n llawrydd i gylchgrawn gofal plant cenedlaethol, ac yn wniadyddes sy’n canolbwyntio ar wneud gynau a gwisgoedd cyfnod y rhaglywiaeth – bellach yn gweithio ar ei chymhwyster diweddaraf, Addysg a Hyfforddiant Ôl-orfodol (PcET) ym Mhrifysgol De Cymru. 

“Roeddwn i eisiau mynd ymlaen i addysg uwch pan oeddwn i'n 18, ond doedd fy rhieni ddim yn gweld y pwynt i mi gael fy Lefel A neu radd ac fe wnaethon nhw fynnu fy mod i’n mynd i fyd gwaith,” esboniodd. 

“Diwedd yr 80au oedd hi ac roedd pethau’n wahanol bryd hynny, felly fe wnes i adael yr ysgol. Ond, fel oedolyn, roeddwn i eisiau profi y gallwn i ennill gradd. Fe wnes i hynny – mae gen i radd a meistr mewn addysg a llawer o bethau eraill rhyngddyn nhw – ac rwy'n bwriadu dechrau ar fy PhD unwaith y byddaf i wedi gorffen y cwrs hwn." 

Ar ôl cwblhau ei MA, gwelodd Julia nad oedd mynd i mewn i’w dewis faes mor hawdd ag yr oedd wedi’i ddisgwyl, felly roedd cwrs addysgu PDC yn ddelfrydol iddi. 

“Ar ôl i mi orffen fy ngradd meistr doeddwn i ddim yn gwybod beth i'w wneud â fy nghymhwyster,” esboniodd. 

“Fe wnes i geisio am ambell swydd, ond doedd neb eisiau cyflogi gwarchodwr plant sydd â gradd meistr. Doedd gen i ddim digon o brofiad ar gyfer swyddi addysgu, neu roedd gen i ormod o gymwysterau ar gyfer swyddi nad ydyn nhw’n rhai addysgu. 

 “Felly, penderfynais gael cymhwyster addysgu i gael i mewn i addysgu’n iawn. PDC yw fy mhrifysgol leol – dyma lle gwnes i fy BA – felly roeddwn i’n teimlo’n gyfforddus yn dod yn ôl ar ôl gwneud fy ngradd meistr yn rhywle arall.” 

Bod yn rhan o gymuned ddysgu gefnogol 

Mae'r gefnogaeth gan eraill ar y cwrs yn rhywbeth y mae Julia yn dweud sy'n hanfodol. “Rydyn ni'n grŵp bach ar nos Iau, ond rydyn ni i gyd yn agos iawn ac yn gefnogol iawn i'n gilydd, rydyn ni fel teulu astudio bach,” meddai. 

Caiff y cwrs ei gyflwyno gan dîm bach ond hynod gymwys a chefnogol ac mae’n addas i rai sy’n addysgu ar hyn o bryd neu’n bwriadu addysgu, nid yn unig mewn colegau AB ond hefyd mewn carchardai, sefydliadau hyfforddi’r heddlu a’r gwasanaeth tân, colegau chweched dosbarth, canolfannau oedolion a chymunedol, diwydiant, sefydliadau hyfforddi ac AU, ac mae’n dibynnu ar gymwysterau a phrofiad blaenorol. 

Gan archwilio syniadau ac arferion da mewn perthynas â dysgu ac addysgu, mae’r cwrs yn ystyried rolau ehangach y gall dysgwyr eu cyflawni fel rhan o’u harfer proffesiynol yn ogystal â materion sy’n effeithio ar y sectorau addysg a hyfforddiant ôl-orfodol.