Graddau Gwyddorau Fforensig

Wedi'i achredu gan Gymdeithas Siartredig y Gwyddorau Fforensig, mae'r BSc Gwyddor Fforensig yn eich dysgu sut i gymhwyso ystod o wyddoniaeth uwch i ymchwilio i droseddau. Mae'r sgiliau rydych chi'n eu datblygu gan ddefnyddio offer o safon y diwydiant yn sbardun i amrywiaeth o yrfaoedd ar draws meysydd gwyddonol.

Mae’r cwrs Gwyddoniaeth Fforensig, gyda’i ffocws cryf ar gyflogadwyedd, yn edrych ar y broses yn ei chyfanrwydd, o leoliad trosedd i’r llys barn. Byddwch yn dysgu am arferion a thechnegau safonol sydd ar waith wrth ymchwilio i leoliad trosedd, yn ogystal ag am ddadansoddi tystiolaeth mewn labordy a’i dehongli. Byddwch yn astudio canghennau arbenigol o wyddor fforensig, gan gynnwys troseddoldeb, cemeg fforensig, bioleg fforensig, anthropoleg, ymchwilio i danau a gwenwyneg.

Mae’r cwrs MSc Gwyddor Ddadansoddol a Fforensig yn canolbwyntio ar ymchwil arloesol, y technegau dadansoddi diweddaraf a sgiliau trosglwyddadwy a phroffesiynol a fydd yn eich paratoi i weithio fel gwyddonydd dadansoddol neu wyddonydd fforensig proffesiynol. Rydym yn cynhyrchu gwyddonwyr rhagorol a graddedigion y mae galw mawr amdanyn nhw, ac mae ein myfyrwyr ôl-raddedig wedi cael cynnig cyflogaeth gan rai o gwmnïau mwyaf blaenllaw y DU ac Ewrop, mewn meysydd sy’n amrywio o wenwyneg ddadansoddol i ddadansoddi DNA fforensig.

Yr unig ffordd o ennill y set sgiliau eang a deinamig sydd ei hangen i ddatrys troseddau yw trwy brofiad ymarferol. Mae ein BSc Ymchwiliad Fforensig yn eich paratoi ar gyfer gweithredu yn y byd archwilio safleoedd troseddau, wrth i chi ymchwilio i safleoedd troseddau efelychiadol, defnyddio offer labordy o safon diwydiant a rhoi tystiolaeth fel tyst arbenigol.

Byddwch yn datblygu eich sgiliau a’ch gwybodaeth wyddonol cyn mynd ymlaen i feithrin sgiliau ymarferol mewn archwilio lleoliadau troseddau cyffredin, dadansoddi tystiolaeth fforensig ac efelychiadau llys barn. Byddwch yn dysgu am y strwythur a’r prosesau sy’n rheoleiddio’r system cyfiawnder troseddol, a’r gyfraith sy’n gysylltiedig ag ymchwilio troseddol. Byddwch yn cael profiad o ymchwiliadau wedi’u hefelychu yn ein Cyfleuster Hyfforddi Lleoliad Trosedd, yn amrywio o fwrgleriaethau domestig ac archwiliadau cerbydau i achosion mwy cymhleth fel tanau bwriadol a dynladdiad. Byddwch yn astudio sawl achos ac yn dysgu am y technegau fforensig ynghlwm wrthynt, gan fabwysiadu agwedd feirniadol i gloriannu a phwyso a mesur dulliau fforensig.