Craig Fletcher

Adeiladu gyrfa mewn Peirianneg Sifil

Astudiodd Craig Fletcher, o Bontypridd, y radd BEng (Anrh) Peirianneg Sifil ac ar hyn o bryd mae'n astudio MSc Peirianneg Sifil a Rheolaeth Amgylcheddol. 

Rhaglen reoli yn PDC. Mae bellach yn gweithio fel Ymgynghorydd Priffyrdd i Capita Real Estate and Infrastructure, gan gymryd rôl arweiniol wrth ddylunio a rheoli prosiectau priffyrdd a seilwaith amrywiol ledled y DU. 

"Rwy'n mwynhau fy swydd, ac yn hoffi'r her o gael prosiectau newydd a gwahanol. Mae fy rôl yn cynnwys popeth sy’n ymwneud â dylunio priffyrdd, o astudiaethau dichonoldeb i ddylunio manwl, dogfennau contract a thendrau, i weithio'n agos gyda chleientiaid i gyflawni prosiectau'n effeithiol. 

Pan oeddwn yn dewis pa broffesiwn i fynd iddo, cefais fy nenu at Beirianneg Sifil oherwydd yr amrywiaeth o feysydd sydd ganddi, yn ogystal â'r rhagolygon da i raddedigion yn y dyfodol. 

Fel rhan o fy ngradd BEng Peirianneg Sifil, fe es i ar leoliad gwaith 12 mis gydag adran Priffyrdd awdurdod lleol. Yn dilyn y lleoliad, cefais gynnig swydd llawn amser fel peiriannydd priffyrdd ac arhosais am bum mlynedd, gan gwblhau fy ngradd yn rhan-amser. Caniataodd hyn i mi gael profiad gyrfa gwerthfawr yn ystod y rhan gynnar hon o fy ngyrfa. 

Symud ymlaen o fod yn fyfyriwr israddedig i fyfyriwr ôl-raddedig gyda chymorth PDC

Ar ôl cwblhau fy nghymhwyster BEng yn llwyddiannus, symudais ymlaen i’m rhaglen Meistr mewn Peirianneg Sifil. Mae'r cwrs wedi'i achredu ar gyfer statws Siartredig ac roedd hyn yn ffactor allweddol wrth ddewis y cwrs. Ar ben hynny, ar ôl astudio fy ngradd israddedig yn PDC, roeddwn yn gyfarwydd â’r staff a’r cyfleusterau, ac mae’r ddau ohonynt o safon uchel iawn. 

Rwy'n mwynhau'r cwrs Meistr. Mae’n heriol ond yn rhoi boddhad, ac mae wedi fy ngalluogi i ddatblygu fel Peiriannydd Sifil a rhyngweithio â pheirianwyr eraill ar lefel debyg i mi fy hun. Fel rhan o fodiwl ar Dechnolegau Carbon Isel a Chynaliadwyedd, aethom ar daith maes i Ganolfan y Dechnoleg Amgen (CAT) ym Machynlleth. Roedd hyn yn ein galluogi i weld technolegau cynaliadwy amrywiol mewn sefyllfa bywyd go iawn, a oedd nid yn unig yn addysgiadol ond yn ddiwrnod allan llawn hwyl i ffwrdd o ddysgu traddodiadol yr ystafell ddosbarth. 

Un o'r prosiectau mwyaf diddorol i mi fod yn rhan ohono oedd prosiect grŵp. Fel rhan o fodiwl ar Gynllunio a Rheoli Prosiectau Integreiddiol, cawsom y dasg o ddylunio canolfan awyrofod yn llawn. Caniataodd i ni fod yn greadigol, wrth ddefnyddio ein profiad cyffredin a’n sgiliau gwaith tîm i gyflawni’r prosiect. 

Byddwn yn argymell y cwrs peirianneg sifil hwn yn fawr i unrhyw un sydd am ddod yn Beiriannydd Siartredig (CEng). Fy mwriad yw parhau i ddysgu a datblygu. Ar ôl ennill fy statws Peiriannydd Corfforedig (IEng) yn ddiweddar, rwyf nawr yn bwriadu sefyll fy adolygiad proffesiynol CEng ar ôl cwblhau fy MSc."