Amelia Bisby

Dewis astudio Troseddeg yn PDC

Dechreuodd fy niddordeb mewn Troseddeg pan oeddwn tua wyth mlwydd oed, pan ges i fy nghyfareddu gan raglen ddogfen am drosedd go iawn. Datblygodd y diddordeb cynnar hwnnw yn angerdd a lywiodd fy nhaith addysgol. Tref fechan roedd fy ysgol yn ei gwasanaethu a doedd hi ddim yn cynnig Troseddeg fel pwnc Safon Uwch, ond gwnes i blismona proffesiynol yn y coleg, ac fe gadarnhaodd hynny fy awydd i astudio Troseddeg. Pan ddaeth hi'n bryd dewis prifysgol, roedd brwdfrydedd fy nheulu  dros Brifysgol De Cymru (PDC) yn ddigon i fy argyhoeddi mai dyna lle’r oeddwn am fod. Ers 2020, mae PDC wedi bod yn brifysgol ddelfrydol i fi. 

Gwnaeth mynd i sawl diwrnod agored gadarnhau bod PDC yn gweddu’n berffaith i fi. Roedd y cyfuniad o'r tŷ lleoliad troseddau, cyfleuster efelychiadau Hydra, a'r uned achosion heb eu datrys yn un anodd ei guro. Dim ond yn rhannol roedd prifysgolion eraill yn cynnig y cyfleusterau hyn, tra bo gan PDC y cyfan. Roedd y darlithwyr yn ysbrydoledig, ac roedd cymuned y campws yn teimlo'n groesawgar ac yn fywiog. 

Bywyd fel myfyriwr 

Yn ystod fy astudiaethau, rwyf wedi cael cyfle i weithio gyda gweithwyr proffesiynol yn y diwydiant, gan gynnwys lleoliadau a sesiynau rhyngweithiol gyda'r heddlu a swyddogion prawf. Mae fy mhrosiect troseddeg gymhwysol wedi bod yn un o’r uchafbwyntiau. Fe wnaethon ni gynnal arolwg ymhlith myfyrwyr ar ddiogelwch ar gampws, gan fynd i'r afael â materion fel cerdded yn y tywyllwch rhwng darlithoedd. Mae'n waith ymarferol craff sydd wir wedi cael effaith. 

Mae byw ar y campws hefyd wedi bod yn brofiad anhygoel, ac wedi meithrin ymdeimlad cryf o gymuned. Wrth edrych tua’r dyfodol, fy nod yw arbenigo mewn cyfiawnder ieuenctid, yn enwedig cefnogi pobl ifanc ag anawsterau dysgu yn ystod eu hadsefydlu. 

Mae PDC wedi rhoi'r hyder a'r sgiliau i fi ddilyn gyrfa mewn Troseddeg, ac allwn i ddim bod wedi dewis lle gwell i astudio.