Hyrwyddo Ffasiwn

Sut byddwch chi'n dysgu

Caiff y modiwlau eu creu gyda mewnbwn gan y diwydiant, sy'n golygu eich bod yn dysgu'r sgiliau a'r wybodaeth ddiweddaraf y mae cyflogwyr yn chwilio amdanynt. Caiff y radd hon ei hasesu’n gyfan gwbl drwy waith cwrs. Byddwch yn meithrin sylfaen ddamcaniaethol drwy ddarlithoedd a gweithdai ymarferol. Mae’r profiad ymarferol yn cynnwys prosiectau yn y byd go iawn gan ddefnyddio ein cyfleusterau blaenllaw, cysylltiadau â’r diwydiant, ac interniaethau. Mae’r asesiadau'n amrywiol, gan gwmpasu dealltwriaeth ddamcaniaethol a sgiliau ymarferol drwy gyflwyniadau, adroddiadau, portffolios a phrosiectau creadigol. Bydd y dull cynhwysfawr hwn yn helpu i’ch gwneud yn gyfathrebwr ffasiwn cyflawn, sy'n barod i gael effaith fasnachol.

Staff addysgu

Mae gan ein tîm addysgu gyfuniad unigryw o brofiad yn y diwydiant a rhagoriaeth academaidd. Mae ehangder eu harbenigedd yn golygu eu bod nid yn unig yn darparu cefnogaeth academaidd wych, ond hefyd yn eich helpu i gysylltu â’r diwydiant, adnabod eich cryfderau a'ch diddordebau, a mynd ar drywydd eich nodau. Mae arweinydd y cwrs wedi arwain ymgyrchoedd enwog ac wedi bod yn Bennaeth Creadigol mewn cwmnïau cyfarwydd yn ystod gyrfa ugain mlynedd. Mae ein tîm hefyd yn cynnwys arbenigwyr marchnata a ffotograffiaeth sy’n datblygu eich sgiliau, ac mae gan ddarlithydd arall ar y cwrs radd ddoethur mewn Theori Ddiwylliannol a Beirniadol, a fydd yn helpu i gyfoethogi eich dysgu wrth adrodd straeon o safbwynt beirniadol, diwylliannol, hanesyddol a chreadigol.

Lleoliadau a phrofiad gwaith

Mae cyflogadwyedd a mentergarwch wrth wraidd ein cwricwlwm. Mae tasgau yn y byd go iawn a chydweithio â’r diwydiant yn eich galluogi i ddatblygu'r sgiliau, y wybodaeth, y profiad, yr ymddygiad, y cysylltiadau a'r nodweddion sydd eu hangen i gyflawni a llwyddo ar ôl graddio. Ar ôl yr ail flwyddyn o astudio, gallwch fynd ar leoliad gwaith blwyddyn o hyd gyda chefnogaeth y Tîm Gyrfaoedd a darlithwyr. Yn ystod y cyfnod hwn, byddwch yn gweithio mewn lleoliad proffesiynol sy'n gysylltiedig â'ch diddordeb yn y diwydiant ffasiwn, gan fagu profiad ymarferol ac yn aml yn ennill cyflog. Mae rolau nodweddiadol ar leoliad yn cynnwys creu cynnwys, marchnata gweledol a steilio.

Cyfleusterau

Mae pob math o gyfleusterau, gofod a chyfarpar o'r radd flaenaf ar gael i’ch helpu i ddatblygu eich sgiliau ymarferol. Mae gennym amrywiaeth o stiwdios ffotograffiaeth a dylunio ffasiwn, yn ogystal â nifer o gypyrddau dillad ar gyfer steilio a phum ffenestr siop ffug. Bydd gennych fynediad llawn at feddalwedd greadigol fel Adobe Suite. Gallwch ddefnyddio camerâu o’r radd flaenaf, cyfarpar goleuo a mwy o'n storfa benthyciadau helaeth, ac mae ein llyfrgell yn rhoi mynediad i chi at y prif gyhoeddiadau ffasiwn. Byddwch wedi eich lleoli yn yr Atrium yng Nghaerdydd, ac felly wrth galon un o hybiau creadigol y DU, gyda chyfleoedd diddiwedd i gydweithio â myfyrwyr ar gyrsiau creadigol eraill.

Offer

Ar ein Campws yng Nghaerdydd, mae gennym ni amrywiaeth eang o offer y byddwch chi'n cael eich hyfforddi i'w defnyddio fel rhan o'ch cwrs. I helpu i gefnogi eich astudiaethau, mae gennym gyfleuster Benthyca Offer Cyfryngau sy'n eich galluogi i logi'r offer, am ddim, fel y gallwch eu defnyddio ar gyfer eich aseiniadau a'ch gwaith ymarferol. Mae gennym ni gamerâu ffilm a ffotograffiaeth sylfaenol ac o’r radd flaenaf, offer goleuo a sain cludadwy yn ogystal ag amrywiaeth o ficroffonau a ddefnyddir mewn stiwdios proffesiynol, offerynnau ac offer cysylltiedig i'w defnyddio yn ein stiwdios cerddoriaeth neu ar leoliad. Mae'r tîm o swyddogion technegol a hyfforddwyr hefyd ar gael i'ch helpu gydag unrhyw ymholiadau a materion technegol.