Hanesion Graddio | Gareth yn sicrhau ei swydd ddelfrydol mewn clwb pêl-droed

Yr wythnos hon bydd Canolfan Gynadledda Ryngwladol Cymru yng Nghasnewydd yn gweld miloedd o’n graddedigion o 2020 a 2021 o’r diwedd yn croesi’r llwyfan yn eu cap a’u gŵn. I nodi dychweliad ein seremonïau graddio, rydym yn rhannu storïau rhai o’n myfyrwyr ysbrydoledig.

Astudiodd Gareth James, 26, Ddylunio Hysbysebu ym Mhrifysgol De Cymru (PDC) a gorffennodd ei astudiaethau ym mis Gorffennaf 2020. Mae bellach yn gweithio fel Dylunydd Graffeg yng Nghlwb Pêl-droed Southampton.

“Dewisais PDC ar gyfer y lleoliad yn bennaf – mae ochr fy nhad o’r teulu yn dod o Gaerdydd felly roeddwn i’n adnabod yr ardal yn barod, ond unwaith i mi weld sut beth oedd y cwrs Hysbysebu, roedd yn ffit perffaith i mi a beth roeddwn i eisiau symud ymlaen i’w wneud,” meddai Gareth, sy'n wreiddiol o Swindon.

“Ar y cyfan roeddwn i wrth fy modd gyda fy mhrofiad yn PDC. Cyfarfûm â phobl anhygoel, roedd y darlithwyr yn wych ac rwy’n meddwl ei fod wedi fy mharatoi’n dda ar gyfer y swydd yr wyf ynddi nawr.

“Yn amlwg, roeddwn i’n wynebu her enfawr o ran pandemig COVID-19 – roeddwn i’n dod i ddiwedd fy ngradd wrth i’r cyfnod clo ddod i ben, a oedd yn golygu bod fy nghyd-ddisgyblion a minnau wedi colli allan ar ein sioe graddedigon a chyfleoedd swyddi posibl o ganlyniad.

“Mae’n deimlad gwych gallu dathlu fy ngraddio o’r diwedd trwy fynychu seremoni – gwell hwyr na hwyrach! Fodd bynnag, nid wyf yn meddwl y bydd yn teimlo'r un peth yn union, yr holl fisoedd hyn yn ddiweddarach. Mae’n foment falch iawn serch hynny, ac rwy’n edrych ymlaen yn fawr at weld pawb eto."

Mae Gareth yn gobeithio parhau i symud ymlaen yn y diwydiant pêl-droed. Dywedodd: “Yn ffodus, fe wnes i lanio ar fy nhraed ar ôl gorffen fy ngradd, ac rydw i nawr yn fy swydd ddelfrydol, felly rydw i eisiau dal ati. Rwy'n edrych i lywio fy ngyrfa tuag at ddylunio symudiadau, felly dyna'r nod yn y dyfodol agos.

“Rwy’n gwybod ei fod yn ystrydeb, ond byddwn yn onest yn cynghori unrhyw fyfyriwr i wneud y gorau o’u hamser yn y brifysgol tra gallant, oherwydd mae’r amser yn hedfan!”

Dilynwch @usw.advertising ar Instagram          Dysgwch fwy am gyrsiau Dylunio yn PDC