Canolfan Helen Kegie yn agor ar Gampws Casnewydd PDC

Yr Athro Julie Lydon, Is-Ganghellor Prifysgol De Cymru, gydag Alison Strode, Cynghorydd Therapi Cymru. Llun: Rhys Skinner

Mae canolfan arbenigol i ddarparu gwasanaethau therapi a hyfforddiant wedi cael ei hagor ym Mhrifysgol De Cymru (PDC).

Dadorchuddiwyd Canolfan Helen Kegie ar gyfer Therapïau ar Gampws Dinas Casnewydd PDC gan yr Is-Ganghellor yr Athro Julie Lydon mewn seremoni arbennig ddoe.

Rhoddodd Alison Strode, Cynghorydd Therapi Cymru, ddarlith yn y digwyddiad

Wedi'i enwi er anrhydedd i'r diweddar Helen Kegie MBE – cefnogwr PDC, dyngarwr a chyn-Is-gadeirydd grŵp Seren - bydd y cyfleuster yn gartref i Therapi PDC, sy'n darparu ystod o gyfleoedd clinigol, DPP, hyfforddiant ac ymgynghori i sefydliadau ac elusennau cyhoeddus a phreifat.

Mae'r ganolfan bwrpasol yn dwyn ynghyd arbenigedd PDC mewn hyfforddiant a darpariaeth therapiwtig, gyda staff hefyd yn darparu gwasanaethau ymgynghori ar faterion iechyd meddwl ar gyfer ystod eang o sefydliadau statudol a thrydydd sector.

Mae clinig Cwnsela a Seicotherapi De Cymru - sy'n cynnig ystod o wasanaethau seicotherapiwtig i'r cyhoedd wedi'i leoli yn y ganolfan - yn ogystal â gwasanaeth Cwnsela mewn Ysgolion Annibynnol Casnewydd (NISBCS), sy'n rhoi cymorth i ysgolion y ddinas.

Bydd gwasanaeth cwnsela ar-lein i blant a phobl ifanc yn cael ei lansio yn ddiweddarach eleni.

Yn y lansiad, dywedodd yr Athro Lydon: "Roedd Helen yn angerddol am alluogi unigolion o gefndiroedd incwm isel i gael mynediad i addysg, yn benodol y rhai sy'n cael mynediad i ddisgyblaethau sy'n gysylltiedig â'r gwyddorau cymdeithasol.

"Sefydlodd Gronfa Helen Kegie i ddarparu bwrsariaethau blynyddol i fyfyrwyr a allai fod wedi cael trafferth fel arall i dalu cost eu haddysg. Roedd hi hefyd eisiau sicrhau bod graddedigion PDC yn gwasanaethu plant a theuluoedd yn y cymunedau lleol ac yn helpu i sefydlu'r clinig cwnsela.

"Bydd agor y ganolfan, a'r gwaith mae'r staff yn ei wneud, yn sicrhau bod etifeddiaeth Helen yn parhau."