Amdanom Ni

Rydym mewn lleoliad delfrydol i’n staff a’n myfyrwyr fwynhau popeth sydd gan y de-ddwyrain i’w gynnig, gyda champysau yng Nghaerdydd, Casnewydd a Phontypridd.

Rydym yn gweithio’n agos gyda’n colegau partner, ac mae gennym ddau is-gwmni sy’n eiddo’n llwyr i ni, sef Coleg Brenhinol Cerdd a Drama Cymru a Choleg Merthyr Tudful. 

Ein nod yw bod yn niwtral o ran carbon erbyn 2040. Gwyddom fod hyn yn bwysig er mwyn gweithredu a chynnal amgylchedd prifysgol cynaliadwy.  

Rydym hefyd yn rhan allweddol o’r economi leol, ac yn cynhyrchu £1.1 biliwn i economi’r Deyrnas Unedig bob blwyddyn (Adroddiad BiGGAR Economics, 2019/20). Am bob £1 a gaiff PDC mewn incwm, cynhyrchir £5.30 i’r economi ehangach. Mae mwy na 26,000 o fyfyrwyr a 2,900 o staff ym Mhrifysgol De Cymru (HESA 2022/23).

Gweithio gydag eraill

Mae gweithio mewn partneriaeth wrth wraidd popeth rydym yn ei wneud. Rydym yn gweithio gyda busnesau, y sector cyhoeddus a’r trydydd sector i gyflawni’r canlyniadau gorau i ddysgwyr a sefydliadau. Rydym yn ymchwilio ac yn arloesi i fynd i’r afael â rhai o’r heriau byd-eang mwyaf, o ynni ac iechyd i ddiogelwch a chynaliadwyedd. Mae’r arbenigedd hwn yn helpu ein partneriaid a’n myfyrwyr. 

Dysgu drwy wneud

Ym Mhrifysgol De Cymru, mae ein myfyrwyr yn dysgu drwy wneud. Mae ein mannau dysgu yn adlewyrchu’r diwydiannau y byddant yn gweithio ynddynt ar ôl graddio. Mae ein cwricwlwm yn cael ei gyd-greu â chyflogwyr. Rydym yn canolbwyntio ar ddarparu gweithlu medrus a pherthnasol ar gyfer diwydiannau lleol, cenedlaethol a rhyngwladol. Rydym yn cynhyrchu’r gweithlu mae cyflogwyr yn dweud wrthym y maent ei eisiau a’i angen.  

Opsiynau astudio cynhwysol

Mae gennym amrywiaeth o opsiynau astudio, sy’n cynnig hyblygrwydd ac yn cefnogi dysgu gydol oes. Rydym yn falch mai llawer o’n myfyrwyr yw’r genhedlaeth gyntaf yn eu teulu i fynd i’r brifysgol. Mae bron i hanner myfyrwyr y Brifysgol yn dod o ardaloedd sydd yn nau gwintel isaf Mynegai Amddifadedd Lluosog Cymru. Mae hyn yn sylweddol uwch na’r cyfartaledd ar gyfer sefydliadau addysg uwch yng Nghymru a’r Deyrnas Unedig.  

Rydym wedi ymrwymo i greu amgylchedd croesawgar a chynhwysol lle gall pawb ffynnu. Rydym yn gweithio gyda’n myfyrwyr i’w cefnogi i gwblhau eu hastudiaethau’n llwyddiannus a dechrau ar y gyrfaoedd maent wedi’u dewis.  Rydym hefyd yn Brifysgol Noddfa. Mae hyn yn cydnabod ein hymrwymiad i greu diwylliant croesawgar ar gyfer pobl sy’n ceisio lloches ar ein campysau a thu hwnt.