Llwyddiant i un o gyn-fyfyrwyr PDC gyda ffilm yn ennill Oscar

Mae un o raddedigion Prifysgol De Cymru (PDC) wedi cael llwyddiant am yr eildro y mis hwn, yn rhan o'r tîm fu’n gweithio ar ffilm sydd wedi ennill Oscar.

Roedd Rosie Walker, a raddiodd yn 2012 gyda gradd BA (Anrh) mewn Effeithiau Gweledol a Graffeg Symud, yn rhan o'r tîm yn DNEG fu'n gweithio ar y ffilm Tenet, a enillodd y wobr Effeithiau Gweledol Arbennig. Enwebwyd y ffilm hefyd yn y categori Dylunio Cynhyrchu Gorau.

Hwn oedd yr ail lwyddiant o fewn mis i’r ffilm, a enillodd y categori Effeithiau Gweledol Arbennig yng Ngwobrau Ffilm yr Academi Brydeinig (BAFTA) ychydig wythnosau'n ôl.  Roedd y BAFTAs hefyd yn cynnwys gwaith gan nifer o raddedigion eraill PDC. Gallwch ddarllen y manylion llawn am hynny fan hyn.

Mae Rosie yn gyn ddarlithydd Effeithiau Gweledol yn PDC, ac mae bellach yn gweithio i DNEG yn Vancouver, Canada.

Dywedodd Jack Phillips, Uwch Ddarlithydd Effeithiau Gweledol a Graffeg Symud PDC: "Mae'n wych bod talentau Rosie wedi cael eu cydnabod fel hyn drwy effeithiau gweledol arobryn Tenet.

"Mae'n anhygoel ei gweld hi'n mynd o nerth i nerth, o raddio ar y cwrs i gael ei chydnabod gan un o'r anrhydeddau uchaf mewn Effeithiau Gweledol.

"A hithau’n gyn-ddarlithydd gyda thîm BA (Anrh) Effeithiau Gweledol a Graffeg Symud, mae Rosie yn enghraifft o'r ddawn a'r profiad sydd o fewn y cwrs yn PDC, ac yn dangos sut mae myfyrwyr yn cael eu meithrin a’u cefnogi i fwrw yn eu blaen gyda’u gyrfaoedd."