Ffilm animeiddiedig sbŵci gan gyn-fyfyrwyr PDC yn cyrraedd y sgrin fawr

Yn ddiweddar, fe gyrhaeddodd ffilm animeiddiedig dull stopio a symud, sydd wedi ennill gwobrau ac a grëwyd gyda chymorth graddedigion Prifysgol De Cymru (PDC), sinemâu ledled y wlad ar gyfer penwythnos Calan Gaeaf.

Wedi ei hysgrifennu a’i chyfarwyddo gan Mike Mort, sydd wedi ennill dau BAFTA, mae Chuck Steel: Night of the Trampires, a grëwyd gan gwmni Animortal Studio o Ben-y-bont ar Ogwr, yn dal ar gael i'w gweld yn Showcase Cinema, Nantgarw.

Yn cynnwys lleisiau Jennifer Saunders a Paul Whitehouse yn ogystal â Mort ei hun, mae'r ffilm gomedi arswyd gyffrous yn adrodd hanes plismon renegad anghonfensiynol di-lol, Chuck Steel, sydd â gwaith mawr o’i flaen pan fo’n sylweddoli bod drwg mawr ar fin taro dinas Los Angeles; y Trampires – fampirod a thrampiaid hybrid.

Dyluniodd Mike y prif gymeriad, Chuck Steel, yn ei lyfr nodiadau ysgol dros 25 mlynedd yn ôl yn wreiddiol, a datblygodd y sgript ar gyfer y ffilm 10 mlynedd yn ôl. Nawr, ar ôl ffilmio am 4 blynedd gyda 425 o bypedau, a gydag oedi yn sgil y pandemig Covid, mae Chuck Steel yn cyrraedd y sgrin fawr o’r diwedd.

Mae Mike yn hael ei glod i’r graddedigion o PDC a fu’n gweithio ar y ffilm: "Mae Cymru wedi ei hen sefydlu ei hun fel un o'r canolfannau creadigol gorau yn y byd ar gyfer animeiddio, ac roedden ni’n hynod ddiolchgar am yr ymroddiad, yr angerdd a’r sgiliau y cyfrannodd myfyrwyr a graddedigion PDC at y prosiect. Rwy’n siŵr eu bod wedi ennill profiad amhrisiadwy o'u hymwneud â'r ffilm, ac rwy'n siŵr hefyd y byddan nhw'n mynd yn eu blaen i gael gyrfaoedd gwerth chweil yn y diwydiant a helpu i gadw animeiddio Cymru'n fyw."

Astudiodd llawer o animeiddwyr y ffilm Animeiddio yn PDC, ac roedden nhw hefyd yn rhan o'r tîm a fu'n gweithio ar A Shaun the Sheep Movie: Farmageddon ac a enwebwyd am BAFTA.

Roedd Ed Jackson, a raddiodd o PDC yn 2004, yn un o'r animeiddwyr a fu'n gweithio ar y ffilm. Dywedodd: "Roedd gweithio ar Chuck Steel yn brofiad anhygoel. Er mai ffilm yw hi, roedd yn teimlo fel cynhyrchiad cyfres, o ran y tîm a chyfeillgarwch y criw’n gyffredinol. 

"Hwn oedd yr animeiddiad mwyaf heriol i fi ei wneud erioed; gorfod cerfio a chysoni symudiadau gwefusau Chuck Steel ymhob ffrâm animeiddio. Ond hwn oedd yr un mwyaf gwerth chweil hefyd – roeddech chi wir yn teimlo eich bod chi’n gweithio ar rywbeth unigryw ac arbennig. Does neb wedi gwneud, na cheisio gwneud, rhywbeth fel hyn mewn animeiddio stopio a symud erioed, ac rwy'n annog pawb sydd wrth eu bodd gyda’r ffurf hon ar gelf yn gwylio’r ffilm tra’i bod hi ar gael.”

Mae Henry Nicholson, un arall o animeiddwyr y ffilm, yn ddarlithydd yn PDC. Dywedodd: "Roedd rhai o'r technegau a ddefnyddion ni ar y ffilm hon yn gwbl newydd, heb eu gwneud erioed o'r blaen; megis saethu gyda chamera go-pro ynghlwm wrth ddoli, gyda chasyn wedi'i addasu i gynnal lensys bach. Roedd llawer o dreialu, a methu, i ddechrau, er mwyn cael yr olwg roedden ni am ei chael. Ac roedd hynny’n nodweddiadol o’r prosiect cyfan – mae’n ‘wahanol’ iawn, yn annhebyg i unrhyw beth arall, ond roedd y cyfan yn ychwanegu at y teimlad ein bod ni’n gweithio ar rywbeth eithaf arbennig."

Dywedodd Sarah Strickett, Darlithydd mewn Animeiddio yn PDC: "Rydyn ni’n falch iawn bod cynifer o’n graddedigion wedi gweithio ar y ffilm hon. Mae animeiddio stopio a symud yn dod yn hynod boblogaidd unwaith eto, ac mae Chuck Steel yn ardderchog – mae'n anhygoel o ddoniol a gwych."

Dywedodd Sean Gregory, un arall o’r animeiddwyr a raddiodd o PDC yn 2014: “Roedd yn brofiad anhygoel gweithio ar Chuck Steel. Roedd yr holl animeiddiad wyneb wedi'i gerflunio â llaw fesul ffrâm, felly roedd yn brofiad dysgu da gweithio gyda chlai ar y lefel honno o fanylion. Roedd hefyd yn wych cael fy nghyfarwyddo gan Mike Mort. Roedd ei weledigaeth mor glir gyda'r ffilm gan ei fod yn gwybod yn union beth yr oedd am ei weld. Felly mi wnes i wir afael yn yr hyn yr oedd yn mynd amdano ar unwaith. Roedd hefyd yn hwyl gweithio gyda chymaint o ffrindiau a graddedigion USW; roedd yn teimlo fel criw o ffrindiau yn gwneud ffilm mewn warws fawr, felly roedd yna ymdeimlad gwych o gymuned.

“Mae angen i bobl fynd i weld y ffilm hon oherwydd bod pob ffrâm yn llawn manylion a finesse. Mae mor sinematig ac mae yna wir gelf ym mhobman rydych chi'n edrych, felly mae angen i chi ei weld ar y sgrin fwyaf y gallwch chi ddod o hyd iddi. Mae hefyd yn ddoniol iawn ac nid yw'n cymryd ei hun o ddifrif, sy'n rhywbeth rwy'n ei edmygu'n fawr mewn ffilm. Gweithiodd cymaint o bobl dalentog arno a dylai cymaint o bobl ei fwynhau!”

I gael rhagor o wybodaeth, ewch i www.chucksteelthemovie.co.uk.