Wythnos Entrepreneuriaeth Fyd-eang: Holly yn dod â nwyddau cartref cynaliadwy i Gymru

Fel rhan o Wythnos Entrepreneuriaeth Fyd-eang, rydym yn canolbwyntio ar nifer o raddedigion o PDC sydd wedi troi eu diddordebau yn fusnes ffyniannus.

Mae Holly Lloyd, a raddiodd o BA (Anrh) Ffotograffiaeth yn 2019, ar fin lansio ei busnes ei hun yn gwerthu nwyddau cartref cynaliadwy, gyda ffocws ar ddefnyddio deunyddiau wedi'u hailgylchu.

Siop ar-lein yw Tŷ-Celyn sy'n darparu cynhyrchion ecogyfeillgar i'ch cartref, o bowlenni, potiau a byrddau torri wedi'u gwneud o blastig wedi'i ailgylchu, i rygiau a matiau diod ffabrig a grëwyd gan ddefnyddio edafedd PET (Tereffthalad Polyethylen), math o ffibr polyester wedi'i wneud o gynhwyswyr plastig wedi'u hailgylchu PET. Bydd y siop hefyd yn stocio ystod o gynhyrchion wedi'u gwneud o ddeunyddiau cynaliadwy fel lliain, bambŵ, cywarch neu forwellt.

Sefydlodd y fenyw 29 oed, o Bowys, Canolbarth Cymru, ei busnes ar ôl blynyddoedd o fod yn angerddol am gynaliadwyedd a materion amgylcheddol.

“Yr wyf bob amser wedi ceisio gwneud fy ngorau i wneud dewisiadau gwell, a fyddai’n cael llai o effaith ar y blaned, ond ni theimlais erioed fy mod yn gwneud digon,” meddai Holly.

“Gwyddwn erioed fy mod i wir eisiau cychwyn fy musnes fy hun un diwrnod, ond doeddwn i ddim yn ddigon dewr i gymryd y naid yn syth ar ôl graddio. Yna daeth y Rhaglen Cyflymydd Lansio anhygoel a gynigiwyd gan PDC.

“Cyn y rhaglen Cyflymydd, syniad yn unig oedd fy musnes, ond mae wedi rhoi cyfle perffaith i mi droi fy mreuddwyd yn realiti. Mae'r rhaglen wedi fy helpu mewn cymaint o ffyrdd, yn ogystal â rhoi hwb i'm hyder a'm hunangred y gallaf wneud fy musnes yn llwyddiant.”

Mae'r cyllid a ddarparwyd gan y Rhaglen Cyflymydd Lansio yn caniatáu i Holly yr amser sydd ei angen arni i ganolbwyntio ar ei busnes yn llawn amser, heb straen cyllid a chostau byw misol. Mae hefyd wedi ei chynorthwyo i gynllunio ei chostau cychwyn busnes cychwynnol a'i chyllideb fisol yn effeithiol, er mwyn helpu i symud y busnes yn ei flaen.

Ychwanegodd: “Mae'r cyngor o sesiynau hyfforddi a chymorth un i un a gefais ar y rhaglen hyd yn hyn wedi bod yn anhygoel ac yn ysgogol iawn, yn ogystal â darparu offer a gwybodaeth allweddol sydd eu hangen arnaf i gael y dechrau gorau ar fy nhaith fusnes.”