Yr Athro Donna Whitehead yn ymuno â PDC fel Dirprwy Is-Ganghellor newydd

Yr Athro Donna Whitehead

Mae’r Athro Donna Whitehead yn ymuno â Phrifysgol De Cymru heddiw (dydd Llun 15 Tachwedd) fel Dirprwy Is-Ganghellor newydd y Brifysgol.

Gan ymuno â Bwrdd Gweithredol PDC, bydd yr Athro Whitehead yn adrodd yn uniongyrchol i’r Is-Ganghellor a bydd yn helpu i yrru gweithrediad Strategaeth 2030 y Brifysgol yn ei blaen, gan ganolbwyntio’n benodol ar ddarparu addysgu academaidd arloesol o ansawdd uchel, tyfu ein cyfran o’r farchnad a phrofiad myfyrwyr rhagorol.

Mae'r Athro Whitehead yn ailymuno â PDC o Brifysgol Metropolitan Llundain, lle'r oedd yn Ddirprwy Is-Ganghellor. Cyn hynny, roedd yr Athro Whitehead yn Ddirprwy Is-Ganghellor a Deon Gweithredol y Gyfadran Busnes a'r Gyfraith yn UWE. Yn flaenorol, mae'r Athro Whitehead wedi gweithio ym Mhrifysgol De Cymru fel Dirprwy Ddeon y Gyfadran Busnes a Chymdeithas ac mae'n dod â chyfoeth o brofiad gyda hi mewn creu amgylcheddau dysgu arloesol a chynhwysol.

Dywedodd Dr Ben Calvert, Is-Ganghellor a Phrif Swyddog Gweithredol ym Mhrifysgol De Cymru: “Rwy’n falch iawn o groesawu’r Athro Whitehead yn ôl i PDC fel ein Dirprwy Is-Ganghellor. Bydd yr Athro Whitehead yn gweithio i ddatblygu ein portffolio fel ei fod yn cyd-fynd â'n huchelgeisiau strategol ac i sicrhau twf cytbwys a chynaliadwy i PDC.

“Wrth i ni ganolbwyntio ar y dyfodol, a chyflawni ein Strategaeth 2030 PDC, gwn y bydd Donna yn gwneud cyfraniad sylweddol. Mae ei hangerdd am gyfle cyfartal o fewn addysg uwch yn cyd-fynd yn berffaith â'n hymrwymiad i ehangu cyfranogiad. Edrychaf ymlaen at weithio'n agos gyda hi i greu profiadau dysgu arloesol a chynhwysol i'n holl fyfyrwyr."

Dywedodd yr Athro Whitehead: “Rwy’n falch iawn o ymgymryd â’r rôl fel Dirprwy Is-Ganghellor ym Mhrifysgol De Cymru. Mae'n brifysgol rwy'n ei hadnabod yn dda ac yn mynd trwy drawsnewidiad cyffrous trwy ei Strategaeth 2030 PDC. Mae ei chynlluniau a'i huchelgais wedi creu argraff fawr arnaf.

“Rwy’n edrych ymlaen at weithio gyda chydweithwyr a grŵp ehangach o randdeiliaid i barhau i arallgyfeirio ein portffolio cyrsiau, gwella ein cysylltiadau diwydiant ac, yn bwysicaf oll, sicrhau bod pob myfyriwr yn cael cyfle i gaffael y sgiliau sy’n angenrheidiol i lwyddo yn eu gyrfa ddewisol a gwneud eu marc yn y byd.”