Myfyrwyr ffilm yn ymuno â'r heddlu i godi ymwybyddiaeth o droseddau bywyd gwyllt
10 Awst, 2022
/prod01/channel_2/media/university-of-south-wales/site-assets/images/news/2022/08-august-/Rob_Taylor_Sam_Meller.jpg)
Rob Taylor, Cydlynydd Heddlu Troseddau Cefn Gwlad a Bywyd Gwyllt Cymru, yn cyflwyno darn arian coffaol i Luca Bergonzini, myfyriwr Ffilm
Mae myfyrwyr ffilm ym Mhrifysgol De Cymru wedi gweithio mewn partneriaeth â Chydlynydd Bywyd Gwyllt a Throseddau Gwledig cyntaf Cymru gyfan i helpu i godi ymwybyddiaeth o droseddau bywyd gwyllt yn y DU.
Bu’r grŵp o fyfyrwyr ail flwyddyn BA (Anrh) Ffilm yn cydweithio â Rob Taylor i gynhyrchu pum ffilm fer yn mynd i’r afael â phroblemau troseddau gwledig a bywyd gwyllt, a lluniwyd y cysyniad o adrodd y stori o safbwynt yr anifeiliaid, a oedd erioed wedi ei wneud o'r blaen.
Dywedodd Rob, sydd wedi bod yn ei swydd ers mis Gorffennaf y llynedd: “Er bod gan yr heddlu bresenoldeb rhagorol ar y cyfryngau cymdeithasol, mae mynediad cyfyngedig at alluogi ffilm, ac felly fe es i at PDC gyda’r syniad o ofyn i fyfyrwyr Ffilm ein helpu i edrych ar y materion yn ymwneud â throseddau cefn gwlad a bywyd gwyllt o ongl newydd.”
Ar ôl briffio’r myfyrwyr ar brif flaenoriaethau bywyd gwyllt yr heddlu yn y DU, penderfynodd y grŵp ganolbwyntio ar y peryglon i ystlumod, moch daear, adar ysglyfaethus a photsio. Gan fod y ffilmiau i’w defnyddio ar gyfryngau cymdeithasol, maent i gyd yn fyrrach na 2 funud yr un ac wedi’u cynllunio i ddal sylw’r cyhoedd, gyda’r ‘anifeiliaid’ yn cael eu cyfweld yn ddienw.
Dyma 'Bruce' yr Ystlum, sy'n disgrifio sut y cafodd ef a'i deulu eu gwneud yn ddigartref drwy ddymchwel adeiladau. Mae’n drosedd tarfu ar ystlumod yn eu clwydfan:
/prod01/channel_2/media/university-of-south-wales/site-assets/images/15-placeholder-images/Ty%C3%8C%C2%82-Crawshay-_49783-(1).jpg)
Ymhlith y ffilmiau eraill yn y gyfres mae:
'Betty' y Moch Daear, goroeswr yn baetio mochyn daear
'Barry' y Bwncath, tyst i droseddau gwledig
'Simon' y Stag, goroeswr potsian
Ychwanegodd Rob: “Mae troseddau gwledig a bywyd gwyllt yn broblem enfawr ledled y DU, ond mae’n syndod faint o bobl sydd ddim yn gwybod am y problemau y gall eu hachosi. Roedd yn bwysig bod yr hyn a gynhyrchwyd hefyd yn ceisio sylw'r cenedlaethau iau, fel eu bod yn tyfu i fyny yn ymwybodol o’r materion hyn.
“Mae defnyddio’r syniadau ffres gan y myfyrwyr, a’r mynediad at dechnoleg sydd ganddyn nhw, yn hollbwysig, yn ogystal â’u gwybodaeth a’u profiad o lwyfannau cyfryngau cymdeithasol. Mae eu gwaith ffilm eithriadol wedi’i dderbyn a’i rannu’n eang ledled y DU, nid yn unig gan yr heddlu ond gan sefydliadau fel yr Ymddiriedolaeth Moch Daear sy’n defnyddio’r fideos yn eu hymgyrch ymwybyddiaeth ddiweddaraf. Bydd y ffilmiau hyn yn gwneud gwahaniaeth mawr i godi ymwybyddiaeth.”
Roedd Luca Bergonzini yn un o'r myfyrwyr a helpodd i gynhyrchu'r ffilmiau.
Dywedodd y dyn 21 oed, sy'n byw yng Nghaerdydd ac yn wreiddiol o Ddyfnaint, fod yr holl brofiad yn ddefnyddiol iawn i'w baratoi ar gyfer y diwydiant.
“Roedd y prosiect yn ddiddorol ac yn ddefnyddiol iawn i mi, gan ei fod yn wahanol i unrhyw beth roeddwn i wedi gweithio arno o’r blaen,” meddai Luca.
“Roedd yn hwyl arbrofi gyda’r arddull cyfweliad a dod o hyd i’r cyfuniad cywir o ddifrifoldeb a chomedi i gyfleu’r pwyntiau. Roedd yn ddefnyddiol iawn cael profiad y cleient gyda Rob, a oedd yn ardderchog ac yn barod i helpu. Rwy’n falch iawn y gall y gwaith rydym wedi’i wneud fynd rhagddo i wneud rhywfaint o les a hysbysu pobl am droseddau bywyd gwyllt a helpu i’w atal.”
Bu ei gyd-fyfyriwr Sam Meller, sy’n 21 oed ac sydd hefyd yn byw yng Nghaerdydd, yn gweithio fel peiriannydd sain ar y ffilmiau. “Roedd gweithio ar y prosiect hwn yn gyfle gwych i mi ddatblygu sgiliau pellach mewn stiwdio,” meddai Sam, sy’n wreiddiol o Goed Duon.
“Doeddwn i ddim wedi treulio llawer o amser yn yr amgylchedd hwnnw oherwydd i’r pandemig COVID-19 amharu ar ein hastudiaethau yn ystod y flwyddyn gyntaf, felly roedd yn wych gweithio ochr yn ochr â’r criw a’u gwylio’n creu cymeriadau gwych.
"Mae’r stori yn hybu neges mor gryf, ac roedd yn fraint gweithio ar rywbeth all gael effaith bositif.”
Ychwanegodd Sally Lisk-Lewis, Uwch Ddarlithydd mewn Ffilm Ddogfennol yn PDC: “Mae hwn wedi bod yn gydweithrediad hynod fuddiol ar y ddwy ochr, ac yn gyflwyniad gwych i ddiwydiant ac arfer proffesiynol. Rwyf wrth fy modd gyda’r hyn y mae’r myfyrwyr creadigol hyn wedi’i gyflawni, ar ben hynny, y cyrhaeddiad a’r effaith y mae eu fideos wedi’u cael ar gyfryngau cymdeithasol.”
