Mae graddedigion ffisioleg yn cyfrannu £22.6 biliwn i economi’r DU bob blwyddyn

Yr Athro Damian Bailey

Mae adroddiad newydd sy’n cael ei lansio yn y Senedd heddiw ac sy’n cynnwys astudiaeth achos o Brifysgol De Cymru (PDC) yn dangos bod graddedigion ffisioleg yn cyfrannu £22.6 biliwn i economi’r DU bob blwyddyn. Mae hyn yn gyfwerth â chynnal 777,200 o swyddi.

Yn y dadansoddiad annibynnol cyntaf o’i fath i feintioli effaith addysg ffisioleg ar economi’r DU, canfuwyd bod pob £1 a fuddsoddir gan fyfyriwr yn eu haddysg ffisioleg yn rhoi £4.40 iddynt mewn cyflogau uwch yn y dyfodol.

Mae tua 97% o fyfyrwyr sy’n astudio cyrsiau sy’n ymwneud â ffisioleg yn aros yn y DU ar ôl graddio, gan gyfrannu swm syfrdanol o £35.6 biliwn i gymdeithas a’r pwrs cyhoeddus trwy enillion uwch a refeniw treth ychwanegol. Hefyd, byddant yn arbed £825.9 miliwn mewn costau cymdeithasol ar draws gofal iechyd, budd-daliadau diweithdra a throseddau.

Mae'r dadansoddiad, a gynhaliwyd gan yr asiantaeth economi annibynnol Emsi Burning Glass ar gyfer y Gymdeithas Ffisiolegol a'r Academi Gwyddor Gofal Iechyd, yn dangos pwysigrwydd ac angen i ffisioleg fod wrth galon cyrsiau prifysgol, iechyd y cyhoedd a gofal clinigol.

Bydd yr adroddiad yn cael ei lansio yn y Senedd ddydd Mawrth 7 Mehefin mewn derbyniad a gynhelir gan Stephen Metcalfe AS ac yn cynnwys cyfraniadau gan Catherine Ross, Prif Swyddog Proffesiynau Gwyddor Gofal Iechyd yr Alban, a Chi Onwurah AS, Gweinidog yr Wrthblaid dros Wyddoniaeth. Mae'r digwyddiad hefyd yn cynnwys AS o bob rhan o'r wlad, yn ogystal â ffisiolegwyr, addysgwyr ac ymarferwyr blaenllaw.

Yn ogystal â'r dadansoddiad economaidd, mae'r adroddiad hefyd yn cynnwys astudiaethau achos sy'n dangos amrywiaeth ac effaith y galwedigaethau a gynorthwyir gan raddedigion ffisioleg. O PDC, siaradodd Damian Bailey, Athro Ffisioleg a Chymrawd Ymchwil Wolfson o’r Gymdeithas Frenhinol, am niwroddirywiad (colli gweithrediad yr ymennydd) a achosir gan gyfergyd rheolaidd mewn chwaraeon cyswllt.

Mae astudiaethau achos fel yr un hon yn dangos bod ffisiolegwyr, y tu hwnt i'r labordy, yn gweithio mewn cymunedau, ysbytai, lleoliadau chwaraeon elitaidd, ysgolion, prifysgolion, a llawer o amgylcheddau eraill, gyda manteision enfawr i'r gymdeithas gyfan.

Meddai’r Athro Bailey: “Fel ffisiolegydd integredig a Chymrawd y Gymdeithas Ffisiolegol, mae’n bleser mawr gennyf gyfrannu at yr adroddiad hollbwysig hwn, sy’n amlygu sut mae addysg a hyfforddiant ffisioleg gyda’i gilydd o fudd i’n cleifion, y cyhoedd a’r economi.”

Mae’r adroddiad yn canolbwyntio ar effaith economaidd cyrsiau sy’n ymwneud â’r gwyddorau ffisiolegol a ddarperir gan sefydliadau addysg uwch y DU o ran incwm ychwanegol i economi’r DU a swyddi a gefnogir. Mae’r canfyddiadau’n seiliedig ar ddata myfyrwyr o flwyddyn academaidd 2018-19. Gallai cyfanswm y cyfraniad i economi’r DU fod yn fwy na’r hyn a gyfrifwyd yn yr adroddiad hwn.

Darllenwch yr adroddiad llawn: www.physoc.org/physiologyeducation