Ymchwil plismona PDC yn creu argraff ffafriol ar yr Ysgrifennydd Gwladol

Ysgrifennydd Gwladol Cymru, David TC Davies

Ar ddydd Llun 13 Chwefror, daeth Ysgrifennydd Gwladol Cymru, David TC Davies, i Brifysgol De Cymru (PDC) i ddysgu mwy am raglenni ymchwil a datblygu'r Brifysgol.

Ffocws yr ymweliad oedd ymchwil plismona PDC. Cyfarfu’r Ysgrifennydd Gwladol â Dr Louise Bright, Cyfarwyddwr Gweithredol, Ymchwil ac Ymgysylltu â Busnes, a'r Athro Peter Vaughan, Cyfarwyddwr y Ganolfan Ryngwladol ar gyfer Plismona a Diogelwch.

Roedd yr ymweliad yn cynnwys taith o amgylch Canolfan Efelychiadau Hydra, sy'n darparu amgylchedd dysgu ac addysgu unigryw i fyfyrwyr PDC, o feysydd pwnc amrywiol, drwy gynnal senarios efelychiadol.

Yn ogystal, bu myfyrwyr sy’n aelodau o Uned Achosion Oer y Brifysgol yn sôn wrth David TC Davies am eu profiadau’n ymchwilio i achosion troseddol sydd heb eu datrys, achosion o bobl sydd ar goll, ac achosion o gamweinyddu cyfiawnder. Dan arweiniad Dr Cheryl Allsop, mae'r uned yn chwilio am gyfleoedd i symud achosion yn eu blaen, na fyddai o bosib yn cael y sylw a’r ffocws sydd eu hangen arnynt fel arall.

Dywedodd yr Athro Peter Vaughan: "Roeddem yn falch iawn o groesawu Ysgrifennydd Gwladol Cymru ac arddangos yr ymchwil helaeth sy'n cael ei gwneud yn y Ganolfan Ryngwladol ar gyfer Plismona a Diogelwch.

"Mae strategaeth PDC 2030 yn nodi trosedd, diogelwch a  chyfiawnder yn faes ymchwil ag effaith uchel, ac mae ffocws ar fuddsoddi yn y maes, a’i ddatblygu.  Mae ein hymchwil yn creu atebion ar gyfer heriau cymdeithasol ac economaidd, gydag ymchwilwyr yn gweithio ar draws ffiniau disgyblaethau i helpu busnesau, cymunedau, a llunwyr polisi i elwa ar eu hallbynnau ymchwil."

Dywedodd Ysgrifennydd Gwladol Cymru, David TC Davies: "Mae wedi bod yn wych ymweld  â PDC a chlywed yn uniongyrchol gan ymchwilwyr a myfyrwyr am y gwaith maen nhw’n ei wneud ym maes pwysig plismona a diogelwch. Dyma ymchwil y gellir ei gymhwyso at nifer o sectorau a bydd ganddo oblygiadau yn y byd go iawn i lawer o bobl.

"Mae Prifysgol De Cymru ar flaen y gad o ran ymchwil i faterion diogelwch allweddol, a hoffwn ddiolch iddi am ei gwaith anhygoel. Mae'n cyfrannu at yr enw ragorol sydd gan Brifysgolion Cymru am waith ymchwil a datblygu o'r radd flaenaf."