Anrhydedd allgymorth i Gymdeithas Rocedi PDC

Mae Cymdeithas Rocedi Prifysgol De Cymru (PDC) wedi’i chydnabod am y gwaith y mae’n ei wneud i ddatblygu’r genhedlaeth nesaf o beirianwyr y gofod.

Yng Nghystadleuaeth Rocedi Mach-23 a gynhaliwyd yng Nghanolfan Awyr Machrihanish yn Campbeltown, yr Alban, enillodd tîm PDC y wobr Allgymorth Gorau, gan guro cystadleuaeth gan 11 o brifysgolion eraill.

Cafodd y tîm ei gydnabod am ei weithgareddau allgymorth yn ystod 2022-2023, gan hyrwyddo STEM a’r gwaith ar ddatblygu peirianneg y gofod yng Nghymru.

Yn ystod y flwyddyn ymgysylltodd y tîm â mwy na 25 o ysgolion a thri choleg Addysg Bellach, a chymerodd ran mewn nifer o ddigwyddiadau a drefnwyd gan awdurdodau lleol a sefydliadau eraill. Roedd hyn yn cynnwys ymgysylltu’n uniongyrchol â bron i 500 o fyfyrwyr trwy weithdai, a mwy na 1,500 yn fwy yn ystod digwyddiadau, megis arddangosfeydd.

Mae’r Tîm Rocedi, sydd wedi bod yn rhedeg ers 2018, yn cael ei arwain gan fyfyrwyr, gyda chymorth gan yr Uwch Ddarlithydd Dr Leshan Uggalla a Dr Phil Charlesworth, sy’n athro gwadd yn PDC ac yn arweinydd technegol y Gymdeithas Rocedi.

“Rydym wrth ein bodd ein bod wedi cael ein hanrhydeddu yn y digwyddiad Mach-23 am y gwaith rydym yn ei wneud i ymgysylltu ag arbenigwyr posibl y dyfodol a’u hannog i ymddiddori yn y diwydiant gofod,” meddai Dr Uggalla.

“Yr hyn rydym wedi’i ddarganfod o’r sesiynau allgymorth hyn yw nad yw llawer o’r disgyblion yn sylweddoli bod mwy o gyfleoedd yn sector y gofod na bod yn ofodwr yn unig, mae angen arbenigwyr mewn pob math o ddisgyblaethau STEM ar y diwydiant, megis electroneg, mecaneg, telathrebu, mathemateg, cyfrifiadura, a gwyddor data, a, hefyd, o lawer o bynciau eraill y tu allan i feysydd STEM.

“Mae gallu cael myfyrwyr PDC yn rhan o’r allgymorth yn dangos i’r disgyblion iau bod pobl yn union fel nhw eisoes yn astudio i wneud y swyddi hyn, a gallant ddilyn yn ôl eu traed.”

Ychwanegodd Dr Charlesworth: "Mae ein myfyrwyr wedi gweithio'n galed i ysbrydoli'r genhedlaeth nesaf o wyddonwyr rocedi. Maent yn llwyr haeddu'r wobr hon."

Ychwanegodd llefarydd ar ran y tîm Rocedi: “Yn y gystadleuaeth, roeddem yn gallu lansio ein roced i 800 metr ac adennill pob rhan o’r roced yn llwyddiannus. Cwblhaodd ein prif lwyth ynni solar ei genhadaeth ac roedd yn gallu darlledu data uchder a thelemetreg byw i'n gorsaf ddaearol trwy gydol y lansiad.

“Roeddem hefyd yn falch iawn o ennill gwobr am y gwaith allgymorth gorau am ein gwaith gydag ysgolion a cholegau lleol yn ardal De Cymru.

“Rydym yn falch iawn o’n cyflawniadau. Mae’n syfrdanol gweld pa mor bell yr ydym wedi dod fel tîm, ein twf ni fel unigolion, a sut y mae wedi llunio lefel sgiliau tîm Rocedi Prifysgol De Cymru yn gadarnhaol. Wedi’r cyfan, ni fyddai wedi bod yn bosibl cwblhau prosiect mor gymhleth heb ymdrechion a sgiliau pob unigolyn.

“Rydym mor ddiolchgar i Brifysgol De Cymru am y cyfleoedd y mae wedi’u darparu i ni yn y gorffennol, ac rydym yn edrych ymlaen yn gyffrous at yr hyn sydd gan y dyfodol i’w gynnig.”

Mae'r tîm yn cynnwys Gayan Ramanayak, Mhres mewn Peirianneg (Gyriant Hybrid); Natcha Laethongkham - Mhres mewn Peirianneg (Gyriant Hybrid); Robert Tipping - BEng mewn Peirianneg Drydanol ac Electroneg; Emily Creedy - BSc Peirianneg a Systemau Cynnal a Chadw Awyrennau, ac Elango Nagasundaram - PhD mewn Peirianneg Electronig.

Diolchodd aelodau’r tîm hefyd i grŵp rheoli Cyfadran Cyfrifiadura, Peirianneg a Gwyddoniaeth PDC am ddarparu arweiniad a chyllid, eu cydweithwyr Michael Bassett ac Adam Jones am ddarparu cyngor ac asesiadau iechyd a diogelwch, cydweithwyr academaidd a thechnegol yn y gyfadran, cydweithwyr yn y timau marchnata a recriwtio myfyrwyr; a chydweithwyr gweinyddol, cyllid, caffael, lletygarwch a diogelwch yn PDC am eu cefnogaeth barhaus.