PDC yn lansio Cronfa Datblygu Llawryddion Media Cymru

Gall llawryddion y sector sgrin yng Nghymru nawr wneud cais am gymorth ariannol i fanteisio ar gyfleoedd hyfforddi, diolch i gronfa ddatblygu a ddarperir gan Brifysgol De Cymru.

Mae prosiect Sgiliau a Hyfforddiant Media Cymru yn cynnig hyd at gyfanswm o £1,500 y pen i dalu am golli enillion wrth ymgymryd â hyfforddiant sy'n berthnasol i ddatblygiad gyrfa personol.

Ar gyfer hyfforddiant a gaffaelir yn breifat gyda ffi ynghlwm, gellir ategu’r Gronfa Datblygu Llawryddion gan Raglen Sgiliau Hyblyg Llywodraeth Cymru, a fydd yn cyfrannu hyd at 50% o gyllid tuag at gost yr hyfforddiant.

Daw’r gronfa ar ôl i dîm yn PDC gynnal Arolwg Gweithlu Sgrin Cymru y llynedd – yr arolwg cyntaf ledled Cymru i asesu sgiliau, anghenion hyfforddi, agweddau a phrofiad y rhai sy’n gweithio ar draws y sector sgrin.

Dywedodd Dr James Davies, Cymrawd Ymchwil ym Mhrifysgol De Cymru a Media Cymru: “Rydym yn falch iawn o fod yn lansio Cronfa Datblygu Llawryddion PDC x Media Cymru. Diffyg amser, arian a gwybodaeth am gyfleoedd hyfforddi oedd y tri phrif reswm dros beidio ag ymgysylltu â hyfforddiant a nodwyd gan weithwyr llawrydd y sector sgrin yn ein Harolwg Gweithlu Sgrin Cymru.

“Mae bob amser yn rhoi boddhad mawr pan all ymchwil arwain at ymateb uniongyrchol i angen, a gobeithiwn fod y gronfa ddatblygu yn fenter a all gael effaith gadarnhaol, wych ar y sector sgrin. Gobeithio mai dim ond y dechrau yw hyn!”

I gael manylion ynghylch pwy all wneud cais am y Gronfa Datblygu Llawryddion a sut mae’n gweithio, ewch i wefan Canolfan Astudio’r Cyfryngau a Diwylliant mewn Cenhedloedd Bach PDC.