Arbenigwr o PDC yn arwain ar waith Hyb Arloesedd Seiber ar sgiliau

Mae gan Bennaeth Seiberddiogelwch Prifysgol De Cymru, Sharan Johnstone, rôl arweiniol yn yr Hyb  Arloesedd Seiber (HAS) sydd newydd ei sefydlu.

Cenhadaeth yr HAS, a ddatgelwyd yn ddiweddar gan Brifddinas-Ranbarth Caerdydd (P-RC), yw trawsnewid de Cymru yn glwstwr seiberddiogelwch blaenllaw erbyn 2030.  Ei nod yw gwneud hyn drwy greu piblinell o gynhyrchion seiberddiogelwch newydd o'r radd flaenaf, busnesau twf uchel, a thalent â sgiliau technegol.

Mrs Johnstone, a enwyd yn Brif Fenyw STEM y Flwyddyn Cymru yn ystod yr hydref y llynedd, yw Pennaeth Pwnc Seiberddiogelwch a Fforenseg Ddigidol PDC, a Chyfarwyddwr y Ganolfan Ragoriaeth Academaidd mewn Addysg Seiberddiogelwch, sydd wedi ennill safon aur gan y Ganolfan Seiberddiogelwch Genedlaethol (NCSC). Mae hi hefyd yn rheoli timau Allgymorth Seiber yn Gyntaf a’r Ganolfan Ecsbloetio Ddigidol Genedlaethol (NDEC) yn PDC.

Fel pennaeth y tîm Talent a Sgiliau yn yr HAS ar ran PDC, mae hi'n falch iawn o fod yn arwain ymdrechion i adeiladu sector seiber y rhanbarth.

"Nod gwaith sgiliau’r Hyb Arloesedd Seiber, sy'n brosiect ar y cyd rhwng Prifddinas-Ranbarth Caerdydd, Prifysgol Caerdydd, Prifysgol De Cymru, Tramshed Tech ac Alacrity, yw ailhyfforddi ac uwchsgilio 1,500  a mwy o bobl yng Nghymru i'w helpu i fynd i'r sector seiberddiogelwch, sy'n tyfu'n gyflym ac sy'n rhychwantu pob sector diwydiant, " meddai.

"Mae'n anrhydedd bod yn rhan o'r tîm talent a sgiliau, sydd ar hyn o bryd yn cynnal arolwg ymhlith cyflogwyr a gweithwyr i ddeall eu barn ar fwlch sgiliau’r presennol a’r dyfodol a, a lle mae angen cymorth drwy hyfforddiant, er mwyn sicrhau bod Cymru yn parhau i fod yn rym cystadleuol yn y sector."

Yn lansiad yr HAS yng Nghaerdydd, ymunwyd â gwleidyddion, arweinwyr diwydiant, ac academyddion gan gyllidwyr o bob cwr o'r DU.

Yn y digwyddiad, dywedodd Gweinidog Economi Llywodraeth Cymru, Vaughan Gething: "Mae Llywodraeth Cymru’n falch o gyd-ariannu'r HAS a’i chenhadaeth i drawsnewid Prifddinas-Ranbarth Caerdydd yn un o brif glystyrau seiber y DU erbyn 2030.

"Bydd yr HAS yn hanfodol i’r gwaith o gefnogi economi Cymru trwy greu swyddi â gwerth uchel a gweithlu medrus i gwrdd â gofynion y sector seiber-ddiogelwch.

"Bydd yr Hyb hefyd yn helpu i wireddu'r weledigaeth a nodwyd yn y Cynllun Gweithredu Seiber i Gymru a lansiwyd yn ddiweddar gan Lywodraeth Cymru, drwy hyrwyddo partneriaethau a chydweithio cryf fel y gallwn adeiladu ar ein hecosystem seiber a'i thyfu, gan ddod â manteision pellach fyth i'r economi a sicrhau dyfodol ffyniannus a gwydn i Gymru."

Mae Llywodraeth Cymru’n buddsoddi £3 miliwn yn yr Hyb newydd dros ddwy flynedd, gyda £3 miliwn o gyllid ar y cyd gan P-RC a £3.5 miliwn mewn nwyddau (a/neu wasanaethau) ac arian cyfatebol gan bartneriaid consortiwm.

Pwysleisiodd Kellie Beirne, Prif Swyddog Gweithredol, P-RC, bwysigrwydd y clwstwr i'r ardal.

"Mae’r HAS yn cynnig cyfle unigryw i ddod â phedair elfen - y byd academaidd, y llywodraeth, busnesau a chyfalaf – ynghyd, i greu grym ar gyfer creu sgiliau menter newydd, a’u defnyddio mewn ffordd arloesol i roi mantais gystadleuol i P-CR yn erbyn rhanbarthau eraill yn y DU."

Dywedodd yr Athro Pete Burnap, Cyfarwyddwr HAS: "Diolch i Lywodraeth Cymru a chefnogaeth P-RC, mae gan yr HAS gyfle i gyflymu twf y sector seiber yn Ne Cymru.  Mae’n gyfle unigryw i symbylu’r arbenigedd a'r buddsoddiad presennol yn y rhanbarth drwy ddod â phethau at ei gilydd i weithio fel clwstwr sy'n canolbwyntio ar ganlyniadau."

Yn ôl dadansoddiad o’r Sector Seiberddiogelwch gan Lywodraeth y DU yn 2022, mae tua 46 o fusnesau sy’n gysylltiedig â seiber wedi'u cofrestru yng Nghymru, yn cyflogi 4% o'r holl weithwyr seiberddiogelwch proffesiynol sydd yn y DU, gyda chyflog o £49,600 ar gyfartaledd yn ôl yr hysbysebion. Mae hefyd yn nod gan yr HAS ddenu cwmnïau nad ydyn nhw eto wedi’u hangori yng Nghymru i symud yma, ar sail y gweithgareddau datblygu talent heb eu hail sy’n digwydd yma, a fyddai'n creu mwy o swyddi gwerth uchel i bobl leol.

Mae'r Hyb Arloesedd Seiber yn sbarc|spark. Yn hafan i bobl dalentog sy'n creu mentrau newydd, mae sbarc|spark yn cysylltu entrepreneuriaid, sefydliadau, ac arweinwyr sector cyhoeddus gydag ymchwilwyr o'r radd flaenaf ac ymgynghorwyr proffesiynol.

I gael rhagor o wybodaeth am yr Hyb Arloesedd Seiber a'u cynlluniau ar gyfer y dyfodol, ewch i wefan yr Hyb yn https://canolfanarloeseddseiber.cymru/