Prifysgol De Cymru a Phrifysgol Örebro wedi derbyn £360,000 ar gyfer ymchwil diogelwch yr UE

Mae Prifysgol De Cymru (PDC) yn cydweithio ar brosiect ymchwil rhyngwladol, a reolir gan Brifysgol Örebro, sydd wedi sicrhau cyllid o £360,000 gan Gyngor Ymchwil nodedig Sweden.

O Brifysgol De Denmarc, bydd Jacob Öberg, Athro Cyfraith yr UE a phrif ymchwilydd y prosiect, yn gweithio ochr yn ochr â Christian Kaunert a Sarah Leonard, Athrawon Diogelwch Rhyngwladol PDC.

Dywedodd yr Athro Öberg: "Mae ein prosiect yn ceisio profi'r rhagdybiaeth bod yr Ardal Rhyddid, Diogelwch a Chyfiawnder Ewropeaidd wedi bod yn destun trawsnewidiad o faes polisi rhynglywodraethol, a reolir gan aelod-wladwriaeth i bolisi mwy cydwladol, lle mae sefydliadau'r UE wedi ennill pwerau a dylanwad dros amser.

"Mae elfen ryngddisgyblaethol y prosiect, o safbwynt cysylltiadau/gwleidyddiaeth gyfreithiol a rhyngwladol, yn eithaf gwreiddiol a hefyd yn ffactor sy'n cyfrannu at ariannu hael y prosiect hwn."

Dywedodd yr Athro Leonard "Bydd ein hastudiaeth tair blynedd yn ymchwilio i ba raddau y mae gan yr UE awdurdod dros ddiogelwch mewnol aelod-wladwriaethau. Mae hwn yn fater sensitif iawn i aelod-wladwriaethau oherwydd ei fod yn mynd i galon sofraniaeth genedlaethol a hunaniaeth genedlaethol.

"Bydd y prosiect yn ymchwilio'n agos i ddatblygiad tri maes polisi - ymfudo lloches, cyfiawnder troseddol, a phlismona a diogelwch, gan ddadansoddi ac esbonio'r tueddiadau sy'n ymddangos."

Dywedodd yr Athro Kaunert: "Rydym yn falch iawn ein bod wedi sicrhau'r swm mawr hwn o gyllid gan gorff cyllido ymchwil llywodraethol mwyaf Sweden sy'n cefnogi ymchwil o'r ansawdd uchaf ym mhob maes gwyddonol. Mae'n eithaf prin eu bod yn dyfarnu cyllid i brifysgol yn y DU."