Clinig Cyngor Cyfreithiol PDC yn ennill gwobr LawWorks Cymru am y trydydd tro

Tîm CCC PDC: Darlithydd a Goruchwyliwr Clinig, Adam Collins; Myfyriwr y Gyfraith Kelly Adekola; Darlithydd a Goruchwyliwr Clinig, Hayley Brain; myfyriwr y Gyfraith Jarrad Pike; Cyfarwyddwr y Clinig Hannah Menard, myfyriwr y Gyfraith Amber Sharp; a Dirprwy Gyfarwyddwr y Clinig, Rachel Lewis

Mae’r Clinig Cyngor Cyfreithiol ym Mhrifysgol De Cymru (PDC) wedi ennill Gwobr LawWorks Cymru ar gyfer 2023, gan gydnabod 10 mlynedd o ddarparu cyngor cyfreithiol pro bono (am ddim) i rai o’r bobl fwyaf agored i niwed mewn cymdeithas.

Mae’r Gwobrau’n dathlu gwaith pro bono cyfreithwyr unigol, cwmnïau cyfreithiol, timau mewnol a myfyrwyr y Gyfraith, gyda chefnogaeth elusennau, asiantaethau cynghori, canolfannau cyfraith a gwirfoddolwyr nad ydynt yn ymwneud â’r gyfraith.

Yn cael eu cynnal yn Llundain ddydd Mawrth 5 Rhagfyr, cynhaliwyd Gwobrau Pro Bono LawWorks gan y newyddiadurwr a’r cyflwynydd Samira Ahmed, a’u cyflwyno gan Richard Atkinson, Is-lywydd Cymdeithas y Cyfreithwyr Cymru a Lloegr.

Sefydlwyd Clinig Cyngor Cyfreithiol PDC yn 2013 gyda’r nod o ddarparu mynediad at gyfiawnder i aelodau’r cyhoedd nad ydynt efallai’n gallu fforddio cyngor cyfreithiol. Dyma’r trydydd tro i’r Clinig gael ei enwi’n enillydd Gwobr LawWorks Cymru, ar ôl ennill yn flaenorol yn 2019, ac yn 2021 diolch i’w bartneriaeth â Gofal Cyfreithwyr Caerdydd.

O dan oruchwyliaeth gweithwyr cyfreithiol proffesiynol cymwys, gall myfyrwyr sy'n gwirfoddoli yn y Clinig lunio cyngor mewn sawl maes o'r gyfraith i helpu cleientiaid, gan eu paratoi ar gyfer y dyfodol trwy brofiadau byd go iawn, gan wella eu sgiliau ymarferol a'u dealltwriaeth o ofal cleientiaid.

Gwirfoddolodd mwy na 100 o fyfyrwyr yn y Clinig yn 2022, gan ddarparu cyngor cyfreithiol am ddim ar gyflogaeth, teulu, defnyddwyr, ymgyfreitha, busnes, profiant a chyfraith tai.

Datblygwyd y Clinig Cyngor Digartrefedd, mewn partneriaeth â Gofal Cyfreithwyr Caerdydd, fel clinig cynghori i'r rhai sy'n profi digartrefedd. Hyd yn hyn, mae 98 o gleientiaid wedi cael cymorth ar y prosiect hwn. Yn ogystal, mae Prosiect Cyfraith Stryd y Clinig yn gweld myfyrwyr y gyfraith yn rhoi cyflwyniadau i addysgu hawlwyr heb gynrychiolaeth ar weithdrefn Tribiwnlys Cyflogaeth.

Eleni lansiwyd prosiect newydd ar y cyd â Gweithredu yng Nghaerau a Threlái, elusen sy’n datblygu ac yn darparu prosiectau a gweithgareddau er budd cymunedau Caerau a Threlái yng Nghaerdydd. Bydd y prosiect hwn yn gweithio'n agos gyda meddygfeydd lleol a all atgyfeirio cleifion sy'n profi problemau cyfreithiol a allai fod yn effeithio ar eu hiechyd, a bydd y clinig yn darparu apwyntiadau cyfreithiol am ddim iddynt.

(chwith i'r dde): Newyddiadurwr a chyflwynydd Samira Ahmed, Cyfarwyddwr PDG PDC Hannah Menard, y Dirprwy Gyfarwyddwr Rachel Lewis, ac, Is-lywydd Cymdeithas y Cyfreithwyr Cymru a Lloegr, Richard Atkinson

Dywedodd Hannah Menard, Cyfarwyddwr y Clinig Cyngor Cyfreithiol ym Mhrifysgol De Cymru: “Mae’n fraint i fod wedi ennill y wobr hon yn ein 10fed flwyddyn o gynnig cyngor cyfreithiol pro bono drwy’r Clinig Cyngor Cyfreithiol.

“Mae’r wobr yn cydnabod gwaith gwych ein myfyrwyr, staff a phartneriaid cefnogi allanol – ni fyddai dim o hyn yn bosibl hebddynt. Rydym yn ddiolchgar iawn i’r Brifysgol am gefnogi’r clinig, ac rydym yn edrych ymlaen at barhau i gynnig y gwasanaeth hanfodol hwn i’r gymuned am y 10 mlynedd nesaf!”

Wrth sôn am enillwyr y gwobrau, dywedodd Rebecca Wilkinson, Prif Weithredwr LawWorks: “Llongyfarchiadau enfawr i’r enillwyr a phawb a gyrhaeddodd y rhestr fer – mae pob un ohonynt yn haeddu cydnabyddiaeth a dathliad o’r gwahaniaeth y maent yn ei wneud wrth alluogi mynediad at gyfiawnder.

“Mae yna reswm mai Gwobrau blynyddol LawWorks yw uchafbwynt ein blwyddyn; Mae clywed yr effaith y mae gwaith pro bono yn ei chael ar fywydau pobl yn parhau i ailddatgan ein hymrwymiad i ddatblygu a chefnogi gwaith pro bono cyfreithwyr o fewn yr ecosystem mynediad at gyfiawnder. Rydym mor falch o waith ein haelod-sefydliadau, a’r cyfreithwyr unigol oddi mewn iddynt, sy’n rhoi o’u hamser i helpu eraill.”