Gwobr am gydweithio i wella gofal cleifion sy'n cael eu heffeithio gan alcohol

Mae arbenigwyr o Grŵp Ymchwil Caethiwed ym Mhrifysgol De Cymru wedi ennill gwobr yn y categori Cydweithio mewn Ymchwil yng Ngwobrau blynyddol Rhwydwaith Ymchwil Glinigol Gorllewin Canolbarth Lloegr y Sefydliad Cenedlaethol dros Ymchwil Iechyd (NIHR), trwy gydnabod eu gwaith mewn hyrwyddo ymwybyddiaeth o niwed i'r ymennydd sy'n gysylltiedig ag alcohol (ARBD) a rôl hanfodol Timau Gofal Alcohol yng ngofal y rhai sydd â phroblemau iechyd sy'n gysylltiedig ag alcohol.

Bu PDC a'r Tîm Gofal Alcohol yn Ymddiriedolaeth GIG Sandwell a Gorllewin Birmingham (SWB) yn cydweithio ar werthuso'r model gofal arloesol a weithredwyd gan y Tîm Gofal Alcohol yn yr Ymddiriedolaeth.

Canfu'r gwerthusiad fod y Tîm wedi atal nifer o dderbyniadau heb eu cynllunio ar gyfer unigolion sy'n cyflwyno gyda symptomau diddyfnu alcohol, gan arwain at well darpariaeth gwasanaeth ac arbediadau cost i'r Ymddiriedolaeth.

Mae'r cydweithrediad hefyd wedi arwain at weithredu nifer o argymhellion sydd wedi'u cynnwys yn Fframwaith Triniaeth Camddefnyddio Sylweddau Llywodraeth Cymru ar gyfer Niwed i’r Ymennydd sy’n Gysylltiedig ag Alcohol (ARBD), a gyd-ysgrifennwyd gan y Grŵp Ymchwil Caethiwed, megis rhaglen addysgol ar-lein a fydd yn arwain at well ymwybyddiaeth o ARBD, cyflwr nad yw'n cael ei gydnabod yn sylweddol, ymhlith staff SWB.

Dywedodd Dr Darren Quelch o PDC: "Mae'r wobr hon yn cydnabod pwysigrwydd cydweithio ar gynhyrchu ymchwil academaidd o ansawdd uchel, ond hefyd ar strategaethau sy’n seiliedig ar dystiolaeth o ran gofal iechyd a gwella cleifion. Rydym yn gynnar yn ein partneriaeth ac yn obeithiol am barhau i ymdrechu i wella canlyniadau iechyd yn y boblogaeth hon sydd mewn perygl.”

Dywedodd Arlene Copland, Nyrs Arwain yn y Tîm Gofal Alcohol yn SWB: “Trwy weithio gyda'r Grŵp Ymchwil Caethiwed byddwn yn gwella gofal i'n cleifion sydd ag ARBD. Rydym yn gwybod os bydd rhywun yn stopio yfed, yn parhau i fod yn ddi-alcohol ac yn derbyn cefnogaeth dda, efallai y byddant yn gallu gwella'n rhannol neu'n llawn hyd yn oed.”