Mae Prifysgol De Cymru yn ymuno â datblygu partneriaethau ar gyfer hyfforddiant doethurol ledled y DU

Mae Prifysgol De Cymru (PDC) yn un o 89 o sefydliadau ar draws y DU sydd wedi’u cynnwys mewn carfan newydd o bartneriaethau hyfforddiant doethurol (DTPs).

Mae'r Cyngor Ymchwil Economaidd a Chymdeithasol (ESRC) wedi cyhoeddi y bydd yn buddsoddi mewn 15 o bartneriaethau hyfforddiant doethurol dros y pum mlynedd nesaf. Mae gweledigaeth ddiwygiedig ar gyfer hyfforddiant ôl-raddedig yn cael ei rhoi ar waith ar hyn o bryd yn dilyn ymateb ESRC i’r Adolygiad o Raddau Doethur yn y Gwyddorau Cymdeithasol yn 2021.

Mae buddsoddiadau mewn partneriaethau hyfforddiant doethurol yn elfen bwysig o weledigaeth gyffredinol Ymchwil ac Arloesi yn y DU (UKRI) a’r ESRC i ddatblygu talent a sgiliau ymchwil.

Bydd y buddsoddiadau hyn yn darparu ystod eang o gyfleoedd hyfforddiant datblygiad proffesiynol i wella galluoedd ymgeiswyr doethurol a datblygu’n bellach gweithlu medrus iawn o'r radd flaenaf ar gyfer y DU.

Mae’r partneriaethau hyfforddiant doethurol newydd yn dangos ymrwymiad yr ESRC i’w weledigaeth ddiwygiedig ar gyfer hyfforddiant doethurol, sy’n adlewyrchu canfyddiadau’r Adolygiad. Mae hyn yn cynnwys:

mabwysiadu dull mwy pwrpasol sy'n canolbwyntio ar y myfyriwr, gan ystyried y cynnwys a chyflwyno’r hyfforddiant
cynyddu hyd y radd doethur o dair blynedd i 3.5 mlynedd er mwyn cynnwys lleoliad tri mis a hyfforddiant ychwanegolcyflwyno Ymchwil ar Waith fel elfen graidd i sicrhau bod gan fyfyrwyr y sgiliau sy'n sylfaenol i lwybrau gyrfa academaidd ac anacademaid
gwreiddio egwyddorion cydraddoldeb, amrywiaeth a chynhwysiant (EDI) ar bob lefel
sicrhau arloesedd o ran cynnwys a chyflwyno’r hyfforddiant craidd, yn enwedig mewn perthynas â rheoli data, sgiliau digidol a'r sgiliau i ddadansoddi data mawr a chymhleth.
cryfhau arweiniad goruchwylio a chyfleoedd datblygiad proffesiynol i oruchwylwyr
Mae Prifysgol De Cymru yn rhan o Ysgol Graddedigion Cymru ar gyfer Partneriaeth Hyfforddiant Doethurol y Gwyddorau Cymdeithasol sydd hefyd yn cynnwys Prifysgol Caerdydd, Prifysgol Bangor, Prifysgol Aberystwyth, Prifysgol Metropolitan Caerdydd, Prifysgol Swydd Gaerloyw, a Phrifysgol Abertawe.

Dywedodd yr Athro Martin Steggall, Dirprwy Is-ganghellor Ymchwil ac Arloesi, Prifysgol De Cymru: “Mae Prifysgol De Cymru (PDC) yn falch o fod yn rhan o Ysgol Graddedigion Gwyddorau Cymdeithasol Cymru (WGSSS).

“Mae gan Brifysgol De Cymru hanes hir a nodedig o ymchwil sy’n cael effaith yn y gwyddorau cymdeithasol/polisi, fel y tystiwyd gan ganlyniadau’r Fframwaith Rhagoriaeth Ymchwil (REF) 2021 a osododd ein cyflwyniad fel y cyntaf yng Nghymru o ran effaith.

“Rydym yn ymfalchïo nid yn unig yng nghryfder ein hymchwil ond hefyd y cyfleoedd a’r profiadau sydd ar gael i’n myfyrwyr, a adlewyrchir yn y ffaith bod PDC wedi’i phleidleisio fel prifysgol orau’r DU yn yr arolwg profiad ymchwil ôl-raddedig diweddar.

“Bydd bod yn rhan o’r WGSSS yn gwella ymhellach y cyfleoedd ymchwil a hyfforddiant sydd ar gael i fyfyrwyr y gwyddorau cymdeithasol ac edrychwn ymlaen at weithio mewn cydweithrediad a phartneriaeth â chydweithwyr ledled Cymru a thu hwnt.”

Dywedodd Stian Westlake, Cadeirydd Gweithredol yr ESRC: “Ein gweledigaeth ar gyfer hyfforddiant ôl-raddedig yw y bydd yn datblygu ymchwilwyr y gwyddorau cymdeithasol i fod yn gystadleuol yn fyd-eang ac sy’n gallu gweithredu mewn amgylcheddau rhyngddisgyblaethol, cydweithredol sy’n cael eu harwain gan her ar draws ystod o sectorau ac sydd ag amrywiaeth o gefndiroedd a phrofiadau.

“Bydd y cyfle hyfforddiant doethurol hwn sydd wedi’i ailgynllunio a’i ehangu yn gwella’r profiad i fyfyrwyr gradd doethur ac yn hybu gallu’r DU.”