Enillwyr cystadleuaeth yn arwain y ffordd o ran dyfodol seiber i ferched yng Nghymru

Mae merched o bob rhan o Gymru wedi bod yn dathlu eu harbenigedd seiber mewn digwyddiad arbennig i nodi eu llwyddiant.

Yn dilyn y Gynhadledd Menywod mewn Seiber, a gynhaliwyd yng Nghanolfan Gynadledda Ryngwladol Cymru yng Nghasnewydd ar Chwefror 22, dathlodd cinio gyda'r nos lwyddiannau'r 10 tîm gorau o Gymru yng Nghystadleuaeth Merched CyberFirst.

Mae CyberFirst yn cael ei redeg gan y Ganolfan Seiberddiogelwch Genedlaethol (NCSC), sy'n rhan o'r GCHQ sy'n cael ei redeg gan y Llywodraeth, ac fe'i crëwyd i helpu pobl ifanc i archwilio eu hangerdd am dechnoleg trwy eu cyflwyno i fyd cyflym seiberddiogelwch.

Fe'i cyflwynir yng Nghymru gan Brifysgol De Cymru (PDC), mewn partneriaeth â Phrifysgolion Bangor ac Abertawe, a drefnodd ddigwyddiad dathlu ar gyfer timau Cymru a fu'n cystadlu yn y gystadleuaeth i ferched ledled y DU.

Daeth y timau a fynychodd o bedwar ban y wlad, gan gynnwys o Ysgol Uwchradd Gatholig yr Archesgob McGrath, Pen-y-bont; Ysgol Gyfun Gymraeg Bro Edern, Caerdydd; Ysgol Uwchradd Caerdydd; Ysgol Maelor, Wrecsam; Ysgol Uwchradd Gatholig Sant Joseph, Casnewydd; Ysgol Rougemont, Casnewydd; Ysgol Uwchradd Tywyn, Gwynedd; Ysgol Gyfun Porthcawl; ac Ysgol Alun Yr Wyddgrug.

Nid oedd disgyblion Ysgol Uwchradd Llanidloes yn gallu mynychu, felly mynychodd ddisgyblion o Ysgol Uwchradd Corpus Christi yng Nghaerdydd, a ddaeth yn 11eg yn y gystadleuaeth.

Yn ystod eu hymweliad â phrynhawn y Gynhadledd Menywod mewn Seiber, clywodd y merched gan nifer o fenywod sy’n gweithio yn y diwydiant seiber, yna cymryd rhan mewn Cystadleuaeth Dal y Faner, a drefnwyd gan y busnes seiberddiogelwch byd-eang Palo Alto Networks.

Yna cawsant dderbyniad diodydd a chinio gwobrau tri chwrs, lle roeddent yn gallu rhwydweithio â swyddogion y cwmnïau a oedd yn noddi'r byrddau, arbenigwyr sydd eisoes yn ymwneud â'r diwydiant seiber yng Nghymru, a gweithwyr o'r NCSC.

Dywedodd Holly Lidbury, sy'n Arweinydd Prosiect CyberFirst yn PDC, fod y cinio yn rhoi golwg i'r rhai a gymerodd ran yn y gystadleuaeth ar sut y gall y sector seiber gynnig gyrfa wych.

“Mae cymryd rhan yn y gystadleuaeth Merched CyberFirst yn agor byd seiber i genhedlaeth newydd, ac i fwy o ferched na fyddent efallai wedi'i weld fel galwedigaeth hyfyw,” dywedodd.

“Mae bwlch amlwg o hyd rhwng faint o fenywod a dynion sydd yn y busnes, felly mae cystadlaethau fel Merched CyberFirst, a'r digwyddiad dathlu, yn caniatáu i'r rhai a gymerodd rhan gwrdd â'r prif chwaraewyr yn y diwydiant, deall pa gyfleoedd gwaith y mae'r maes yn eu cynnig, a'r hyn a ddisgwylir gan y rhai sy'n gweithio yn y busnes seiber.

“Rydym yn ddiolchgar iawn i'r noddwyr am gefnogi'r gystadleuaeth a'r digwyddiad dathlu, ac yn estyn llongyfarchiadau i'r rhai a lwyddodd i ddathlu eu llwyddiant.”

Noddwyd y gynhadledd a'r digwyddiad Merched Seiber gan Hyb Arloesedd Seiber ac Admiral, tra noddwyd y byrddau gan Palo Alto Networks, Corassure, 13Fields, Airbus, SudoCyber, Wales & West Utilities, BT, CYSIAM, Goldilock, a Dŵr Cymru.

Mae Wales and West Utilities hefyd yn bartner diwydiant CyberFirst Cymru yng Ngholeg Sant Ioan Caerdydd, tra bod Airbus yn cynnig yr un peth ar gyfer Ysgol Uwchradd Gatholig Sant Joseph.

Dywedodd Jamie McCallion o 13FIELDS: “Rydym ni yn 13FIELDS yn awyddus i gefnogi talent y dyfodol sy'n dod i'r amlwg. Fel busnes sy'n eiddo i fenywod mewn seiber, gwyddom yn uniongyrchol bod yn rhaid i ni 'ei weld i’w brofi'. Mae'n wych gweld cymaint o ferched yn ceisio ac yn llwyddo yn y gystadleuaeth heriol, feirniadol a chyffrous hon.”

Dywedodd Daniel Locke o CORASSURE: "Mae grymuso'r genhedlaeth nesaf o weithwyr proffesiynol seiberddiogelwch yng Nghymru wrth wraidd cenhadaeth CORASSURE.

“Dyna pam rydym yn falch o noddi digwyddiad Merched CyberFirst Cymru, gyda ffocws arbennig ar hyrwyddo menywod mewn seiberddiogelwch. Rydym yn credu mewn adeiladu dyfodol digidol amrywiol a chynhwysol, lle mae pawb yn cael cyfle i arwain, arloesi a sicrhau ein byd."

Ychwanegodd Rupert Ryan o CYSIAM: “Mae CYSIAM yn falch iawn o noddi bwrdd yng Nghystadleuaeth Merched CyberFirst yng Nghymru. Rydym wedi ymrwymo i feithrin amrywiaeth a chynhwysiant yn y maes seiberddiogelwch trwy gefnogi mentrau sy'n annog merched ifanc i ddilyn gyrfa mewn seiber.

“Rydym yn cydnabod, fel sector, bod angen i ni ddechrau yn gynharach i ysbrydoli'r genhedlaeth nesaf o dalent fenywaidd i ystyried seiberddiogelwch fel dewis gyrfa realistig a chredadwy.

“Yn ogystal, mae noddi bwrdd yn rhoi cyfle i CYSIAM ymgysylltu â chyfranogwyr yn uniongyrchol, gan gynnig mewnwelediadau i'r diwydiant, cyfleoedd mentora a phosibiliadau rhwydweithio."