Hanesion Graddio | Mae Alex yn cyfnewid gwaith plymwr am reoli prosiectau diolch i'w radd

Mae Canolfan Gynadledda Ryngwladol Cymru yng Nghasnewydd unwaith eto wedi gweld miloedd o’n graddedigion yn croesi’r llwyfan yn eu cap a’u gŵn. I ddathlu, rydym yn rhannu straeon rhai o’n myfyrwyr ysbrydoledig.

Gadawodd Alex Gee, o Gaerdydd, yr ysgol heb fawr o hyder ar ôl llwyddo prin yn ei lefelau A, gan benderfynu dilyn prentisiaeth plymio a gwresogi yn hytrach na gwneud cais i brifysgol.

Fel plymwr cymwysedig, datblygodd yn gyflym yng Nghyngor Caerdydd, gan gymryd y naid yn ôl i fyd addysg yn ddiweddarach – ac yr wythnos hon mae’n graddio o BA (Anrh) Busnes gydag anrhydedd dosbarth cyntaf, ar ôl pedair blynedd o astudio’n rhan amser ochr yn ochr â gwaith llawn amser. Mae Alex hyd yn oed wedi dechrau yn ei swydd ddelfrydol fel rheolwr prosiect cynorthwyol gyda chwmni adeiladu Currie & Brown.

“Doeddwn i ddim yn gyflawnwr arbennig o uchel yn yr ysgol,” meddai Alex. “Roeddwn i ym mhen isaf fy nosbarthiadau ar y cyfan, ac er i mi wneud yn iawn yn fy TGAU, ni lwyddais i ennill graddau lefel A da iawn ac roedd fy hyder wedi’i guro – cymaint fel fy mod yn teimlo na fyddwn gallu datblygu fy addysg ymhellach.

“Diolch byth, ar ôl fy mhrentisiaeth fe ddes i’n blymwr cymwysedig ac es ymlaen i fod yn brentis corfforaethol yng Nghyngor Caerdydd, yna’n rheolwr adeiladu o fewn dwy flynedd i weithio yno. Roeddwn yn rheoli hyb cymunedol Powerhouse yn Llanedern, lle roeddwn yn gofalu am 12 o weithwyr ac yn gyfrifol am ddarparu gwasanaeth yr adeilad. Roedd hyn yn cynnwys optimeiddio ei wasanaethau, rhentu ystafelloedd i bartneriaid allanol a chydlynu digwyddiadau cymunedol ar raddfa fawr.”

Penderfynodd Alex wneud cais i PDC gan ei fod yn teimlo y byddai cymhwyster gradd yn helpu ei ragolygon gyrfa yn y dyfodol – ac roedd y cwrs Busnes yn ffit perffaith.

Dywedodd: “Roeddwn i wedi cael cryn dipyn o brofiad gwaith o fy rôl rheoli, felly roeddwn i’n teimlo mai dyma’r amser iawn i mi fynd i’r brifysgol o’r diwedd a gwneud defnydd da o’r wybodaeth honno yn fy astudiaethau. Roedd cydbwyso astudio rhan-amser gyda fy swydd yn heriol ar brydiau, ond roedd fy narlithwyr i gyd yn gefnogol iawn a mwynheais fy amser yn PDC.

“Mae cyflawni fy ngradd wedi rhoi cymaint mwy o hyder ac uchelgais i mi, ac mae wedi fy helpu i gyrraedd fy nod o weithio i gwmni sydd wedi hen ennill ei blwyf. Mae Currie & Brown hyd yn oed yn buddsoddi ynof i symud ymlaen i radd Meistr, sy’n gyfle gwych yr wyf yn ddiolchgar iawn amdano.”

Ychwanegodd Lisa Curtis, arweinydd cwrs BA Busnes: “Rwy’n hynod falch o ddatblygiad academaidd a phersonol Alex tra ar y cwrs. Mae ei ymroddiad a'i ymrwymiad tra'n gweithio'n llawn amser ac yn astudio'n rhan-amser wedi arwain at ennill gradd anrhydedd dosbarth cyntaf haeddiannol. Dymunaf yn dda iddo gyda'i gynllun i raddedigion yn Currie & Brown. Bydd yn ased i unrhyw gyflogwr.”