Dathlu ymchwil ysbrydoledig yng Ngwobrau Ymgysylltu ac Effaith PDC 2024

Effaith ar Drosedd, Diogelwch a Chyfiawnder

Hannah Coombs: Sbarduno Newid a Dylanwadu ar Bolisi ac Ymarfer mewn Plismona

I gwblhau rhaglen Prentisiaeth Gradd Cwnstabliaid yr Heddlu (PCDA) ar gyfer recriwtiaid newydd yr heddlu, mae'n ofynnol i swyddogion dan hyfforddiant gynhyrchu Prosiect Ymchwil ar Sail Tystiolaeth ar bwnc sy'n ymwneud â phlismona gweithredol. Mae cymhwyso'r prosiectau ymchwil hyn wedi gwella polisi ac ymarfer yn heddluoedd partner PDC wrth i raddedigion ddefnyddio'r wybodaeth a'r arferion gorau a enillwyd o'u prosiectau ymchwil yn eu rolau plismona o ddydd i ddydd.

Effaith Amgylcheddol Gynaliadwy

Jon Maddy: Diwydiant Sero Net yng Nghymru

Mae ymchwil gan Ganolfan Hydrogen PDC, o fewn y Ganolfan Ymchwil Amgylchedd Cynaliadwy, yn helpu i ddatgarboneiddio'r sectorau diwydiant trwm, trafnidiaeth ac ynni, a chyflawni ein nodau sero net. Mae'r ganolfan yn chwarae rhan ganolog yn niwydiant sero net Cymru, gan gefnogi’r broses o drosglwyddo Cymru i economi wyrddach.

Effaith ar Iechyd a Lles (Cyd-enillwyr)

Yr Athro Linda Ross: Paratoi Ymarferwyr Gofal Iechyd ar gyfer Gofal Ysbrydol

Arweiniodd ymchwil PDC i fynd i'r afael â bylchau mewn addysg gofal ysbrydol i nyrsys a bydwragedd at ddatblygu'r Fframwaith Cymhwysedd Gofal Ysbrydol. Wedi'i weithredu ym mhrifysgolion Cymru a'i fabwysiadu mewn rhaglenni ôl-gofrestru ledled Ewrop, mae'r fframwaith wedi dylanwadu ar newidiadau polisi a gwelliannau i ymarfer gofal iechyd yn rhyngwladol.

Dr Tom Owens: Cyfergyd mewn Chwaraeon – Gwella Lles Chwaraewyr

Mae cyfergydion sy'n gysylltiedig â chwaraeon yn effeithio ar filoedd o bobl ledled y byd bob blwyddyn, gan achosi pryder sylweddol i iechyd y cyhoedd. Mae ymchwil PDC i effeithiau hirdymor cyfergyd mewn chwaraeon fel rygbi a phêl-droed wedi sbarduno newidiadau polisi, mwy o ymwybyddiaeth, a gwell lles chwaraewyr.

Effaith ar y Diwydiannau Creadigol

Huw Swayne: Academi Sgrin Cymru

Mae cydweithio rhwng PDC a Chynghrair Sgrin Cymru wedi cynyddu talent leol o Gymru ac amrywiaeth yn y diwydiant ffilm a theledu drwy allgymorth mewn ysgolion, Colegau AB, canolfannau cymunedol a lleoliadau gan gynnwys gweithdai, dosbarthiadau meistr, a lleoliadau myfyrwyr a staff.

Arloesedd Busnes

Dr Adam Jones: Techneg Newydd ar gyfer Dadansoddiad Garwedd Arwyneb o Linellau Pysgota â Phlu 

Gan ddefnyddio arbenigedd PDC mewn ffotoneg ac electroneg, a gweithio mewn partneriaeth ag Airflo Fishing Products Ltd ac Applied Automation Ltd, aeth y prosiect i'r afael â heriau technegol hirsefydlog wrth gynhyrchu llinellau pysgota â phlu a thrwy hynny gynhyrchu cynnyrch gwell, lleihau amser segur, symleiddio’r broses rheoli ansawdd, a lleihau costau gweithredol. Mae'r gwaith wedi ennyn diddordeb gan ddiwydiannau eraill, ac mae’n tynnu sylw at ei botensial ehangach.

Effaith Ddinesig

Joanne Bowring: Partneriaeth Ymgysylltu Dinesig De Cymru

Mae Partneriaeth Ymgysylltu Dinesig De Cymru (SWCEP) yn gwella ymgysylltiad dinesig ac effaith gymdeithasol ym Mhrifddinas-Ranbarth Caerdydd drwy gynyddu gallu, meithrin newid diwylliannol, a chodi dyheadau addysgol ymhlith cymunedau a ymyleiddiwyd. Fel y bartneriaeth ddinesig ranbarthol gyntaf yng Nghymru, mae dull arloesol SWCEP yn cael ei ystyried ar gyfer ei ddyblygu mewn rhanbarthau eraill.

Ymgysylltu er Effaith

Dr Simon Newstead: Fframwaith Cenedlaethol Cymru ar gyfer Presgripsiynu Cymdeithasol

Mae gwaith gan Ysgol Ymchwil Presgripsiynu Cymdeithasol Cymru (WSSPR) wedi safoni terminoleg presgripsiynu cymdeithasol, gan alinio’r iaith a ddefnyddir yn ymarferol â pholisi a deddfwriaeth. Mae wedi llywio Fframwaith Cenedlaethol Llywodraeth Cymru ar gyfer Presgripsiynu Cymdeithasol ac wedi denu diddordeb cenedlaethol a rhyngwladol.

Gwyliwch yr holl fideos ar y rhestr fer ar Youtube.