Mae PDC yn sicrhau cyllid i feithrin talent greadigol a chyflogadwyedd

Mae Prifysgol De Cymru wedi derbyn bron i £70,000 o gyllid gan Lywodraeth Cymru i gefnogi twf Gŵyl Immersed – digwyddiad amlgyfrwng blynyddol sy’n cael ei redeg yn gyfan gwbl gan fyfyrwyr y Diwydiannau Creadigol – drwy raglen datblygu sgiliau newydd.

Mae Lucy Squire, Pennaeth Cerdd a Drama yn PDC, yn un o dderbynwyr y Gronfa Sgiliau Creadigol eleni, sy’n cael ei rhedeg gan Cymru Greadigol, sydd â’r nod o feithrin talent newydd a phresennol drwy hyfforddi ac uwchsgilio unigolion ar draws sawl sector creadigol, gan gynnwys sgrin, cerddoriaeth, technoleg drochi, animeiddio a gemau.

Bellach yn ei hail rownd, mae’r gronfa eisoes wedi bod o fudd i fwy na 27,000 o bobl, drwy ddarparu bron i 500 o gyrsiau hyfforddi a 435 o leoliadau uwchsgilio.

Bydd y cyllid o £69,887 yn cael ei ddefnyddio i ddatblygu rhaglen datblygu sgiliau technegol a chynaliadwyedd, ochr yn ochr â phrosiect ymchwil a chydweithrediad creadigol gyda Chomisiynydd Cenedlaethau’r Dyfodol, sy’n canolbwyntio ar y thema adfywio.

Nod y prosiect yw mynd â’r Ŵyl Immersed bresennol i gam nesaf ei datblygiad drwy ddod â diwydiant, y byd academaidd a’r gymuned ynghyd, drwy bartneriaethau amlddisgyblaethol.

Bydd y cydweithrediadau hyn yn cyfrannu at gynnwys cwricwlwm newydd, yn creu rhwydweithiau ac yn adeiladu sgiliau cyflogadwyedd y gellir eu cymhwyso ar draws y sectorau cerddoriaeth, ffilm, theatr a sgrin, gan ddarparu profiadau byd go iawn i gyfranogwyr.

Bydd y rhaglen datblygu sgiliau yn helpu PDC i feithrin y doniau sydd ar y gweill gyda phrosiectau pwrpasol sy’n cefnogi gweithwyr proffesiynol newydd i fodloni’r galw am sgiliau yn y diwydiannau creadigol.

Dywedodd Lucy: “Bydd y cymorth gan Cymru Greadigol yn galluogi PDC i gyflwyno rhaglen datblygu sgiliau flaengar i wasanaethu anghenion cynhyrchu a chynaliadwyedd y diwydiannau creadigol. Rydym yn gyffrous i ehangu’r cyfleoedd ledled Cymru ac yn edrych ymlaen at ddechrau arni.”

Meddai’r Gweinidog dros Ddiwydiannau Creadigol, Jack Sargeant: “Mae pwysigrwydd y diwydiannau creadigol i Gymru yn glir – nid dim ond creu swyddi y mae’n eu creu, mae ganddo gysylltiad annatod â’n diwylliant, ein llesiant a’n hunaniaeth.

“Rydym eisiau sector creadigol sy’n adlewyrchu ac yn cynrychioli ei gynulleidfaoedd, yn darparu cyfleoedd cyflogaeth teg a hygyrch ac yn denu, yn datblygu ac yn cadw talent o bob cefndir.”