Myfyrwyr ysgoloriaeth PhD yn ymuno â PDC wrth i geisiadau agor ar gyfer 2025

Mae tri myfyriwr wedi dechrau eu hastudiaethau ym Mhrifysgol De Cymru (PDC), a ariennir gan Ysgol Graddedigion Gwyddorau Cymdeithasol Cymru (YGGCC). Nod y fenter yw hyfforddi'r genhedlaeth nesaf o wyddonwyr cymdeithasol i fynd i'r afael â materion cymdeithasol dybryd.

Mae Jay Chard yn ymuno â'r Brifysgol i ddechrau ei ymchwil o'r enw ‘Gweithredu ar Eiriau: Asesiad o ymrwymiad prifysgolion y DU i Gyfiawnder Hinsawdd o fewn Strategaethau Sero Net a Chynaliadwyedd'.

Dywedodd: "Mae hwn yn gyfle cyffrous i fynd i'r afael â rhai o'r cwestiynau mwyaf sy'n wynebu cymdeithas heddiw. Rwy'n ymroddedig i archwilio ymatebion cymdeithasegol i'r argyfwng hinsawdd. Rwy'n edrych ymlaen at y cyfle datblygiad personol y mae'n ei gynrychioli, yn ogystal â'r cyfle i gyfrannu at bryderon cymdeithasegol ac amgylcheddol dybryd."

Tra bod Menna Evans yn ymchwilio i 'Diffyg Diogeledd Dŵr, Gwrthdaro a Throsedd: Rôl Addasu i Newid yn yr Hinsawdd a Mesurau Gwydnwch yn Afghanistan'. Dywedodd: "Mae'n anrhydedd enfawr derbyn yr ysgoloriaeth ymchwil hon ac felly dydw i dal ddim cweit yn gallu credu fy mod i wedi bod mor lwcus â hyn. Mae'n gyfle anhygoel ynddo'i hun i allu ymchwilio i bwnc yr wyf mor angerddol amdano, ac mae hefyd yn cynnig cyfleoedd hyfforddi a datblygu na fyddwn yn gallu cael mynediad atynt fel arall. Rwyf mor gyffrous i ddechrau arni a gwneud y gorau o bopeth y mae'r ysgoloriaeth ymchwil hon yn ei gynnig."

Mae Bishnu Bahadur Khatri yn teithio o Nepal i ymchwilio i 'Effeithio ar Newid Polisi i Wella Gwytnwch o ran Newid yn yr Hinsawdd o fewn Cymunedau dan Fygythiad yn Nepal’.

Dywedodd Bishnu: "Mae ennill yr ysgoloriaeth ymchwil yn gyfle anhygoel i gychwyn ar fy nhaith PhD. Wrth i mi baratoi i astudio yn PDC, rwy'n gyffrous i ymgysylltu â'i chymunedau academaidd ac ymchwil bywiog, gan gael mewnwelediadau gan ddarlithwyr ac ymchwilwyr nodedig wrth gydweithio â chyfoedion o'r un anian. Rwy'n edrych ymlaen at ddyfnhau fy ngwybodaeth, gwella fy sgiliau ymchwil, ac ehangu fy ngorwelion academaidd. Bydd yr ysgoloriaeth ymchwil hon yn fy ngrymuso i wneud y mwyaf o'm hastudiaethau, cyflawni canlyniadau effeithiol, a chwblhau fy nhaith PhD yn llwyddiannus fel y cynlluniwyd."

Dywedodd yr Athro Martin Steggall, Dirprwy Is-ganghellor Ymchwil ac Arloesi, PDC: "Rydym yn falch o fod yn rhan o Ysgol Graddedigion Gwyddorau Cymdeithasol Cymru.

"Mae gan PDC hanes hir a nodedig o ymchwil effeithiol yn y gwyddorau cymdeithasol/polisi, a amlygwyd gan ganlyniadau Fframwaith Rhagoriaeth Ymchwil 2021 a osododd ein cyflwyniad yn y safle 1af yng Nghymru am effaith. Rydym yn ymfalchïo yng nghryfder ein hymchwil, yn ogystal â’r cyfleoedd a'r profiadau sydd ar gael i'n myfyrwyr, sy'n cael ei adlewyrchu gan y ffaith fod PDC wedi cael ei phleidleisio'n brifysgol orau’r DU yn yr arolwg profiad ymchwil ôl-raddedig diweddar. Bydd bod yn rhan o'r YGGCC yn gwella'r cyfleoedd ymchwil a hyfforddiant sydd ar gael i fyfyrwyr y gwyddorau cymdeithasol ymhellach, ac edrychwn ymlaen at weithio mewn cydweithrediad a phartneriaeth â chydweithwyr ledled Cymru a thu hwnt."

Mae'r YGGCC, sy'n rhan o Bartneriaeth Hyfforddi at Ddoethuriaeth y Cyngor Ymchwil Economaidd a Chymdeithasol (ESRC), yn croesawu ceisiadau ar gyfer 2025. Y dyddiad cau yw 11 Rhagfyr 2024.

Fel cydweithrediad rhwng saith prifysgol, mae’r YGGCC yn cynnig llwyfan unigryw i ddarpar ymchwilwyr. Bydd y rhaglen yn darparu hyfforddiant arloesol ar draws 15 llwybr thematig, gan gynnwys rhai sy'n canolbwyntio ar ofal cymdeithasol, gwaith cymdeithasol a pholisi cymdeithasol, troseddeg a'r gyfraith. Bydd myfyrwyr yn elwa o gymorth helaeth, goruchwyliaeth ymchwil o'r radd flaenaf, a lleoliadau ymarferol i sicrhau eu bod mewn sefyllfa dda i wneud cyfraniadau ystyrlon i bolisi cyhoeddus a lles cymunedol.

Bydd y bartneriaeth, a ariennir gan ESRC, yn cynnig tua 360 o ysgoloriaethau dros bum mlynedd, gan greu cymuned ymchwil fywiog, ryngddisgyblaethol. Trwy bartneriaethau strategol gyda sefydliadau fel Llywodraeth Cymru a Chyfoeth Naturiol Cymru, mae'r YGGCC hefyd yn sicrhau effaith yn y byd go iawn, gan gynnig cyfleoedd i fyfyrwyr ymgysylltu'n uniongyrchol â'r rhai sy'n gwneud penderfyniadau a rhanddeiliaid.

Mae'r ysgoloriaeth ymchwil fawreddog hon wedi'i chynllunio i gefnogi unigolion o bob cefndir, gan adlewyrchu ymrwymiad i gydraddoldeb, amrywiaeth a chynhwysiant. I'r rhai sy'n ceisio dilyn PhD yn y gwyddorau cymdeithasol, mae'r rhaglen hon yn darparu cymorth ariannol yn ogystal â mynediad at rwydwaith di-ail llawn adnoddau academaidd a phroffesiynol ledled Cymru.

Am fwy o wybodaeth, ewch i wefan YGGCC. I wneud cais am ysgoloriaeth ymchwil yn PDC, defnyddiwch y dolenni canlynol:

Ysgoloriaethau Ymchwil mewn Gofal Cymdeithasol, Gwaith Cymdeithasol a Pholisi Cymdeithasol

Ysgoloriaethau Ymchwil yn y Gyfraith a Throseddeg