Podlediad Cymraeg newydd 'Pont' yn dathlu teithiau dysgwyr

Mae cyfres newydd o bodlediadau 'Pont' yn cael ei lansio fis yma ar Radio Cymru.

Cyflwynydd a chynhyrchydd y gyfres yw Dr Angharad Lewis, Arweinydd Cymraeg Dwys yn Dysgu Cymraeg Morgannwg ym Mhrifysgol De Cymru (PDC).

Bydd y gyfres yn archwilio teithiau ysbrydoledig chwe oedolyn sydd wedi dysgu Cymraeg fel ail iaith ac sydd wedi meistroli'r iaith a 'chroesi'r bont' i fod yn rhugl.

Mae'r podlediad yn canolbwyntio ar unigolion sydd wedi gwneud y Gymraeg yn rhan o'u bywydau bob dydd. O gyfrannu i'r gweithle i ddefnyddio'r Gymraeg gartref, mae'r gyfres yn tynnu sylw at y ffyrdd amrywiol y mae'r iaith wedi trawsnewid bywydau'r dysgwyr hyn.

Cafodd Dr Lewis ei dewis i ddatblygu'r gyfres ar ôl cyflwyno ei syniad o sgyrsiau anffurfiol gydag unigolion sydd wedi cofleidio'r Gymraeg. Mae'n dechrau gyda Joseff Gnagbo, ffoadur a gyrhaeddodd Gymru yn 2017 ac a ddaeth yn rhugl yn y Gymraeg. Mae Joseff bellach yn cynghori ar ddiwygiadau polisi sy'n ymwneud â gwneud dosbarthiadau Cymraeg yn hygyrch i ffoaduriaid.

Bydd penodau eraill yn cynnwys gwesteion fel Naomi Hughes a ddysgodd Gymraeg drwy gwrs dwys PDC. Dechreuodd Naomi, sydd o gefndir Cymraeg a Tsieineaidd, ar ei thaith Gymraeg am ei bod eisiau cefnogi ei phlentyn drwy'r ysgol Gymraeg. Aeth ymlaen i raddio o Brifysgol Met Caerdydd gyda hyfforddiant athrawon cyfrwng Cymraeg ac mae bellach yn Bennaeth adran Technoleg a Dylunio mewn ysgol Gymraeg, gan arwain mentrau cyfrwng Cymraeg ar draws amrywiol lwyfannau.

Cyfansoddir cerddoriaeth y podlediad gan Sylvia Strand, myfyriwr presennol cwrs Dr Lewis yn PDC. Mae'r cydweithrediad â Sylvia, cynhyrchydd cerddoriaeth proffesiynol, yn ychwanegu elfen unigryw i'r gyfres, gan arddangos y ffyrdd ymarferol y mae dysgu Cymraeg yn agor cyfleoedd creadigol newydd.

Mae Dr Lewis a Sylvia wedi cael gwahoddiad i recordio cyfweliad arbennig gyda Radio Cymru yn ystod Wythnos Dysgu Oedolion ym mis Hydref, lle byddant yn trafod y podlediad ac arwyddocâd addysg Gymraeg i oedolion.

Dywedodd Dr Lewis: "Fy ngobaith yw y bydd y podlediad yn tynnu sylw at bwysigrwydd dysgu Cymraeg fel oedolion a'r cyfleoedd sy'n codi o ddilyn y daith iaith yma.

"Nid yn unig y mae Pont yn ymwneud â dathlu'r rhai sydd eisoes wedi bod ar y daith i ruglder ond hefyd annog eraill i gymryd y cam cyntaf hwnnw ac i barhau â'u taith. Byddwn yn arddangos safbwyntiau ffres ar bŵer dysgu iaith."

Cynhyrchir y gyfres gyda chefnogaeth y BBC gyda phennod newydd yn cael ei rhyddhau bob mis. Mae'r bennod gyntaf ar gael nawr ar BBC Sounds.