Rhagor o lwyddiant i’r Brifysgol yng Ngwobrau STEM Cymru

Mae Prifysgol De Cymru (PDC) unwaith eto wedi’i chydnabod yng Ngwobrau STEM Cymru.

Am y drydedd flwyddyn yn olynol, mae’r Brifysgol wedi llwyddo yn y Gwobrau sy’n taflu golau ar y sefydliadau a’r unigolion sy’n gwneud gwahaniaeth i’r agenda STEM – gwyddoniaeth, technoleg, peirianneg a mathemateg – yng Nghymru.

Mae’r gwobrau’n dathlu’r rheiny sy’n arwain y sector yng Nghymru, y busnesau sy’n cael effaith ar yr economi Cymreig, rhai sy’n mynd i’r afael â’r bwlch STEM a’r diffyg sgiliau, a’r rhai sy’n ysbrydoli a chodi dyheadau’r genhedlaeth nesaf.

Ar ôl cael ei rhoi ar y rhestr fer mewn tri chategori – Rhaglen Addysgol STEM y Flwyddyn (Sector Cyhoeddus), Seren Addawol y Flwyddyn STEM a dwywaith yn y categori Prosiect Ymchwil STEM y Flwyddyn – enillodd PDC yr anrhydedd yn y categori prosiect ymchwil am ei gwaith ar wrteithiau silicon organig sy’n rhyddhau yn araf deg (SIFER), dan arweiniad Dr Christian Laycock.

Ar ôl ennill y wobr, dywedodd Dr Laycock: “Mae ennill y wobr hon yn anrhydedd mawr, ac yn brawf o waith caled a chydweithrediad pawb sydd ynghlwm wrth ddatblygu ein gwrtaith cynaliadwy. Mae’r gydnabyddiaeth hon yn ategu pwysigrwydd taclo’r heriau amgylcheddol mewn amaethyddiaeth fodern tra’n cynnig datrysiadau arloesol ac ymarferol i ffermwyr.  

“Bydd y wobr yn helpu i roi hwb i’n gwaith ymchwil, gan ddod â ni’n nes at y rhaglenni byd go iawn a fydd yn gwella diogelwch bwyd, amddiffyn adnoddau naturiol, a lleihau dibyniaeth ffermwyr ar brisiau nwy newidiol. Mae hefyd wedi creu cyfleoedd newydd i gydweithio gyda phartneriaid y diwydiant, gan ein galluogi i fireinio a masnacheiddio’r dechnoleg i’w defnyddio’n helaeth.

“Rydym yn gyffrous iawn am botensial y prosiect i gael effaith bositif a hirsefydlog ar y sector amaethyddol ac yn edrych ymlaen at barhau i rannu ein cynnydd gyda’r gymuned ehangach.”

Ymhlith y rhai a gyrhaeddodd y rownd derfynol eraill o Brifysgol De Cymru roedd prosiect yn ymchwilio i effaith cyfergyd rheolaidd yn rygbi'r undeb, prosiect Allgymorth STEM (cyn 16) y Brifysgol, tîm Recriwtio Myfyrwyr y Gyfadran Gyfrifiadura, Peirianneg a Gwyddoniaeth, a'r darlithydd seiberddiogelwch Beth Jenkins yng nghategori Rising Star.  

Dywedodd yr Athro Donna Whitehead, Dirprwy Is-ganghellor PDC: “Mae’n galonogol gweld unwaith eto y gwaith sy’n arwain y sector yn y Brifysgol yn cael ei gydnabod yng Ngwobrau STEM Cymru.

“Mae’r gwaith a wnaeth Dr Laycock a’i gydweithwyr wedi’i amlygu fel enghraifft o sut mae addysg a diwydiant yn cydweithio i fynd i’r afael â rhai o’r heriau pwysicaf rydyn ni’n eu hwynebu yn y byd sydd ohoni. Llongyfarchiadau gwresog iddyn nhw.

“Er na wnaeth yr ymgeiswyr eraill o PDC ennill eu categorïau, dw i’n gwybod eu bod nhw’n arweinwyr yn eu meysydd ac yn enghraifft o’r rhagoriaeth sydd gennym yma yn y Brifysgol, rhagoriaeth a fydd yn sicrhau bod y genhedlaeth nesaf o wyddonwyr, peirianwyr, technolegwyr a mathemategwyr, yn ffynnu yn eich gyrfaoedd o ddewis.”