PDC yn ymuno â phartneriaid addysg ar gyfer fframwaith lles economaidd cyntaf Cymru

Mae Prifysgol De Cymru (PDC) yn rhan o fframwaith arloesol a fydd yn cynnwys cydweithio rhwng sefydliadau Addysg Uwch ac Addysg Bellach (AU ac AB) De Ddwyrain Cymru ar amcanion allweddol ar gyfer lles economaidd yn y Rhanbarth.

Mae Prifddinas-Ranbarth Caerdydd wedi llofnodi Memorandwm Cyd-ddealltwriaeth, y cyntaf o'i fath yng Nghymru, gyda PDC a cholegau Addysg Bellach y Rhanbarth, gan gynnwys y Coleg Merthyr Tudful, Coleg Gwent, Coleg Caerdydd a'r Fro, Coleg y Cymoedd, a Choleg Penybont.

Bydd yr ymrwymiad hwn yn sicrhau cydnawsedd o ran uchelgeisiau rhanbarthol ac yn creu cyfleoedd pellach ar gyfer ymgysylltu â busnesau, dysgu cydweithredol, addysgu ac ymchwil a datblygu, gan ganiatáu i Brifddinas-Ranbarth Caerdydd gasglu'r arbenigedd y gall y sefydliadau hyn eu cyflawni gyda'i gilydd.

Mae'r cytundeb yn adeiladu ar y ffaith y daeth PDC yn un o'r partneriaid blaenllaw yn Rhaglen Datblygu a Thwf Clwstwr Bargen Ddinesig Prifddinas-Ranbarth Caerdydd y llynedd. Mae’r rhaglen gwerth £6.6m yn gyrru datblygiad economaidd ar draws y rhanbarth trwy hybu cread swyddi a sgiliau, a datgloi rhwystrau i dwf busnesau. Mae PDC yn arwain y Rhaglen Partneriaethau Academaidd-Diwydiant, sy'n un o dri phecyn wedi'u targedu ochr yn ochr â Rhaglen Sgiliau a Rhaglen Twf Busnes.

Dywedodd Dr Louise Bright, Dirprwy Is-Ganghellor Menter, Ymgysylltu a Phartneriaethau PDC: "Gall cydweithio â'n cydweithwyr mewn sefydliadau AB ac AU eraill yn y rhanbarth fod yn ddim byd ond da i'r partneriaid a'r gymuned ehangach.

"Mae ein profiad o fod yn rhan o Bartneriaeth Ymgysylltu Dinesig De Cymru eisoes wedi ein galluogi i feithrin perthnasoedd sy'n cefnogi'r Agenda Cenhadaeth Ddinesig, a gall hyn ond gwella'r ymdrechion hynny i gefnogi anghenion lleol a rhanbarthol.

"Rwy'n edrych ymlaen at gefnogi nodau'r Memorandwm Cyd-ddealltwriaeth, a gweithio'n agos gyda'r rhai yn y Rhanbarth sy'n angerddol am gefnogi ehangiad a gwelliant ei ddarpariaeth addysgol."

Dywedodd Kellie Beirne, Prif Swyddog Gweithredol Prifddinas-Ranbarth Caerdydd: "Mae'r bartneriaeth hon yn dangos cydweithio sylweddol rhwng sefydliadau addysgol ac ymchwil a chorff cyhoeddus rhanbarthol sydd newydd ei sefydlu, gan ganiatáu i ni alinio ein hymdrechion i hyrwyddo ein cenadaethau dinesig gyda'n gilydd.

"Mae arloesedd yn parhau i fod yn gonglfaen ein dyfodol, ac mae ein hymrwymiad ar y cyd i gydweithio a chreu llwybr newydd yn rhoi'r cyfle gorau i adeiladu cynaliadwyedd a gwytnwch yn wyneb newid a her barhaus. Trwy ffurfioli ein perthnasoedd, rydym yn gosod y sylfaen ar gyfer effaith ranbarthol a thwf cynaliadwy yn y dyfodol a chydnabyddiaeth y gallwn gyflawni mwy, gyda'n gilydd."