Ymddiriedolaeth y GIG yn dyfarnu cymrodoriaeth i ymchwil bellach o ran caethiwed

Mae Prifysgol De Cymru (PDC) wedi llwyddo i dderbyn cymrodoriaeth ymchwil gan Ymddiriedolaeth GIG Sandwell a Gorllewin Birmingham.

Bydd dyfarniad Cymrodoriaeth Ymchwil Uwch gwerth £70,714 yn caniatáu i Dr Darren Quelch, aelod o Grŵp Ymchwil Caethiwed PDC, barhau â'i ymchwil gyda Thîm Gofal Alcohol yr Ymddiriedolaeth am flwyddyn.

Mae Dr Quelch wedi bod yn gweithio mewn partneriaeth â Thîm Gofal Alcohol yr Ymddiriedolaeth, sy'n cael eu hystyried yn eang yn arweinydd cenedlaethol ar gyfer darparu gofal o ansawdd uchel i'r rhai sy'n byw gydag anhwylderau defnyddio alcohol, yn gwerthuso eu gweithgareddau a'u helpu i hyrwyddo'r gwaith pwysig y maent yn ei wneud. Y llynedd, enillodd y bartneriaeth wobr Rhwydwaith Ymchwil Glinigol y Sefydliad Cenedlaethol ar gyfer Ymchwil Iechyd a Gofal yn y categori cydweithio mewn ymchwil.

Bydd y cyllid newydd hwn yn caniatáu ymchwilio ymhellach i ddiddyfnu o alcohol, arferion presgripsiynu alcohol, a Niwed i'r Ymennydd yn Gysylltiedig ag Alcohol - cyflwr nad yw'n cael ei gydnabod yn ddigonol sy'n cael ei achosi gan gamddefnydd cronig alcohol.

Dywedodd Dr Quelch: "Yn draddodiadol, mae cleifion sy'n cyflwyno symptomau diddyfnu o alcohol yn cael cyffuriau fel diazepam. Fodd bynnag, mae gan ein hymchwil ddiddordeb mewn effeithiolrwydd presgripsiynu symiau bach o alcohol (ethanol) i reoli symptomau diddyfnu, megis cynnwrf, crychguriadau a chryndodau.

"Rydym wedi adolygu cofnodion meddygol cleifion, sydd wedi cael presgripsiwn am alcohol gan y Tîm Gofal Alcohol, gan ymchwilio i'w canlyniadau a'u tebygolrwydd o gael eu derbyn i'r ysbyty. Nesaf, rydym am weithio tuag at gynnal treialon clinigol gan neilltuo cleifion ar hap i gael eu trin â meddyginiaethau diddyfnu o alcohol safonol neu alcohol. Bydd hyn yn rhoi gwell dealltwriaeth i ni o effeithiolrwydd a dichonoldeb defnyddio alcohol i reoli symptomau diddyfnu o alcohol mewn ysbytai.

"Mae gennym rywfaint o ddata cychwynnol sy'n awgrymu bod cleifion sy'n cael eu trin ag alcohol yn llai tebygol o gael eu derbyn i'r ysbyty. Mae hyn yn bwysig oherwydd yn aml mae cleifion â diddyfnu o alcohol yn cael eu derbyn i'r ysbyty am gyfnodau hir, yn cael llawer o feddyginiaethau i'w helpu i reoli eu symptomau, ac yn cael eu rhyddhau heb gymorth. Mae natur nas cynlluniwyd y derbyniadau hyn i'r ysbyty yn golygu bod cleifion yn aml yn dychwelyd i yfed alcohol ac yn dychwelyd i'r ysbyty gyda symptomau diddyfnu gwaeth. Daw hyn ar gost ariannol i'r ysbyty, ond yn bwysicaf oll, mae canlyniadau gwaeth i gleifion.

"Mae'r tîm yn Ymddiriedolaeth GIG Sandwell a Gorllewin Birmingham wedi datblygu model gofalu sy'n darparu cefnogaeth ar ôl rhyddhau cleifion sy'n cyflwyno â diddyfnu o alcohol. O'r herwydd, os gallwn ymyrryd yn y cyfnod cynnar hwnnw pan ddaw cleifion i'r ysbyty gyda symptomau diddyfnu, efallai gan ddefnyddio ychydig bach o alcohol, efallai y gallwn ddangos enillion tymor byr i ysbytai a chleifion, ond hefyd gwell canlyniadau iechyd i'r rhai sy'n byw gydag anhwylderau defnyddio alcohol, trwy ymgysylltu â rhwydweithiau cymorth a gwasanaethau dadwenwyno cynlluniedig.

"Mae'r ymchwil hwn yn ddadleuol ond mae'n hanfodol. Mae diffyg ymchwil eisoes i bresgripsiynu alcohol ond mae'r bartneriaeth hon yn rhoi cyfle i ni helpu llawer o bobl."

Meddai'r Athro Sally Bradberry, Arweinydd Alcohol ar gyfer Ymddiriedolaeth GIG Sandwell a Gorllewin Birmingham: "Cefais y pleser o weithio gyda Darren yn SWB yn y gorffennol pan oedd yn fyfyriwr meddygaeth. Roedd ei brosiect am wasanaethau alcohol yn SWB yn allweddol yn natblygiad dilynol ein Tîm Gofal Alcohol arobryn. Mae'n gyffrous iawn gweithio gyda Darren unwaith eto ac rwyf wrth fy modd y bydd y Gymrodoriaeth hon yn ein galluogi nid yn unig i ddatblygu ymchwil y mae mawr ei hangen ym maes darparu'r Gwasanaeth Alcohol ond hefyd yn ein galluogi i arddangos ymhellach y gwaith cydweithredol rhagorol rhwng Tîm Gofal Alcohol SWB a grŵp ymchwil caethiwed PDC."