Diwrnod Rhyngwladol y Menywod | Diwylliant gwasanaeth cyhoeddus sy'n esblygu'n gyson

Ar Ddiwrnod Rhyngwladol y Menywod, mae Prifysgol De Cymru yn falch o gyhoeddi ei chynhadledd ‘Diwylliant mewn Gwasanaeth Cyhoeddus’ gyntaf a bydd yn croesawu’r Dirprwy Brif Gwnstabl Maggie Blyth i roi araith gyweirnod.

I Maggie, Dirprwy Brif Weithredwr yn y Coleg Plismona, mae Diwrnod Rhyngwladol y Menywod yn arwydd pwysig i fyfyrio ar yr effaith y mae menywod wedi’i chael ar ein hanes.

“Rwy’n uwch arweinydd benywaidd ym maes plismona ond rwyf hefyd yn fam. Nain ydw i. Rwy'n chwaer. Rydyn ni'n hanner y boblogaeth ac eto rydyn ni'n gwybod nad yw ein profiadau, na'r pethau rydyn ni wedi'u cyflawni, bob amser wedi'u cydnabod. Mae Diwrnod Rhyngwladol y Menywod yn ddiwrnod pwysig i bwyso a mesur,” meddai.

“Mae hefyd yn ddiwrnod pwysig i ystyried cynnydd. Rydym yn cymryd camau breision ac rwyf wedi gweld newidiadau enfawr yn rôl menywod yn ein cymdeithas ac yn y sector cyhoeddus. Fodd bynnag, nid yw hyn yn wir mewn rhannau eraill o'r byd. Felly, mae’ n rhaid i ni ystyried o safbwynt rhyngwladol. Er enghraifft, wrth blismona, rydym yn aml yn meddwl am sut mae menywod ym maes plismona yn cael eu gweld yn rhyngwladol yn ogystal ag yn ein gwlad.”

Nid yw Maggie yn ddieithr i weithio mewn meysydd lle mae dynion yn bennaf yn ystod ei gyrfa 32 mlynedd. Cyn plismona bu’n gweithio ym maes prawf, cyfiawnder ieuenctid, a charchardai, felly mae hi wedi gweld newidiadau enfawr mewn cydraddoldeb rhywiol, yn enwedig wrth integreiddio patrymau gweithio hyblyg i gynnwys cyfrifoldebau gofalu.

“Mae’r newid mewn hyblygrwydd wedi gweld mwy o fenywod yn dod i’r gweithle mewn pob math o rolau rheng flaen ac mewn rolau arweinyddiaeth uwch. Y newid arall rydw i wedi'i weld yw newid barn ar yr hyn y mae arweinyddiaeth yn ei olygu a'r ymdeimlad ein bod hefyd yn gwerthfawrogi cydweithio ac arweinyddiaeth dosturiol.

“Mae menywod yn dod â chymaint o bositifrwydd i blismona nad yw’n cael ei amlygu’n aml. Rwyf wedi gweld menywod ar draws pob rheng yn perfformio yn union yr un rolau â dynion ac yn cyflawni'r un peth. Nid yw’r stereoteipiau o swyddi i ddynion a swyddi i fenywod yn berthnasol bellach.”

Fel Arweinydd Cenedlaethol yr Heddlu ar gyfer Trais yn Erbyn Menywod a Merched, mae Maggie yn siarad â balchder am ei chydweithwyr, ar y rheng flaen, sy’n gweithio’n galed i fynd i’r afael â throseddau yn erbyn menywod a merched. Fodd bynnag, mae'n cydnabod bod llawer o waith i'w wneud o hyd. Meddai: “Dangosodd adroddiad Angiolini a gyhoeddwyd yn ddiweddar fod gennym lawer o ffordd i fynd. Yn y DU, mae un o bob tair menyw yn marw dan law dyn.

“Ym maes plismona, mae’r Coleg Plismona wedi cyhoeddi Cod Moeseg newydd a fydd yn cymryd amser i’w wreiddio. Fodd bynnag, mae angen i ni gydnabod ein bod yn delio ag epidemig a bod angen newid diwylliant, nid yn unig o fewn plismona, ond ar draws cymdeithas.”

Bydd Maggie yn siarad mwy am y themâu hyn yn y gynhadledd ‘Diwylliant mewn Gwasanaeth Cyhoeddus’. Bydd yn trafod ysgogi ymatebion i droseddau sy’n effeithio’n anghymesur ar fenywod a merched, mynd i’r afael â’r heriau a wynebir gan blismona, a meithrin newidiadau diwylliannol o fewn plismona i wella ymddiriedaeth a hyder cymunedol.

Cynhelir y gynhadledd ‘Diwylliant mewn Gwasanaeth Cyhoeddus’ yn ICC Cymru ar 20 Mehefin 2024. Mae’r gynhadledd wedi’i hanelu at Brif Swyddogion yr Heddlu, Prif Swyddogion y Gwasanaeth Tân, Prif Weithredwyr a Gwasanaethau Pobl, ac arweinwyr Datblygu Sefydliadol ar draws sefydliadau gwasanaethau cyhoeddus.

Mae rhagor o wybodaeth ar gael ar wefan Prifysgol De Cymru.