Dechrau gwaith adeiladu ar gyfer adeilad newydd ar Gampws Trefforest

Mae'r cwmni adeiladu BAM yn ymgymryd â'r gwaith adeiladu, a fydd yn cynnig 11,500 metr sgwâr o ofod newydd, ar dir gwag ar waelod Campws Trefforest yn dilyn dymchwel dau adeilad yn ystod y blynyddoedd diwethaf. Disgwylir y bydd yn cymryd tua dwy flynedd i'r gwaith adeiladu gael ei gwblhau.

Mae'r arbenigwyr adeiladu yn BAM yn gweithio ochr yn ochr â thîm dylunio o benseiri Stride Treglown a pheirianwyr Arup. Mae'r cwmni rheoli prosiect Currie & Brown hefyd yn chwarae rhan sylweddol wrth sicrhau bod y prosiect yn parhau ar y trywydd iawn ac yn cael ei gyflawni'n llwyddiannus.

Bydd y buddsoddiad yn cael effaith gadarnhaol iawn ar yr economi leol, gyda BAM yn penodi isgontractwyr lleol a phartneriaid cadwyn gyflenwi i gyflawni'r prosiect. Bydd mwy na 75% o wariant y prosiect yn cael ei wario’n lleol.

Bydd nifer o gyfleoedd i brentisiaid a chyfleoedd hyfforddiant ar gael drwy gydol y gwaith adeiladu – gwerth dros 1000 wythnos i gyd. Mae saith o gyn-fyfyrwyr PDC hefyd yn gweithio ar y gwaith adeiladu yn BAM.

Mae dyluniad yr adeilad yn amgylcheddol gynaliadwy, sy’n cyd-fynd â tharged PDC o fod yn garbon sero net erbyn 2040. Ni fydd yr adeilad yn defnyddio unrhyw nwy naturiol – bydd yn cael ei bweru gan Bympiau Gwres Ffynhonnell Aer a bydd ganddo 851 m2 o baneli solar ffotofoltäig ar y to.

Dywedodd Dr Ben Calvert, Is-Ganghellor PDC: "Mae'n hynod gyffrous fod y gwaith am ddechrau ar yr adeilad academaidd newydd ar gyfer Cyfrifiadureg, Peirianneg a Thechnoleg ar ein Campws Trefforest. Mae cydweithwyr wedi bod yn gweithio'n galed gyda'n partneriaid allanol i ddatblygu'r cynlluniau ar gyfer ein cyfleuster newydd ac mae'n garreg filltir wych i nodi dechrau'r gwaith adeiladu nawr.

"Bydd yr adeilad newydd yn arddangos dysgu a gwaith ein myfyrwyr gyda chyfleusterau o'r radd flaenaf ac yn croesawu ein partneriaid diwydiannol i weithio gyda ni i ddylunio a chyflwyno ein cwricwlwm seiliedig ar her, a chydweithio ar ymchwil ac arloesedd. Bydd yr adeilad yn wirioneddol trawsnewid y rhan hon o'n campws ac yn cynnig amgylchedd dysgu, ymchwil a gwaith o'r radd flaenaf i'n myfyrwyr, ein cydweithwyr a'n partneriaid."

Dywedodd Mark Milton, Prif Swyddog Gweithredu PDC: "Mae hwn yn fuddsoddiad mawr i'r Brifysgol, ac i'r ardal leol, ac rydym yn gweithio gyda BAM i sicrhau’r defnydd gorau o'r gadwyn gyflenwi leol. Yn ogystal â darparu cyfleoedd prentisiaeth a hyfforddiant drwy gydol y cyfnod adeiladu, bydd y prosiect hefyd yn cynnig profiad dysgu byw ac ymarferol i lawer o'n myfyrwyr presennol.

"Bydd yr adeilad newydd yn ein cadw ar flaen y gad ym maes addysg STEM, gydag ymagwedd arloesol at ddysgu ac addysgu, gan wella'r amgylchedd a'r profiad i'n myfyrwyr a'n cydweithwyr. Rydym yn edrych ymlaen at weld y cynlluniau'n dod yn fyw dros y blynyddoedd nesaf."

Dywedodd Tim Chell, Cyfarwyddwr Rhanbarthol BAM: "Mae heddiw'n nodi uchafbwynt misoedd o gynllunio, cydweithredu a gwaith caled gan holl Dîm y Prosiect. Ond mae hefyd yn ddechreuad rhywbeth hyd yn oed yn fwy arwyddocaol—taith a fydd yn trawsnewid y safle hwn yn dirnod y gallwn i gyd fod yn falch ohono. Hoffwn ddiolch o galon i'n cleientiaid, partneriaid, a phawb sydd wedi credu yn y weledigaeth hon ac sydd wedi gweithio'n ddiflino i ddod â hi'n fyw.

"Wrth i ni dorri tir, cawn ein hatgoffa bod cryfder adeilad yn gorwedd yn ei sylfaen. Gellir dweud yr un peth am ein dull o gydweithio, ymrwymiad i ansawdd, a pharch at y cymunedau rydym yn eu gwasanaethu. Mae'r egwyddorion hyn yn llywio pob penderfyniad a wnawn, gan sicrhau y bydd yr hyn rydym yn ei adeiladu heddiw yn sefyll prawf amser."

Yn y llun uchod (chwith i'r dde): Alex Davies-Jones AS (Aelod Seneddol Pontypridd), Tim Chell (Cyfarwyddwr Rhanbarthol BAM), Mick Antoniw MS (Aelod o'r Senedd dros Bontypridd), Dr Ben Calvert (Is-Ganghellor PDC), Jahid Hassan (Undeb Myfyrwyr PDC), a Heledd Fychan MS (Aelod o'r Senedd ar gyfer Canol De-orllewin).