PDC yn noddi gŵyl gerddoriaeth leol

Mae Prifysgol De Cymru (PDC) yn noddi Gŵyl Reggae a Riddim 2024 a gynhelir yng Nghasnewydd ar 26-28 Gorffennaf.

Mae Urban Circle Casnewydd, elusen celfyddydau ieuenctid ac eiriolaeth arobryn, mewn partneriaeth â phentref brodorol Rastafari yn Jamaica, yn dod â’r ŵyl reggae i Gasnewydd am yr eildro.

Mewn partneriaeth â sefydliadau lleol eraill, bydd y nawdd yn ariannu prosiect datblygu Celfyddydau Creadigol Ysgol/Cymuned. Byddant yn ymgysylltu â phobl ifanc leol o ysgolion cynradd, ysgolion uwchradd a grwpiau cymunedol Casnewydd, mewn cyfres o ddigwyddiadau cyn ac yn ystod yr ŵyl.

Bydd y bobl ifanc o gefndiroedd Du, Asiaidd a lleiafrifoedd ethnig yn cael y cyfle i gymryd rhan mewn mathau newydd o hyfforddiant ac archwilio llwybrau a derbyn hyfforddiant, nid yn unig mewn sgiliau bywyd fel gwaith tîm, adeiladu tîm, hunanhyder, cyfrifoldeb, a phroffesiynoldeb, ond hefyd yn cael y cyfle i ennill cymwysterau mewn hyfforddi dawns, gwaith ieuenctid, cymorth cyntaf, hylendid bwyd, a mwy.

Mae noddi'r digwyddiad pwysig hwn yn rhan o Daith Ecwiti Hiliol y Brifysgol. Yn 2021, ymrwymodd PDC i Siarter Cydraddoldeb Hiliol Advance HE, sy’n darparu fframwaith i sefydliadau weithio i nodi a hunanfyfyrio ar rwystrau sefydliadol a diwylliannol sy’n atal cydweithwyr a myfyrwyr Du, Asiaidd a lleiafrifoedd ethnig, a rhoi mentrau ac atebion ar waith ar gyfer gweithredu i fynd i'r afael â hyn.

Dywedodd Zoe Durrant, Prif Swyddog Pobl a Chynhwysiant PDC: “Mae gŵyl Reggae a Riddim yn ddigwyddiad anhygoel ac rydym yn falch o fod yn rhan ohono.

“Ein gweledigaeth yw newid bywydau a’n byd er gwell a dim ond os ydym yn anelu at degwch, amrywiaeth, a chynhwysiant y gallwn wneud hyn – mae gweithio gyda phartneriaid fel Urban Circle Casnewydd yn rhan annatod o gyflawni ein nodau.

“Yn ddiweddar, fe lansiom ein Cynllun Cydraddoldeb Strategol diweddaraf sy’n dangos ein hymrwymiad i greu amgylchedd croesawgar a chynhwysol lle gall ein myfyrwyr, cydweithwyr a phartneriaid gydweithio, arloesi a ffynnu.”

Dywedodd Loren Henry, Cyd-sylfaenydd Urban Circle Casnewydd: “Nod y prosiect hwn yw defnyddio gwahanol fathau o gelfyddydau creadigol i fynd i’r afael â phroblemau cymdeithasol lluosog sy’n effeithio ar bobl ifanc agored i niwed yng nghymuned Casnewydd a’r cyffiniau. Mae gan gerddoriaeth gysylltiad pwerus iawn a bydd rhoi cyfle i’r bobl ifanc greu rhywbeth eu hunain yn ennyn hyder yn ogystal ag ymdeimlad o berchnogaeth a hunaniaeth o fewn eu maes creadigol.

“Ein nod yw adeiladu prosiect rhyngwladol hirhoedlog sy’n creu gŵyl ddiwylliant Reggae fwyaf dilys Ewrop. Diolch i PDC am eu cefnogaeth barhaus.”

Gallwch brynu tocynnau ar gyfer yr ŵyl ar reggaeriddimfestival.com.