Adnewyddu Gwobr Efydd Athena SWAN PDC

Mae Prifysgol De Cymru (PDC) wedi cael ei hailachredu gyda Gwobr Efydd Athena SWAN, gan gadarnhau ei hymrwymiad parhaus i hyrwyddo cydraddoldeb rhywiol drwy’r sefydliad cyfan.

Mae Athena SWAN, rhan o Siarter Rhywedd Advance HE, yn cydnabod ymdrechion sefydliadau addysg uwch i hyrwyddo cydraddoldeb, amrywiaeth a chynhwysiant. Mae'r Siarter ei hun wedi esblygu’n sylweddol ers fframwaith 2019, trwy'r model diwygiedig a gyflwynwyd yn 2021, i'r canllawiau diweddaraf a ryddhawyd ym mis Ionawr 2025. Wrth i Athena SWAN ddatblygu, mae dulliau PDC hefyd wedi datblygu. Mae'r Brifysgol wedi symud o fod â’r ffocws pennaf ar gydraddoldeb rhywiol ar gyfer staff academaidd i fabwysiadu persbectif sefydliadol mwy cynhwysol sy'n ystyried profiadau’r holl staff a’r myfyrwyr i gyd. 

Derbyniodd PDC Wobr Efydd Athena SWAN am y tro cyntaf yn 2020. Mae cadw'r wobr trwy'r ailachrediad diweddaraf yn dangos cynnydd parhaus ac ymrwymiad parhaus at newid ystyrlon. 

Ers ennill y wobr y tro cyntaf, mae'r Brifysgol wedi gweithredu amrywiaeth o fentrau i sbarduno gwelliant, gan gynnwys Rhaglen Datblygu Arweinyddiaeth Menywod, sefydlu rhwydwaith Menywod mewn STEM Cymru, gwella cydraddoldeb croestoriadol drwy ennill gwobr Efydd y Siarter Cydraddoldeb Hiliol a rhaglen Datblygu Menywod Entrepreneuraidd. 

Dywedodd yr Athro Lousie Bright ‘Mae cadw ein gwobr Athena SWAN yn arwydd o'n hymrwymiad gwirioneddol i greu amgylchedd lle gall talent ffynnu waeth beth fo'u rhyw. Nid bathodyn yn unig yw'r wobr hon - mae'n adlewyrchu gweithredu parhaus i fynd i'r afael â rhwystrau, gwella cynrychiolaeth, a sicrhau tegwch ar draws addysgu, ymchwil, arweinyddiaeth, a'n diwylliant bob dydd. Mae'n bwysig nawr ein bod yn parhau i wrando ar ein pobl a gweithredu newid ystyrlon sy'n cryfhau cymuned gyfan PDC. Diolch enfawr i bob person sydd wedi chwarae rhan yn y cyflawniad hwn.’