Myfyrwyr PDC yn dathlu cymwysterau chwaraeon proffesiynol

Mae myfyrwyr ym Mhrifysgol De Cymru (PDC) wedi cael cydnabyddiaeth i’w cymwysterau chwaraeon proffesiynol mewn dathliad diweddar.

Fel rhan o'r cyrsiau BSc Gwyddor Chwaraeon ac Ymarfer Corff, Therapi Chwaraeon ac Ymarfer Corff, neu Gryfder a Chyflyru, dyfarnwyd y Dystysgrif Lefel 2 mewn Hyfforddiant Campfa, y Dystysgrif Lefel 3 mewn Hyfforddiant Personol, a'r Dystysgrif Lefel 3 mewn Gweithio gyda Phobl â Chyflyrau Hirdymor (LTC) i fyfyrwyr. Dyma'r flwyddyn gyntaf i'r Brifysgol gynnig y cymhwyster LTC, sy'n paratoi myfyrwyr i weithio gyda chleientiaid sy'n rheoli cyflyrau iechyd cronig.

Mae'r cymwysterau hyn yn golygu bod myfyrwyr wedi bodloni safonau proffesiynol y Sefydliad Siartredig ar gyfer Rheoli Chwaraeon a Gweithgarwch Corfforol (CIMSPA), y corff datblygu proffesiynol ar gyfer sector chwaraeon a gweithgarwch corfforol y DU.

Dywedodd Denise Cuer, a raddiodd yn ddiweddar: “Mae’r cymwysterau proffesiynol hyn wedi’u cynnwys yn y cwrs heb unrhyw gost ychwanegol. Maent yn cael eu cynnig yn ystod blwyddyn gyntaf ac ail flwyddyn y radd, sy’n golygu y gallwch eu defnyddio i ennill arian drwy gydol eich astudiaethau, wrth ennill profiad gwaith pendant. Mae hyn, ynghyd â’r cyfleoedd dysgu seiliedig ar waith hynod fuddiol sy’n cael eu canfod ar gyfer myfyrwyr, yn caniatáu ichi gymhwyso’r hyn rydych chi wedi’i ddysgu mewn senarios byd go iawn, sy’n helpu’n aruthrol pan fyddwch chi’n gwneud cais am swyddi.

“Fe wnes i ganfod mai un o’r pethau gorau am PDC yw’r amgylchedd dysgu cyfeillgar, cymwynasgar a chefnogol. Mae’r darlithwyr a’r technegwyr labordy yn arweinwyr yn eu meysydd, ac maen nhw wir eisiau i chi lwyddo a bod y gorau y gallwch chi fod. Rwyf wedi dysgu cymaint, nid yn unig yn academaidd ond amdanaf fy hun hefyd. Rwyf wedi mwynhau fy amser yn PDC yn fawr a wir yn argymell y cwrs BSc Gwyddor Chwaraeon ac Ymarfer Corff i unrhyw un sydd â diddordeb mewn dilyn gyrfa mewn chwaraeon neu mewn maes sy’n gysylltiedig ag iechyd.”

Dywedodd Dr Adnan Haq, Darlithydd mewn Gwyddor Chwaraeon ac Ymarfer Corff: "Llongyfarchiadau i'r holl fyfyrwyr sydd wedi ennill y cymwysterau ychwanegol hyn. Mae'r cymwysterau perthnasol iawn hyn yn ymgorffori safonau proffesiynol, wedi'u cymeradwyo gan CIMSPA, gan helpu ein myfyrwyr i wella eu gwybodaeth a'u proffesiynoldeb a sicrhau eu bod wedi'u paratoi ar gyfer marchnad swyddi gystadleuol."