Cefnogi ymchwil yn y celfyddydau a'r dyniaethau gyda chyllid AHRC

Mae Prifysgol De Cymru yn un o 50 o Sefydliadau Addysg Uwch (SAU) i dderbyn Gwobr Tirwedd Doethurol newydd gan Gyngor Ymchwil y Celfyddydau a'r Dyniaethau (AHRC).

Nod y gwobrau, sy'n rhan o ddull newydd o ariannu astudiaethau doethuriaeth, yw ategu cryfder a sefydlogrwydd ecosystem ymchwil y celfyddydau a'r dyniaethau.

Yng nghyd-destun costau cynyddol i gefnogi astudiaethau doethuriaeth, mae'r AHRC wedi ymrwymo i ddarparu buddsoddiad sefydlog sy'n sicrhau bod y sector yn parhau i alluogi myfyrwyr rhagorol i ymgysylltu â'r hyfforddiant ymchwil cydweithredol, seiliedig ar garfan a rhyngddisgyblaethol o'r ansawdd uchaf ar gyfer y celfyddydau a'r dyniaethau.

Drwy ddefnyddio cyllid hyblyg i ganiatáu i SAU fabwysiadu dulliau sydd wedi'u llunio i gyd-fynd â'u hanghenion a'u strategaethau, disgwyliad yr AHRC yw y bydd ysgoloriaethau ymchwil yn cwmpasu ehangder o wybodaeth, gan greu cyfleoedd newydd ar gyfer arloesi mewn datblygu gyrfaoedd ymchwil, a llwybrau i gael effaith, gan ddarparu llinell sylfaen o gyllid sy'n ategu anghenion gallu a chapasiti doethuriaeth cyffredinol y DU ar gyfer disgyblaethau'r celfyddydau a'r dyniaethau.

Dywedodd yr Athro Martin Steggall, Dirprwy Is-Ganghellor Ymchwil yn PDC: “Rydym wrth ein bodd y bydd Gwobrau Tirwedd Doethurol newydd AHRC yn darparu cyllid ar gyfer ysgoloriaethau doethuriaeth yn PDC. Mae'r wobr hon yn cyd-fynd â'n hymrwymiad i gynhyrchu ymchwil fywiog ac effeithiol sy'n gwneud gwahaniaeth cadarnhaol i fywydau pobl.”

Ychwanegodd yr Athro Christopher Smith, Cadeirydd Gweithredol AHRC: “Mae gwobrau tirwedd doethuriaeth AHRC yn darparu cyllid hyblyg i ganiatáu i brifysgolion adeiladu ar ragoriaeth bresennol mewn ymchwil a chyfleoedd ar gyfer arloesi ar draws y celfyddydau a'r dyniaethau. Byddant yn cefnogi datblygiad pobl dalentog ac, ochr yn ochr â'n cynlluniau doethuriaeth eraill, yn cyfrannu at system ymchwil ac arloesi amrywiol, sy'n ddeniadol yn rhyngwladol.”

Bydd y cyllid a ddarperir trwy'r cynllun newydd yn cefnogi 15 o ysgoloriaethau ymchwil – tair y flwyddyn, ar gyfer pedair carfan – ar draws pob un o'r 50 o Sefydliadau Addysg Uwch sy'n derbyn gwobr. Mae'r cyllid yn seiliedig ar hyd ysgoloriaeth ymchwil pedair blynedd.

Bydd PDC yn croesawu ei charfan gyntaf o fyfyrwyr Gwobr Tirwedd Doethurol AHRC ym mis Hydref 2026.