Hanesion Graddio | Sam yn cael llwyddiant mawr yn yr Unol Daleithiau

Mae Canolfan Gynadledda Ryngwladol Cymru yng Nghasnewydd unwaith eto wedi gweld miloedd o’n graddedigion yn croesi’r llwyfan yn eu cap a’u gŵn. I ddathlu, rydym yn rhannu storïau rhai o’n myfyrwyr ysbrydoledig.

Yr wythnos hon, mae Sam Thomas, hyfforddwr cryfder a chyflyru, yn dathlu penllanw ei daith academaidd sydd wedi mynd ag ef o'r DU i'r Unol Daleithiau.

Ar ôl cwblhau gradd ôl-raddedig mewn hyfforddiant cryfder a chyflyru ym Mhrifysgol De Cymru (PDC), mae Sam bellach yn ffynnu ym Mhrifysgol Colorado lle mae'n gweithio gydag athletwyr elitaidd ar draws sawl camp.

Dechreuodd taith Sam i gryfder a chyflyru fel ‘cynnig ar antur’. Ar y cychwyn yn ansicr o'i lwybr, darganfu ei angerdd yn ystod ei astudiaethau israddedig yn PDC, lle astudiodd radd mewn Cryfder a Chyflyru. Wrth fyfyrio ar ei amser yno, mae Sam yn canmol ei ddarlithwyr am ddarparu cefnogaeth amhrisiadwy a chyfleoedd yn y byd go iawn a osododd y sylfeini ar gyfer ei yrfa. Dywedodd: "Doedd e ddim yn ymwneud â dysgu mewn darlithoedd yn unig. Cawson ni ein hannog i gymhwyso ein gwybodaeth yn ymarferol, a oedd wedi fy mharatoi'n aruthrol ar gyfer y byd proffesiynol."

Roedd ei astudiaethau ôl-raddedig yn PDC yn adeiladu ar y sylfaen gadarn hon. Roedd Sam yn gwerthfawrogi cwricwlwm datblygedig a heriol y cwrs, a oedd yn annog meddwl yn feirniadol ac yn mireinio ei arbenigedd ymhellach. "Doedd e ddim yn gopi union o'r cwrs israddedig. Fe wnaeth ein gwthio i gwestiynu a datblygu'r syniadau roedden ni wedi'u dysgu o'r blaen, a oedd yn hynod fuddiol," esboniodd.

Fe wnaeth angerdd am chwaraeon ac awydd i gadw cysylltiad â'r byd athletau yrru Sam i ddewis cryfder a chyflyru fel gyrfa. Er na wireddwyd ei ddyheadau cynnar o ddod yn chwaraewr rygbi proffesiynol, ei angerdd am y gampfa a'i awydd i wneud y gorau o berfformiad athletaidd a’i harweiniodd at y maes hwn. "Dewis cryfder a chyflyru fu'r penderfyniad gorau i mi ei wneud erioed," meddai.

Dechreuodd profiad Sam yn yr Unol Daleithiau yn 2022 pan gymerodd ran mewn interniaeth saith wythnos ym Mhrifysgol Colorado. Roedd y cyfle hwn, a hwyluswyd trwy bartneriaeth â Chymdeithas Cryfder a Chyflyru Rhyngwladol Prifysgolion (IUSCA), yn caniatáu iddo weithio gyda thimau pêl-fasged, pêl-foli a phêl-droed. Roedd y profiad yn drawsnewidiol. "Cefais fy mwrw i'r dwfn o'r diwrnod cyntaf, sef y profiad dysgu mwyaf heriol ond hefyd y mwyaf gwerth chweil," meddai Sam. Arweiniodd ei berfformiad yn ystod yr interniaeth hon at gynnig o gymrodoriaeth, a ddaeth yn rôl llawn amser yn y pen draw.

Heddiw, mae cyfrifoldebau Sam yn cwmpasu sawl tîm, gan gynnwys sgïo traws gwlad, sgïo'r Alpau, sgïo Nordig, tennis menywod, a'r garfan gefnogi, sy'n cynnwys codwyr hwyl a dawnswyr. Mae pob diwrnod yn dod â heriau a gwobrau unigryw. "Mae'r amrywiaeth yn gweddu i'm harddull hyfforddi yn berffaith. Mae pob diwrnod yn wahanol, ac rydw i wrth fy modd yn meithrin perthynas gyda fy athletwyr a chydweithwyr. Dyw e byth yn teimlo fel gwaith," meddai.

Mae byw yn Boulder wedi bod yn brofiad anhygoel i Sam. Yng nghanol y Mynyddoedd Creigiog, mae'r dref goleg fywiog yn cynnig golygfeydd syfrdanol a chymuned gefnogol. "Mae'n lle blaengar a chefnogol, ac rydw i wedi teimlo fy mod i'n cael cefnogaeth o bob ochr," dywedodd. Er bod addasiadau diwylliannol yn y dechrau, roedd cyfarwydd-deb Sam â'r amgylchedd, a gafwyd yn ystod ei interniaeth, yn lleddfu'r cyfnod pontio.

Am y tro, mae Sam yn canolbwyntio ar barhau â'i waith ym Mhrifysgol Colorado, lle enillodd eu tîm sgïo bencampwriaeth genedlaethol yn ddiweddar. Roedd y cyflawniad hwn nid yn unig yn cadarnhau ei rôl ond hefyd yn atgyfnerthu ei ymrwymiad i lwyddiant parhaus y tîm.