Myfyrwyr yn ailystyried ffasiwn ar gyfer ymgyrch Mis Medi Ail-law Oxfam

Mae myfyrwyr ffasiwn ym Mhrifysgol De Cymru wedi partneru ag Oxfam Cymru ar gyfer ymgyrch Mis Medi Ail-law yr elusen, gan dynnu sylw at effaith amgylcheddol ffasiwn cyflym.

Ar ôl chwilio drwy roddion dillad o siopau lleol Oxfam, gweithiodd y myfyrwyr blwyddyn gyntaf mewn timau i roi gwisgoedd at ei gilydd ac ailgylchu eitemau i greu edrychiadau newydd.

Yna, modelodd myfyrwyr ar draws tair cwrs – Dylunio Ffasiwn, Hyrwyddo Ffasiwn a Busnes a Marchnata Ffasiwn – eu golwg mewn sesiwn tynnu lluniau, gan ddefnyddio'r stiwdios ffotograffiaeth ar gampws Caerdydd PDC.

Dywedir bod ffasiwn cyflym – term a ddefnyddir i ddisgrifio trosiant cyflym tueddiadau ffasiwn a'r symudiad tuag at ddillad rhad, wedi'u cynhyrchu'n dorfol – yn cyfrannu at 8-10% o allyriadau carbon byd-eang, sy'n fwy na'r diwydiannau awyrenneg a llongau gyda'i gilydd.

Dywedodd y myfyriwr Hyrwyddo Ffasiwn Vittorio Olivari, a oedd yn aelod o dîm The Tartanistas: “Fe benderfynon ni greu dillad ar gyfer pob tymor gan ddefnyddio dillad tartan, oherwydd ni ddylai’r syniad o siopa’n gynaliadwy fod yn gyfyngedig i un mis yn unig – mae’n newid cadarnhaol y gallwn ei wneud drwy gydol y flwyddyn.”

Ychwanegodd ei gyd-fyfyrwraig Paige Farrell, a oedd yn nhîm The Misfits: “Fe’n hysbrydolwyd gan y syniad o ffasiwn androgynaidd; dull hylifol o ddillad sy’n mynd yn groes i normau rhywedd traddodiadol, gan ganiatáu i bobl arbrofi gyda gwahanol arddulliau a gwisgo’r hyn maen nhw’n teimlo’n dda ynddo.”

Dywedodd Lawrence Lomas, rheolwr ardal Oxfam Cymru ar gyfer De Cymru: “Mae ffasiwn wedi dod yn un o’r diwydiannau mwyaf llygrol ar y blaned, gan danio newid hinsawdd sy’n gwthio pobl i dlodi ledled y byd. Mae mis Medi Ail-law yn foment i bob un ohonom ddod at ein gilydd i ddewis ffyrdd mwy cynaliadwy o siopa.

“Mae creadigrwydd y myfyrwyr wedi rhoi bywyd newydd i eitemau ail-law, gan ysbrydoli pobl eraill i helpu i leihau gwastraff a hyrwyddo ffordd fwy cynaliadwy o fyw. Drwy ddewis dillad ail-law, mae'r myfyrwyr hyn yn gwneud gwahaniaeth gwirioneddol yn y frwydr yn erbyn newid hinsawdd ac yn dangos nad oes rhaid i ffasiwn gostio ffortiwn.”

Ychwanegodd Emma Jones, arweinydd cwrs Hyrwyddo Ffasiwn yn PDC: “Mae'r myfyrwyr wedi mwynhau gweithio gydag Oxfam Cymru yn fawr i greu rhai edrychiadau gwych a helpu i annog pobl i brynu dillad ail-law.

“Yn PDC rydym yn ymgorffori cynaliadwyedd drwy gydol ein cwricwlwm Ffasiwn, ac felly mae prosiectau fel y rhain mor bwysig wrth godi ymwybyddiaeth ymhlith y genhedlaeth nesaf o ddylunwyr a steilwyr bod angen i'r diwydiant newid er mwyn helpu ein planed.”