Datgelu gwaith celf myfyriwr PDC ar Stryd y Frenhines, Caerdydd

Mae myfyrwraig Darlunio ym Mhrifysgol De Cymru wedi gweld ei gwaith yn cael ei arddangos ar un o strydoedd prysuraf Caerdydd, gan ddathlu diwylliant, hunaniaeth a dyfodol y ddinas.

Mae dyluniad Bethan Roberts yn ganlyniad cydweithrediad rhwng PDC ac FOR Cardiff, ardal gwella busnes (BID) y brifddinas sy'n anelu at greu canol dinas fwy bywiog a chroesawgar i bawb.

Mae'r gwaith celf cyhoeddus wedi'i osod ar waliau'r hen siop New Look ar Stryd y Frenhines, gan greu darn trawiadol i siopwyr, trigolion a gweithwyr swyddfa ei fwynhau.

Cafodd y myfyrwyr y dasg o greu graffeg ffenestr ar raddfa fawr ar gyfer y prosiect, gan ddefnyddio darlunio fel offeryn i drawsnewid gofod cyhoeddus gwag yn ddyluniad deniadol, cadarnhaol i'r gymuned - gyda gwaith Bethan wedi'i ddewis fel yr enillydd.

Roedd yr hen siop New Look yn lle delfrydol oherwydd ei faint a'i leoliad amlwg yng nghanol y ddinas, gyda chynulleidfa fawr gaeth yn cerdded trwy Stryd y Frenhines bob dydd.

Datblygodd myfyrwraig ail flwyddyn Bethan ei dyluniad dros nifer o wythnosau, trwy ymchwil, syniadau llyfr braslunio ac arbrofi digidol cyn cynhyrchu'r gwaith celf terfynol. Canolbwyntiodd y darn ar hunaniaeth weledol Caerdydd, gan bwyntio at ddyfodol mwy gwyrdd i'r ddinas.

Dywedodd Liam Barrett, darlithydd Darlunio yn PDC: “Mae wedi bod yn wych gweld myfyrwyr yn ymateb i friff cyhoeddus go iawn ac yn cynhyrchu gwaith sy'n dod yn rhan o'r ddinas ei hun mewn ffordd mor weladwy.

“Rwy'n falch iawn o'r uchelgais a'r proffesiynoldeb maen nhw wedi'u dangos drwy gydol y prosiect. Hoffwn hefyd ddiolch i Emily Cotterill o FOR Cardiff am ei harweiniad drwy gydol y prosiect, ochr yn ochr â'r darlunydd lleol Matt Joyce am ei gefnogaeth yn ystod y broses ddatblygu.”

Ychwanegodd Emily Cotterill, Cyfarwyddwr Cyswllt yn FOR Cardiff: “Rydym mor falch o fod wedi cyflawni'r prosiect hwn mewn cydweithrediad â PDC, ac i ddyluniad gwych Bethan gael ei weld ar un o'n strydoedd prysuraf.

“I ni, mae hwn yn enghraifft arall o sut y gall celf gyhoeddus fywiogi mannau wrth gefnogi talent lleol sy'n dod i'r amlwg. Wrth i ni anelu at ein pleidlais BID3, rydym yn parhau i daflu goleuni ar y prosiectau sy'n helpu i greu canol dinas mwy bywiog a chroesawgar i bawb.”