Myfyrwyr plismona yn helpu i fynd i'r afael â phryderon ynghylch goryrru yn Nhrefforest

Mae myfyrwyr o Brifysgol De Cymru wedi cael eu canmol am eu cyfraniad at fenter gorfodi cyflymder cymunedol yn Nhrefforest, gan fynd i'r afael â phryderon trigolion.

Daeth y fenter, dan arweiniad Tîm Plismona yn y Gymdogaeth Heddlu De Cymru, yn dilyn adroddiadau am oryrru ar hyd Heol Llantwit. Fel rhan o ymarfer plismona cymunedol, ymunodd myfyrwyr Plismona Proffesiynol â Swyddog Cymorth Cymunedol yr Heddlu (PCSO) Garron Evans i gefnogi ymgyrch monitro cyflymder a gynlluniwyd i wella diogelwch ar y ffyrdd a thawelu meddyliau trigolion lleol.

Yn ystod yr ymgyrch, cofnodwyd 50 o gerbydau gan ddefnyddio dyfais canfod cyflymder laser. Canfuwyd bod pump o yrwyr yn mynd y tu hwnt i'r terfyn a byddant yn derbyn llythyrau rhybudd yn eu cynghori am eu gyrru yn y dyfodol. Bydd y data a gesglir hefyd yn cael ei rannu â phartneriaid yn y Bartneriaeth Diogelwch Cymunedol leol i lywio mesurau diogelwch parhaus.

Dywedodd Carwyn Evans, Darlithydd Plismona Proffesiynol: “Mae ymarferion fel hyn yn helpu myfyrwyr i ddeall beth yw plismona cymunedol a gwaith y tîm plismona yn y gymdogaeth.

“Un peth yw trafod damcaniaeth plismona yn yr ystafell ddosbarth, ond peth arall yw ei gweld ar waith. Rhoddodd hyn gyfle i’n myfyrwyr gymryd rhan mewn gwaith plismona ystyrlon yn y byd go iawn wrth gefnogi’r gymuned leol.”

Y tu hwnt i'r effaith uniongyrchol ar ddiogelwch ffyrdd, mae'r profiad yn rhan o raglen ehangach o ddysgu cymhwysol sydd wedi'i hymgorffori yn y Flwyddyn Sylfaen mewn Plismona Proffesiynol. Mae ymweliadau diweddar a rhai sydd ar ddod yn cynnwys archwilio plismona yn y cyfryngau yn y BBC, mynychu gwrandawiadau yn llysoedd Merthyr Tudful i weld y broses llys ar waith ac ymweld â Gorsaf Heddlu Merthyr i ddysgu am weithdrefnau'r ddalfa a rolau adrannol.

Dywedodd Carwyn: “Drwy ymgysylltu’n uniongyrchol â phartneriaid ar draws y system cyfiawnder troseddol, mae myfyrwyr yn ennill dealltwriaeth llawer dyfnach o sut mae pob rhan yn cysylltu, o blismona cymdogaeth hyd at y llysoedd.”