Rhwydwaith Ymchwil Cardiofasgwlaidd Cenedlaethol yn cael grant trawsnewidiol i fynd i'r afael â chlefyd y galon

Mae Prifysgol De Cymru (PDC) yn rhan o'r Rhwydwaith Ymchwil Cardiofasgwlaidd Cenedlaethol (NCRN), sydd wedi sicrhau cyllid pwysig a fydd yn trawsnewid ymdrechion i atal, diagnosio a thrin clefyd y galon ledled Cymru.

Bydd y Rhwydwaith Ymchwil Cardiofasgwlaidd Cenedlaethol – rhwydwaith rhyngddisgyblaethol o glinigwyr, ymchwilwyr, cleifion ac arloeswyr blaenllaw – yn ymuno â chonsortiwm gwerth £50 miliwn ledled y DU sy'n ymroddedig i fynd i'r afael ag anghydraddoldebau mewn clefyd cardiofasgwlaidd (CVD).

Mae CVD yn cyfrannu at chwarter yr holl farwolaethau yn y DU (26%), ac mae tua 400,000 o bobl yn byw gydag ef yng Nghymru yn unig. Ond nid yw'n effeithio ar bawb yn gyfartal, a gall ffactorau fel hil, rhyw neu hyd yn oed byw mewn cymunedau gwledig neu ddifreintiedig eich rhoi mewn risg uwch o gael y clefyd.

Bydd Consortiwm Her Anghydraddoldebau Clefydau Cardiofasgwlaidd NIHR, mewn partneriaeth â Sefydliad Prydeinig y Galon, yn canolbwyntio ar fynd i'r afael ag anghydraddoldebau yn y grwpiau risg uwch hyn. Mae hefyd yn ceisio mynd i'r afael ag anghydraddoldebau mewn canlyniadau CVD rhwng menywod a dynion.

Fel rhan o'r fenter hon, bydd y Rhwydwaith Ymchwil Cardiofasgwlaidd Cenedlaethol yn defnyddio'r cyllid i gyflymu ymchwil ac arloesi ar gyfer ymwybyddiaeth, canfod a thrin pwysedd gwaed uchel ac ymwybyddiaeth a rheoli colesterol, yn uniongyrchol i bobl Cymru.

Gyda rhwydwaith cardiofasgwlaidd sydd eisoes wedi'i sefydlu, sy'n cynnwys aelodau ar draws prifysgolion, byrddau iechyd ac elusennau Cymru ac wedi'i ariannu gan Sefydliad Prydeinig y Galon ac Ymchwil Iechyd a Gofal Cymru, mae'r Rhwydwaith Ymchwil

Cardiofasgwlaidd Cenedlaethol mewn sefyllfa unigryw i arwain a gweithredu gofal iechyd trawsnewidiol arloesol, dan arweiniad ymchwil i bobl Cymru.

Bydd y grant hwn yn galluogi ein rhwydwaith i ganolbwyntio ar grwpiau sydd wedi'u tangynrychioli, gan sicrhau bod datblygiadau mewn atal, diagnosis a thriniaeth yn cyrraedd y rhai sydd eu hangen fwyaf.

Dywedodd yr Athro Damian Bailey, Cyfarwyddwr Labordy Ymchwil Niwrofasgwlaidd PDC a Chymrawd Ymchwil Wolfson y Gymdeithas Frenhinol: "Nid yw clefyd y galon yn cael ei ddosbarthu'n gyfartal, ac ni ddylai cyfle i atal a thriniaeth fod chwaith. Mae'r cyllid hwn yn caniatáu inni gyfuno gwyddoniaeth cardiofasgwlaidd arloesol gyda chyflwyno yn y byd go iawn, gan dargedu'r cymunedau hynny sydd fwyaf mewn perygl. Mae'n gam pwerus tuag at droi rhagoriaeth ymchwil yng Nghymru yn effaith fesuradwy ar iechyd lle mae'n bwysig fwyaf."

Meddai'r Athro Christopher George, Cyd-arweinydd y Rhwydwaith Ymchwil Cardiofasgwlaidd Cenedlaethol: "Clefyd cardiofasgwlaidd yw lladdwr mwyaf y genedl hon. Mae'r wobr hon, y gyntaf o'i math i Gymru, yn adlewyrchu hyder cryf asiantaeth ymchwil iechyd y DU yng ngalluoedd ac arbenigedd ymchwilwyr o Rwydwaith Ymchwil Cardiofasgwlaidd Cenedlaethol Cymru i gael effaith wirioneddol ar ganfod, trin ac atal pwysedd gwaed uchel a cholesterol uchel yn y boblogaeth.

“Rydym yn falch iawn o fod yn rhan graidd o'r consortiwm hwn ledled y DU sy'n canolbwyntio ar ddatblygu strategaethau arloesol a newydd i fynd i'r afael â'r broblem iechyd fawr hon. Mae'r cyllid hwn yn hwb enfawr i'n gwaith yn y maes hwn a bydd o fudd i bobl Cymru a thu hwnt."