GradFest21 Creadigol: Georgia yn cael cynnig swydd yn syth wedi cwblhau’r brifysgol

Mae'r myfyriwr Dylunio Mewnol Georgia Davies ar fin graddio o Brifysgol De Cymru (PDC) ac mae eisoes wedi cael cynnig swydd yn Di Oro, cwmni dylunio mewnol yng Nghaerdydd sy'n gweithio gyda datblygwyr eiddo, perchnogion tai a gwestai.

Fel rhan o GradFest21 Creadigol, mae Georgia, 24, o Dalacharn, Sir Gaerfyrddin, yn dweud mwy wrthym am ei hamser yn PDC.

Pam wnaethoch chi ddewis PDC?

“Dewisais astudio ym Mhrifysgol De Cymru oherwydd deinameg y maes llafur a’r cysylltiadau sydd gan y darlithwyr â chwmnïau lleol yn y diwydiant. Roedd yn wych mynd trwy'r Brifysgol yn cymryd rhan mewn prosiectau byw - hyd yn oed yn cael y profiad i greu arddangosfa yn yr ail flwyddyn. Roeddwn i'n teimlo bod hyn yn rhoi dealltwriaeth ymarferol iawn o'r union beth a ddisgwylir gan ddylunydd o'r dechrau i'r diwedd.

Roedd y 'digwyddiadau cymysgu', lle mae myfyrwyr prifysgol yn cwrdd ac yn cymysgu â chyn-fyfyrwyr PDC a chwmnïau lleol, hefyd yn help mawr i gwrdd â phobl o'r un anian a hyd yn oed ddod o hyd i gyfleoedd swyddi/lleoliad.

Ydych chi wastad wedi bod eisiau gweithio ym maes dylunio?

Roeddwn ychydig yn hwyr yn penderfynu ar yr hyn yr oeddwn am ei wneud. Ar ôl bod mewn chweched dosbarth a roddodd lawer o bwysau ar fyfyrwyr i fynd yn syth i'r brifysgol, penderfynais gymryd dwy flynedd allan i fynd i deithio.  Ar ôl yr amser hwn i ffwrdd o addysg, roeddwn i'n teimlo bod gen i weledigaeth gliriach o'r hyn roeddwn i eisiau ei wneud fel gyrfa.

Sut mae'r cwrs wedi eich paratoi ar gyfer y diwydiant?

Mae'r cwrs wedi fy mharatoi'n fawr ar gyfer y diwydiant. Roedd y digwyddiadau cymysgu yn gam cyntaf da i'r pen dyfnaf, lle sylweddolais yn gyflym nad oedd cwrdd â phobl o'r diwydiant yn ddychrynllyd o gwbl ond yn lle hynny gallent fod yn hwyl ac yn gymdeithasol iawn. Yna, roedd cael cyfle blwyddyn lleoliad mewn diwydiant rhwng fy ail a thrydedd flwyddyn wedi caniatáu imi gael blas ar sut beth yw gweithio fel dylunydd yn y byd go iawn, a oedd yn hollol wych - profiad y byddwn yn ei argymell i bawb os gallant!

Dywedwch wrthym am eich rôl yn Di Oro?

Rwy'n gweithio fel dylunydd mewnol iau. Mae wedi bod yn gyffrous iawn i ddechrau arni, ac rwy'n edrych ymlaen at ddysgu a symud ymlaen ymhellach fel dylunydd.

Unrhyw gyngor i rywun sydd eisiau astudio dylunio a gweithio yn y diwydiant?

Fy nghyngor i rywun sy'n cychwyn fyddai mwynhau pob munud ohono.  Y Brifysgol yw'r unig amser y gallwch chi fod mor greadigol a gwyllt gyda dylunio ag yr ydych chi am fod - felly cofleidiwch hynny! A manteisiwch ar unrhyw gyfle a ddaw eich ffordd drwyddo draw; mae'r cyfan yn brofiad.”