Gŵyl Immersed! yn dychwelyd i Gaerdydd yn 2024

Cyflwynydd BBC Radio Wales Huw Stephens yn siarad yn yr digwyddiad lansio'r ŵyl Immersed!

Mae Prifysgol De Cymru (PDC) yn dod â Immersed!24, gŵyl amlgyfrwng llawn cerddoriaeth, ffilm, celf, ffasiwn a pherfformiad a guradir gan fyfyrwyr y diwydiannau creadigol, i Gaerdydd ym mis Mawrth 2024.

Gyda chefnogaeth Cymru Greadigol i godi ymwybyddiaeth ar gyfer Music Declares Emergency, elusen newid hinsawdd y diwydiant, bydd y chweched ŵyl Immersed! yn cael ei chynnal ddydd Sadwrn 2 Mawrth yn Tramshed Caerdydd.

Voya yn perfformio yn y digwyddiad lansio ar gyfer Immersed!

Prif seren y llwyfan fydd y ddeuawd o Lundain sydd wedi ennill gwobr MOBO, Bob Vylan – act fyw arbennig gyda sain unigryw sy’n boblogaidd iawn ymysg dilynwyr cerddoriaeth roc, rap, pync, dawns ac amgen fel ei gilydd. Bydd Bob Vylan yn cael eu cefnogi gan y cynhyrchydd a lleisydd o Fryste, Grove, meistri cerddoriaeth synth newydd wedd, Voya, y triawd roc amgen Chroma a'r band metal trwm Continents. Bydd dros 50 o artistiaid a bandiau, gan gynnwys cydweithfa Sound Progression Caerdydd, yn cwblhau'r rhestr ar gyfer Immersed!24 mewn lleoliad i 1,000 o bobl.

Dywedodd Huw Stephens, cyflwynydd BBC Radio Wales a Chymrawd Anrhydeddus PDC: "Mae Gŵyl Immersed! wedi dod yn ychwanegiad i'w groesawu i'r sîn gerddoriaeth fyw yng Nghymru. Mae ei ffocws ar dalent, creadigrwydd a chynhyrchu yn werthfawr y tu hwnt, ac mae ei gwaith gyda myfyrwyr i feithrin eu cymuned yn hynod lwyddiannus. Mae'r digwyddiad ei hun yn cael ei gyflawni’n broffesiynol, gyda phrofiad arbennig i'r rhai sy'n cymryd rhan."

Cynhaliwyd digwyddiad lansio ar gyfer Immersed! ar 24 Tachwedd ar Gampws Caerdydd PDC, lle wnaeth Huw Stephens esbonio fwy am yr ŵyl, samplu cerddoriaeth unigryw a datgelu’r thema ar gyfer yr ŵyl – Iwtopiâu’r Dyfodol.

Mae PDC yn partneru â Music Declares Emergency i dynnu sylw at effeithiau newid yn yr hinsawdd a helpu i hyrwyddo dyfodol gwyrddach, mwy cynaliadwy, gyda rhaglen o ddigwyddiadau ymylol yn cael eu cynnal rhwng 29 Chwefror a 7 Mawrth, gan groesawu thema Iwtopiâu’r Dyfodol. Bydd y digwyddiadau'n cynnwys dangosiadau o ffilmiau byrion, a darllediad teledu Immersed!, gweithdai, arddangosfeydd, gosodweithiau celf, theatr drochi, murlun yng nghanol y ddinas, prosiectau ffasiwn cynaliadwy ac arddangosfa cerddoriaeth fyw.

Bydd y Brifysgol a'r elusen hefyd yn lansio Confensiwn Hinsawdd Cenedlaethau'r Dyfodol cyntaf Cymru – cyfres o baneli, sgyrsiau a phrosiectau arddangos sy'n ymroddedig i rymuso pobl mewn trafodaethau hinsawdd – mewn partneriaeth â'r ymgynghoriaeth deithio a chynaliadwyedd, Soliphilia.

Am fwy o fanylion am Immersed! ewch i immersedfestival.co.uk.