Mae'n fraint i Eboboritse weithio gyda'r tîm Olympaidd

Mae 16 mlynedd wedi mynd heibio ers i dîm pêl-droed cenedlaethol Merched Nigeria gymhwyso ar gyfer y Gemau Olympaidd. Mae myfyriwr o Brifysgol De Cymru (PDC) yn rhan o'r tîm hyfforddi sy'n eu paratoi ar gyfer eu dychweliad mawr.

Mae Eboboritse Uwejamomere, sy'n byw yng Nghaint, yn dod i ddiwedd ei astudiaethau ar y cwrs MSc Hyfforddi Pêl-Droed Perfformiad Uwch. Fodd bynnag, cyn iddo gyflwyno ei ddarn olaf o waith, mae'n gweithio gyda thîm Nigeria fel eu Dadansoddwr Hyfforddwr.

"Mae'r gwaith wedi bod yn ddiddorol" meddai.

"Mae tîm pêl-droed merched Nigeria ar frig pêl-droed Affrica ond dydyn nhw ddim wedi cymhwyso yn y tri thwrnamaint Olympaidd diwethaf. Maen nhw bob amser yn gymwys ar gyfer Cwpan y Byd Merched a Phencampwriaethau Merched yn Affrica, ond mae'r Gemau Olympaidd wedi bod ychydig y tu hwnt i'w gafael yn eu hymdrechion diwethaf. Hyd yma.

“Mae gennym ni chwaraewyr hynod ddiddorol, rhai ohonyn nhw ymhlith y gorau ym mhêl-droed merched Affrica, yn ogystal â’r gôl-geidwad gorau. Mae gennym ni hefyd chwaraewyr addawol iawn a chwaraewyr profiadol o Gynghreiriau’r Unol Daleithiau ac Ewrop a Chynghrair Pencampwyr y Merched.”

Roedd Eboboritse wedi hyfforddi yn system gynghrair Nigeria a lefel academi ieuenctid elitaidd yn Lloegr cyn cael swydd gyda'r Ffederasiwn Pêl-droed yn gweithio o fewn y Gyfarwyddiaeth Dechnegol. Gweithiodd gyda thîm Dynion Nigeria ac yna gofynnwyd iddo gefnogi Prif Hyfforddwr tîm y Merched ar gyfer y Gemau Olympaidd.

Wrth drafod ei benderfyniad i astudio ochr yn ochr â’i swydd, dywedodd: "Mae cymhwyster o fewn y radd meistr a oedd yn bwysig i mi, sef trwydded A UEFA gyda Chymdeithas Bêl-droed Cymru. Mae'r drwydded hon yn rhan hanfodol o'r llwybr hyfforddi i weithio ar y lefel elitaidd.

Dywedodd: "Sylwais hefyd fod rhai swyddi elitaidd yn gofyn am radd mewn chwaraeon. Mae gen i radd israddedig mewn Cymdeithaseg felly roeddwn i'n meddwl y gallaf ladd dau aderyn ag un ergyd trwy wneud y cwrs hwn a gwella fy rhagolygon gwaith yn y dyfodol.

"Er hynny, nid yw'r cwrs wedi bod yn ymarfer ticio blychau i mi. Mae wedi bod yn fuddiol iawn. Gallaf gymhwyso'r dysgu, o drwydded A UEFA a'r modiwlau meistr, yn fy swydd ar unwaith. Mae wedi fy ngwneud yn fwy cyfarwydd â fy ngyrfa a fy swydd o ddydd i ddydd."

Mae Eboboritse yn teithio i Sbaen i ymuno â'r tîm mewn gwersyll cyn y bencampwriaeth, cyn y gêm gyntaf yn Bordeaux.

"Rydw i mor ddiolchgar i'r Prif Hyfforddwr, Randy Waldrum, sydd wedi rhoi’r cyfle i mi fyw'r profiad hwn gyda'r tîm ac i ddysgu oddi wrtho a gweithio o dan ei arweiniad. Y Gemau Olympaidd yw'r digwyddiad chwaraeon mwyaf yn y byd felly mae cymryd rhan, nid yn unig yn anhygoel i'w gael ar fy CV, ond hefyd yn anrhydedd."