Wythnos Entrepreneuriaeth y Byd: Anna yn cefnogi lles gyda therapi creadigol ar olwynion

Thema Wythnos Entrepreneuriaeth Fyd-eang eleni, a gynhelir rhwng 18-24 Tachwedd, yw 'Mae entrepreneuriaeth i bawb', felly rydym yn tynnu sylw at sut mae PDC yn helpu darpar berchnogion busnes, a'r rhai sydd eisoes yn rhedeg eu mentrau eu hunain, i lwyddo.

Un o raddedigion PDC, Anna Amalia Coviello, yw sylfaenydd Well Wagon, gwasanaeth symudol sydd wedi’i gynllunio i ddarparu gweithdai therapiwtig yn seiliedig ar gelf ar draws cymunedau o’i beic tair olwyn. Wedi'i lansio yn ystod 'cyfnod clo’r pandemig', mae Well Wagon yn mynd i'r afael â'r angen cynyddol am gymorth iechyd meddwl drwy fynegiant creadigol.

Wedi'i hysbrydoli gan ei phrofiadau yn astudio BA (Anrh) Celfyddydau Creadigol a Therapiwtig a defnyddio cyfuniad o dechnegau therapi celf, creodd Anna 'Well Wagon' i gynnig gweithdai sy'n annog creadigrwydd heb ganolbwyntio ar ddisgwyliadau artistig traddodiadol. "Nid yw'n ymwneud â chreu rhywbeth hardd, mae'n ymwneud â sut y gall y broses effeithio ar ein lles," meddai Anna.

"Y nod yw grymuso cyfranogwyr i fynegi eu hunain drwy weithgareddau peintio, darlunio, dawnsio ac ymwybyddiaeth ofalgar, heb bwysau barn na chanlyniad."

Dechreuodd y cysyniad unigryw ar gyfer 'Well Wagon' gyda beic tair olwyn cargo a ddyluniodd Anna a'i adeiladu gyda chymorth grant gan Den Syniadau Disglair PDC. Mae'r beic tair olwyn, sy'n cludo deunyddiau ar gyfer sesiynau celf, wedi bod yn ganolbwynt i'w gweithdai symudol, gan ganiatáu iddi gynnal sesiynau yn yr awyr agored yn ddiogel yn ystod y pandemig. Ers hynny, mae Well Wagon wedi ehangu i wahanol leoliadau, lle mae Anna bellach yn cynnig amrywiaeth o sesiynau creadigol a therapiwtig.

Ymhlith ei gweithdai unigryw mae 'Paentio myfyriol', 'Darlunio ar y Cyd', 'Plein Air': peintio yn yr awyr agored', wrth gynnal 'Shes and Theys in Art History' sef sesiwn fisol lle mae cyfranogwyr yn creu celf wedi'i ysbrydoli gan artist anneuaidd neu fenywaidd dethol. Mae'r sesiynau'n agor gyda myfyrdod a gosod bwriadau, ac yna weithgareddau creadigol i dorri’r iâ sy'n annog cysylltiad a chydweithrediad. "Mae'n ymwneud â chwalu'r rhwystrau o ran sut y dylai celf edrych ac yn hytrach ganolbwyntio ar sut mae'n teimlo," meddai Anna.

Yn ogystal â'i gweithdai wyneb yn wyneb, mae Anna yn rheoli’r prosiect grŵp "Butterfly Soup", man cymunedol cwiar yn Academi Ardour sy'n cyfuno myfyrio, dawnsio a darlunio ar gyfer iachau a mynegiant. "Rydw i eisiau creu man lle gall pobl fod yn rhydd a mynegi eu hunaniaeth, boed hynny trwy symud, ysgrifennu neu unrhyw fath arall o fynegiant artistig," ychwanegodd hi.

Er gwaethaf poblogrwydd cynyddol 'Well Wagon', mae Anna yn cydbwyso gwaith ei busnes ochr yn ochr â swydd llawn amser. "Yn ddelfrydol, rydw i eisiau i Well Wagon fod yn hunangynhaliol," meddai.

"Pe bawn i'n gallu neilltuo mwy o amser, rwy'n gwybod y gallwn gyrraedd hyd yn oed mwy o bobl, yn enwedig mewn cymunedau sydd heb wasanaethau digonol."

Gweledigaeth hirdymor Anna yw gwneud celf yn hygyrch i bawb. Mae ei gweithdai wedi'u cynllunio gyda system talu hyblyg, gan ganiatáu hyblygrwydd i'r rhai na allant fforddio dosbarthiadau celf traddodiadol.

Dywedodd Anna: "Fyddwn i ddim lle rydw i heb fy ngradd yn y Celfyddydau Creadigol a Therapiwtig o Brifysgol De Cymru. Dangosodd i mi bŵer y broses greadigol, yn hytrach na'r canlyniad, ac fe wnaeth fy ysbrydoli i gefnogi pobl eraill i fynegi eu llais creadigol eu hunain."

I gael cymorth i ddechrau busnes neu weithio’n llawrydd, e-bostiwch [email protected].