Arbenigwyr y dyfodol ar eu ffordd: Mae PDC yn ysbrydoli disgyblion gyda Diwrnod Blasu’r Amgylchedd Adeiledig

Daeth cannoedd o ddisgyblion ysgol i ddigwyddiad arbennig ym Mhrifysgol De Cymru (PDC) i ddysgu popeth am yr amgylchedd adeiledig.

Fel rhan o’r Diwrnod Blasu, cafodd disgyblion o bob cwr o’r rhanbarth gyfle i gymryd rhan mewn profiadau ymarferol yn gysylltiedig â’r pwnc – gan gynnwys cystadleuaeth mesur, gweithgaredd ‘adeiladu tref’, demo arolygu adeiladau, a dysgu am werthuso.

Roedd ardal arddangos cyflogwyr hefyd, gyda chyngor gan arbenigwyr o Yrfa Cymru, PDC a Rhwydwaith 75 - sy’n rheoli cyfleoedd prentisiaethau gradd yn y Brifysgol - y Sefydliad Brenhinol yr Arolygwyr Siartredig (RICS), a Chynllun Addysg Peirianneg Cymru (EESW).

Rhannodd cynrychiolwyr o gwmni adeiladu BAM - sydd wrthi’n adeiladu adeilad pwrpasol, uwch-dechnoleg newydd ar gyfer Cyfrifiadureg, Technoleg a Pheirianneg ar Gampws Trefforest y Brifysgol o’r enw Calon - fideo hedfan drwy’r cyfleuster newydd, tra cafodd mynychwyr y digwyddiad gyfle i weld y gwaith adeiladu o agos.

Roedd myfyrwyr PDC Ffion Ransom a Sadie Enoch, sy’n astudio Eiddo Tiriog, ynghyd â Leo Marsh a Steffan David, sy’n astudio Arolygu Meintiau, hefyd wrth law i rannu eu profiadau o fywyd Prifysgol.

Cafodd y digwyddiad ei drefnu a’i gadeirio gan Sian Cornwell-Shaw, arolygydd eiddo uwch gyda Phartneriaeth Gwasanaethau a Rennir y GIG (Gwasanaethau Ystâd Arbenigol) ac yn Llysgennad STEM Inspire gyda RICS. Meddai Sian:
“Bwriad y digwyddiad oedd rhoi mewnwelediad i’r disgyblion i’r amgylchedd adeiledig ac i’r gyrfaoedd sydd ar gael yn y sector.”

“Mae’n amlwg bod cronfa dalent yn y rhan hon o Gymru, ac rydym yn awyddus i roi gwybod iddynt ba opsiynau sydd ar gael i ddatblygu gyrfa yn yr amgylchedd adeiledig - yn enwedig gan fod prinder arolygwyr i lenwi swyddi gwag, a chymaint o arolygwyr cymwys ar fin ymddeol yn ystod y pump i ddeg mlynedd nesaf.

“Roedd y digwyddiad yn ymwneud â dangos y gwahanol feysydd sy’n rhan o arolygu i’r myfyrwyr – megis mesur, gwerthuso ac adeiladu, yn ogystal â defnyddio drôn a mathau eraill o dechnoleg i roi blas iddynt o’r hyn sydd dan sylw.

“Roedd bod mewn lleoliad Prifysgol hefyd yn cynnig cipolwg iddyn nhw ar beth yw addysg uwch, ac yn dangos nad dim ond bod mewn darlith ydyw, ond profi ochrau ymarferol a rhyngweithiol dysgu y mae cyrsiau PDC yn eu cynnig.”

Ychwanegodd Shane Galvin o BDC: “Mae’n wych gallu rhoi cyfle i ddisgyblion o ysgolion lleol ddod i BDC a rhoi cynnig ar amrywiaeth o gyfleoedd gyrfa yn y sector amgylchedd adeiledig.

“Roedd y gweithgareddau a wnaethant yn ystod y diwrnod yn eu helpu i gael gwell syniad o’r hyn y gallai gwaith yn y gyrfaoedd hyn fod fel, yn ogystal â chyfarfod â phobl sy’n gweithio eisoes yn y maes i ddeall o’r newydd pa sgiliau sydd eu hangen ar weithwyr proffesiynol yn yr amgylchedd adeiledig.”

Dywedodd Graham Craven, Rheolwr Ymgysylltu Rhanbarthol RICS Cymru: “Roedd yn wych bod yn rhan o ddigwyddiad mor wych. Clod i Sian am drefnu’r diwrnod ac i’r rhai a fu’n gyfrifol am gyflwyno’r gweithgareddau mewn ffordd mor ddiddorol.

“Rydyn ni’n aml yn siarad am sut i ddenu talent newydd i’r proffesiwn arolygu – ac ni allem fod wedi dymuno enghraifft well na hon.”