Datblygu Campysau

Mae Prifysgol De Cymru yn falch o gyhoeddi mai Calon yw’r enw a ddewisir ar gyfer y datblygiad STEM newydd sydd wrth galon campws Trefforest y Brifysgol.

Bydd yr adeilad yn ganolog i ddarparu addysg i’r genhedlaeth nesaf o beirianwyr, gweithwyr proffesiynol yr amgylchedd adeiledig, a gwyddonwyr cyfrifiadurol a data.

Bydd Calon yn cynnwys mwy na 40 o fannau addysgu, dysgu ac ymchwil arloesol newydd, gan gynnwys labordai electroneg a hydrolig, efelychydd hedfan, labordy roboteg, mannau ymchwil glân a diwydiannol, mannau addysgu cydweithredol, yn ogystal â gallu realiti rhithwir, a mannau arddangos.

Yn cynnwys cymdogaethau rhyngddisgyblaethol gan gynnwys yr Amgylchedd Adeiledig a Pheirianneg Sifil, Mecaneg ac Awyrofod, Gwybodeg ac Electroneg, a Chyfrifiadureg a Gwyddor Data, bydd y datblygiad yn darparu mannau ar gyfer cydweithio rhwng myfyrwyr ac arloesi trwy gydol eu hastudiaethau.

Bydd gwaith adeiladu’r cyfleuster newydd wedi’i gwblhau yn 2026.

Datblygiadau diweddaraf (diweddarwyd Mawrth 2025)

Mae’r rhan fwyaf o’r gwaith tir ar gyfer yr adeilad bellach wedi’i gwblhau, gan gynnwys gosod 186 o bentyrrau concrit 750mm diamedr unigol, pob un yn cynnwys atgyfnerthiad dur i’w hangori i’r strwythur uwchben.

Mae cam nesaf y gwaith o adeiladu’r adeilad Cyfrifiadura, Peirianneg a Thechnoleg newydd ar Gampws Trefforest bellach ar y gweill, a bydd y gwaith strwythurol mawr yn dechrau datblygu uwchben y ddaear.

Gyda dyfodiad craeniau 35m a 40m o uchder ar y campws ddiwedd Ionawr 25, y cam nesaf fydd gweld y craeniau'n cael eu defnyddio i adeiladu ffrâm goncrit yr adeilad pum llawr.

Bydd y ffrâm yn cynnwys 115 o golofnau llawr gwaelod, pob un wedi'i hangori gan bedwar bar, yn amrywio mewn diamedr o 16mm i 40mm. Mae'r golofn llawr gwaelod dalaf yn 5.27 metr o uchder, a'r golofn drymaf yn pwyso 2,900kg. Dechreuodd y gwaith o godi colofnau ar Chwefror 25, gan roi cipolwg cyntaf i fyfyrwyr, staff ac ymwelwyr â Champws Trefforest o’r adeilad yn codi o’r ddaear.

Mae disgwyl i’r ffrâm goncrit gymryd tua naw mis i’w hadeiladu, tra bydd cladin a dur hefyd yn dechrau cael eu hychwanegu at ffrâm yr adeilad o ddiwedd haf 25.

Cewch y wybodaeth ddiweddaraf am y datblygiadau adeiladu gyda'r ffrydiau treigl amser isod: