PDC yn ennill achrediad uchaf Food Made Good

Mae Prifysgol De Cymru (PDC) wedi derbyn ei hachrediad Food Made Good cyntaf, gan gyflawni'r sgôr uchaf o dair seren i gydnabod rhagoriaeth mewn gwasanaeth bwyd cynaliadwy.

Wedi'i ddatblygu gan y Gymdeithas Bwytai Cynaliadwy, Food Made Good yw ardystiad cynaliadwyedd mwyaf blaenllaw y diwydiant gwasanaethau bwyd yn fyd-eang, ac mae’n  asesu sefydliadau o ran cyrchu bwyd, a’u heffaith gymdeithas ac amgylcheddol. 

Yn ei hymgais cyntaf erioed, cyflawnodd PDC sgôr o 72%, gydag 82% yng nghategori’r  amgylchedd. Mae gan lai na 30 o brifysgolion yr achrediad hwn ar hyn o bryd, a dim ond un brifysgol arall yng Nghymru sydd wedi ennill tair seren llawn. 

Dywedodd Jason Edwards, Pennaeth y Gwasanaethau Lletygarwch: "Dros y saith mlynedd diwethaf, mae Gwasanaethau Arlwyo PDC wedi gwneud cynaliadwyedd yn flaenoriaeth graidd, o annog dewisiadau ffordd o fyw iachach i sicrhau effaith gadarnhaol go iawn ar yr amgylchedd.  

"Roedd mentrau fel ein cynllun economi gylchol, wedi’i hariannu gan Lywodraeth Cymru,  ymhlith y cyntaf o'u bath mewn addysg uwch yn y DU ac maen nhw’n dangos ein hymrwymiad hirdymor at wasanaethau bwyd cyfrifol. Rydyn ni’n falch o weithio ochr yn ochr â'n tîm Cynaliadwyedd ac edrychwn ymlaen at adeiladu ar y cynnydd hwn dros y flwyddyn nesaf." 

Mae'r achrediad Food Made Good yn ddilys am ddwy flynedd ac mae'n darparu fframwaith clir ar gyfer gwelliant parhaus wrth i PDC gryfhau ei effaith amgylcheddol a chymdeithasol.