Ysgol Haf PDC i gynnig blas ar fywyd prifysgol

Bydd Ysgol Haf gyntaf Prifysgol De Cymru (PDC) yn cael ei chynnal ym mis Awst eleni, gyda digwyddiad dau ddiwrnod yn cynnig cipolwg gwerthfawr i fyfyrwyr ysgol a choleg ar fywyd yn y brifysgol.

Bydd y digwyddiad ar y campws, ac yn cael ei gynnal ar ddydd Mercher 25 a dydd Iau 26 Awst 2021. Bydd yn cynnig cyfle i fyfyrwyr Blwyddyn 12 gael profiad o astudio ar lefel prifysgol drwy raglenni addysg uwch rhyngweithiol a sesiynau cynghori ar gyfer gwahanol bynciau penodol.  Mae'r ysgol haf yn rhad ac am ddim i'w mynychu, a bydd costau teithio myfyrwyr yn cael eu had-dalu gan PDC.

Bydd myfyrwyr sy'n mynychu'r ysgol haf, ac yna'n cofrestru ar gwrs gradd israddedig llawn amser tair neu bedair blynedd ym mis Medi 2022, yn gymwys i wneud cais am Fwrsariaeth Ysgol Haf PDC. Mae'r fwrsariaeth yn werth £500 a gellir ei gwario ar dechnoleg a deunyddiau'n gysylltiedig â'r cwrs.

Meini prawf cymhwysedd
Mae lleoedd yn gyfyngedig a byddant yn cael eu dyrannu i fyfyrwyr ysgol blwyddyn 12 a cholegau o grwpiau a dangynrychiolir sy'n bodloni'r meini prawf cymhwysedd yn unol â  Chynllun Ffioedd a Mynediad 2020-21.

Bydd y ceisiadau'n cau ar ddydd Gwener 16 Gorffennaf. I gael rhagor o wybodaeth, anfonwch e-bost at [email protected].

I wneud cais, ewch i southwales.ac.uk/about/schools-and-colleges/virtual-summer-school.